رواية المافيا

الحلقة 12

رواية المافيا😈
للكاتبة: لولو حبيب❤ الحلقة:12
___________________________
ركبت السيارة وروحت
خشيت للحوش القيت مرت بوي تعيط وتلعلع
اني اندير بيدي بمعني شنو
مرت بوي: هادا حوشي الحوش مكتوب بأسمي اطلعو منه
وائل: حوش بوي مستيحل نطلع منه
مرت بوي: اطلعوووووو هادا حوشي
اني طلعت بلجيكي وسحبته
مرت بوي: انتي ياتاجرة السلاح حوشي ماتخشيشي انتي مالك كله حرام اطلعي من حوشي
اني نحاول نتكلم مش قادرة فمي يتحرك لكن صوتي نسمع فيه وهما مايسمعوش فيا
اني هزيت راسي الي فارس
الولاد كلهم طلعو سلاحهم ووجهوه اعليها
مرت بوي: بتخوفيني بشوية سلاح ياع🤬🤬🤬
اني ابتسمت وضغطت علي الزناد وطلعت رصاصة جت في كتفها
اني درت بصبعي رقم 2✌ واشرت علي جبهتها
فارس: يعني التانية في راسك
اني هزيت راسي بي اي
وهيا تبكي وتعيط رفعها خوها للمستشفي واني خشيت للحوش الناس كلها تتفرج
طلعت اني وسجود انسيقو في الدم
سجود: وداد تكلمي
اني هزيت راسي بي لا
سجود: لاحول لله ياربي
كملنا تسيق وخشينا
خشت وحدة عزتني في اوس ووصلت في بوي
اني درتلها بيدي لا
المراة : مفهمتش
اني كتبت في ورقة: يوم ناخد حق بوي تعالي عزي لكن توا عزيني في اوس بس
المراة: ربي ينصرك يابنتي
وامشت
مرو 3 ايام العزي واني نفس الحالة مش قاردة نتكلم والناس ايجو من اليل لليل بس
سجود: اويس
اويس: نعم ماما
سجود: تعالى ماما هدرز علي عمتو شوي
اويس كعمز جنبي: دودي
اني شبحتله
اويس: هدرزي اعليا
اني اتكيت ولفيت جيهة الحيط
اويس: نوضي ارقدي في دارك
اني هزيت راسي بي لا
اويس: به نوضي معاي
اني نضت وامشيت معاه رفعني الي دار بوي
اوبس: نرقدو في دار جدي
اني خشيت فتحت المكيف واتكيت علي السرير اويس اتكا جنبي وتغطا وغطاني ورقدنا
/////
وائل: وين وداد
سجود: رقدت فوق
وائل: كيف الحل توا
سجود: خليها علي ربي
علاء طق طق : احم احم
سجود لبست وشاحها: تفضل خش
علاء: وين وداد
وائل: راقدة فوق ان شاء الله خير
علاء: لا خير بأذن الله.. امنين اتنوض قولولها اتكلمني
وائل: به
طلع علاء وصقر الباب
فارس: شنو
علاء: راقدة
فارس طلع هوا وعلاء
فارس: سامحيني ياحاجة وداد راقدة
المراة: ياوليدي انشوفها بس 😭
فارس: كان تبي وائل عادي لكن وداد راقدة
المراة: به به انشوف وائل بس😭
فارس: ترا شوفه ياعلاء
علاء: يبي يرتاح تقدري ترجعي بعدين ياحاجة
المراة: منقدرش متشبحش فيا رجل في الدنيا ورجل في القبر اني هاربة من المستشفي توا راني ناخد في كيماوي اني نبي انشوفها من غير ماتفيق بيا ولا تعرفني
فارس: اعلاش
المراة: منبيهاش تتعذب ساد تعذبت علي اوس وبوها
علاء: امنين تعرفيها انتي
المراة امشت
علاء:ياحاجة
المراة : شوي تانية ونرجع وامشت
فارس: شني تقصد بكلامها هادي
علاء: مش عارف
فارس: ان شاء الله خير وبس
علاء: وين محمد
فارس: من امس مريتاش
علاء : شرينله ترا
فارس شرينله
فارس: مايردش
علاء: وين امشي هادا
فارس: الصبر خشينا في بعضنا وطلعنا ووين عادل
علاء: في الخدمة
فارس: ترا شوفه مرات معاه
علاء: لا امبكري كلمني يسال فيا علي محمد
فارس: وين امشي بس
///////
عند محمد كان مكعمز في السيارة ويتفرج علي حوش قدامه
محمد: شني بنقعد طول عمري اهني واني من امس مكعمز انقول ننزل ولا مننزلش هي انزل والي بيصير يصير
محمد فتح الباب ونزل رجله وبعدين ركب وصقره
محمد: لالا مرات ماتو ولا حاجة مرات ايلزوني
محمد: بسم الله ياربي معاي وفتح الباب ونزل
محمد وقف قدام الباب واخدي نفس وطقطق
بنت: هيا هيا
فتحت البنت الباب
البنت: تفضل خوي مني انته
محمد: انتي الي مني
البنت: شني اني مني راك في حوشي واتقولي مني
محمد: مش هادا حوش عيلة &&&&&
البنت: باعولنا الحوش وحولو
محمد: وين حولو
البنت: في ₩₩₩₩₩
محمد: تم سامحيني اختي وركب يجري في السيارة وسطرب وطلع
البنت: ربي يهدي وخشت
محمد امشي وصل غادي نزل الروشن القي ولد
محمد: ياشاب
الولد تلفت وخاف لانه سيارة GMS مظلمة
محمد: لو سمحت دقيقة
الولد جي: تفضل ياخوي
محمد: تعرف حوش عيلة ₩₩₩₩₩
الولد: اي الحوش هداكا الي لونه ابيض في الاسود لكن ياخوي معندهمش ولاد راهو
محمد بأستغراب: شني دخل الولاد
الولد: مرات جاي بدير طبة( مداهمة) اعليهم
محمد: هههه لالا منور خوي
الولد: بوجودك وامشي
محمد درس السيارة قدام الحوش ونزل اخدي نفس وطقطق
مراة: هي دقيقة ... عندي فرخة بايرة بدل ماتنوض تفتح الباب
محمد ضحك وفرح ليه هلبا ماسمعش الصوت هادا
المراة فتحت الباب وانصدمت وابدت تبكي😭
المراة: محمد ولدي
محمد حضنها وهوا يبكي 😭
المراة: روروروروروروي ولدي رجعلي ياناس ولدي رجعلي وينك ياماما وين امشيت استشحتك ياولدي استحشتك
محمد: يما سيبت الحشيش يما
المراة: روروروروروي
طلعت اخته تجري
اخت محمد: خيرك اتزغرطي وشبحت محمد
اخت محمد: محمد خوي 😭
محمد حضنها : اختي استشحتك
حضنو بعضهم ال 3 وابدو يبكو😭
امه: وين امشيت ياوليدي وين
محمد: بوي لزني من الحوش وانتي تعرفي
امه: بوك مات يامحمد
محمد قاعد يشبحلهم وبس
امه: جاته جلطة ومات
محمد قعد يتفكر في كلامي في تركيا
💢
اني: انته حتكون سبب موت بوك
محمد: اعلاش
اني: انته راس ولد بدل ما اتحافظ علي عيلتك خشيت علي الحشيش
محمد: الله غالب
اني: تقدر اتغير من نفسك وحاول وشد حيلك في المستشفي بش تتعالج وترجع الي عيلتك والي ليبيا
محمد: ان شاء الله وخش للمستشفي
💢
محمد ابدي يبكي: قاتلي وداد اني السبب قاتلي
اخته تبكي: مني وداد
امه: تو انتي تبكي ولا لاهية في وداد
اخته ضحكت ومسحت دموعها
امه وشوشتلها: هدي خوك مش تبكي معاه
محمد: اااه ياريتني روحت وشبحته ياريتني قاتلي وداد
اخته: وداد مرتك هادي
محمد: ااااه يابوي سامحني
اخته: تي مني وداد
محمد: سامحني يابوي وين المقبرة الي مدفون فيها
امه: &&&&&
محمد طلع يجري ركب سيارته وطلع يجري بيها
اخته: شوفي سيارة ولدك
امه: هادي امنين جابها
اخته: زعما خانبها
امه ضربتها علي ظهرها: عينك
اخته: امالا امنين جاته
امه: الله اعلم تو ايجي ونفهمو
محمد امشي الي قبر بوه وكعمز قعد يبكي واقري الفاتحة اعليه وروح وكعمز مع امه واخته وحكالهم كل شي صار معاه وطلعو مع بعض بالسيارة واخته تتفرج علي السيارة وفرحانة
/////////
اني: بابا
بابا واوس واقفين مع بعض: معاش تبكي اعلينا خلاص احني عايشين معاك في قلبك
بابا: كملي حلمي وحلمك وحققي هدفك يابنتي في اسرع وقت بش اني نستريح
اوس: وداد خلاص معاش تبكي اعلينا ولا تزعلي احني قاعدين عايشين معاك خلاص معاش تبكي بكل وعيشي حياتك عادي كأنه ماصار شي باللهي اعليك يااختي
اني: واحمد شني اندير فيه
بابا: ربي ياخد حققك يابنتي
اني: ومرتك يابوي
بابا: خودي حقك بيدك منها لكن احمد خليه علي ربي
اني: اوس
اوس: انحبك يااختي
بابا: انحبك يابنتي
اني فتحت عيوني شبحت اويس راقد
نضت وغطيته كويس وتوضيت وصليت ونزلت لوطة
القيت سجود ومعاها بنت ومراة
سجود: تعالي وداد
اني امشيت سلمت اعليهم وعزوني
سجود: معاش تتكلم شوره من الصدمة عيطت وبعدها خلاص
المراة: اني ام محمد
اخته: واني اخته
اني فرحت هلبا وطلعت نجري
سجود: خيرها هادي
وطلعو كلهم لحقوني
القيت محمد مكعمز امشيت نجري حضنته
محمد: خيرك يابنت
اني اشرت علي امه واخته
محمد: اه فهمت اعليك خلاص قررت نرجعلهم ريتك انتي كيف تبكي وتعيطي علي خوك وبوك اذكرت عيلتي وقلت لازم انعيش معاهم
اني ابتسمت وحضنته اكثر
فارس: 😡
علاء: هههه وداد شوفي اهني
اني شبحت الي فارس القيته راقيتله وشبحت الي وائل حتي هوا راقيتله
اني اشرت علي وائل واشرت علي محمد واشرت اعليا
وائل: مافهمت شي
علاء: قصدها انه زيك زي محمد الزوز خوتها واني ولد الجيران
اني ابتسمت ودرتله بيدي لا
محمد: اوف تعودت اعليك تتكلمي واتعيطي اخيه هكي
عادل: بالعكس احسن نفتكو من العياط والتهزيب شوية
اني شبحتله بنضرة حادة
عادل كعمز: ياكلمتي وليلي
اني طلعت تلفوني اتصلت بي ضرار
ضرار: الو
اني فتحت المايك واعطيت التلفون الي محمد وابديت نكتب في ورقة
محمد: اليوم بنبدو لانه بوي جاني في الحلم وقالي حققي هدفك
ضرار: لا مانبدوش مزال لين تبدا وداد تتكلم
محمد: لا لازم نبدو اليوم وبنبدا بمساعدة يزن واحمد
ضرار: احمد لا
محمد: لا احمد يعرف تاجرين سلاح اني منعرفهمش
ضرار: كلهم مكتوبين عندك في الورقة
محمد: نبيه معاي لانه اكيد كان يتعامل معاهم لكن اني مرات ميعطوش فيا الثقة
ضرار: اوك ديري رايك لكن الدعم لازم ايكون معاك
محمد: لا اني انجيبهم لعندك
ضرار: لا خليها زي الصفقة هديكا متع ال5 مليون
علاء بعياط: قصدك الشرطة هداكا اليوم متفاهمة انتي وياهم
اني هزيت راسي بي اي
علاء قعد يشبحلي وبس
ضرار: شنو منو وداد
محمد: عندي خطة تو بنديرها وبعدين تو نفكر وانشوف شني ايصير معاي
ضرار: تم امتي بتبدي
محمد: اليوم وبنبدا بتجار الحشيش
ضرار: مفروض نبدو بتجار الأعضاء
محمد: بالشوي بالشوي وتو نصفيهم كلهم
ضرار: تم ديري رايك وداد وردي بالك علي روحك
محمد: تم هي سلام
وصقر
اني كتبت: وائل لازم اتقوي روحك.. وحكيتله الحلم الي ريته.. خلاص هما عايشين معانا توا ولازم انحققو الهدف بش بوي يرتاح
محمد: شنهوا الهدف
اني: طول عمري نحلم اني وبوي انه ليبيا تبدا كويسة ومعاش فيها لاتجار سلاح لاتجار حشيش لاتجار اعضاء ولا تجار البشر واني بنحقق الحلم هادا
محمد: وشنو بنديرو توا
اني: اني بندير انتم تكعمزو اهني وتستنو لين انكلمكم
محمد: كيف
اني: كان احتجتلكم تو انكلمكم
وائل: هادا هدف بوي واني لازم انكون معاك فيه
اني: لا في خطر انته عندك مراة وصغار خليك معاهم واني مش مستعدة نخسر حد تاني من عيلتي
علاء: علي ذكر الموضوع هادي في مراة امبكري جت تسأل اعليك
اني: منهيا
علاء احكالي الي صار
اني: تو كان تبيني اتجي مرة تانية.. خلونا في المهم اني توا بنمشي وانتم اقعدو اهني وردو بالكم علي وائل وسجود والصغار والحوش ردو بالكم اني متاكدة الكلبة هديكا بترجع ووائل دور علي وراقي تثبت انه الحوش لي بوي واحني الوارثين الوحدين الي بعده وكان فيه وصية المهم دور علي ورقة ثتبت انه حوشنا
وائل: تمام
الولاد: مستيحل انخلوك بروحك
اني: مش مستعدة نخسركم خليكم اهني
الولاد: واحني مش مستعدين نسخروك
اني: متخلونيش انعيط اعليكم
محمد: اي عيطي خلي نسمعو صوتك استحشناه
فارس ضرب محمد
محمد: اختي
فارس: اختك من حليب البقرة
محمد: حتي انته كانت اختك 😒
فارس: في فرق
محمد:باللهي اسكت اعليا
اني: خلاص اسكتو الزح خيركم
فارس: رجلي علي رجلك
الولاد: حتي احني
وائل: حتي اني
اني: منبيش انعاود كلامي خلاص اني بس بنمشي وتمت
ونضت اخديت مفتاح سيارتي وامشيت للمقر خشيت دوشت واني نبكي طلعت جففت شعري و لبست سروال ابيض وبلوزة بيضاء ووشاح اسود وسبيدرو اسود
طلعت برا
امشيت الي يزن واحمد ورفعت معاي كراسة وقعدت نكتبلهم فيها وهما يتكملو معاي
اني: السلام عليكم
احمد وقف: وعليكم السلام
يزن: وعليكم السلام
اني: شني اديرو اهني
احمد: قلتي تبينا نخدمو معاك جينا هني
اني: جهزو روحكم وقت الخدمة توا
يزن: شني بنخدمو
اني: احمد قداش واحد من تجار الحشيش تعرفهم وتتعامل معاهم
احمد: نعرف زوز بس رؤس كبار ونعرف 5 يبيعو فيه بس لكن الاتنين ايجيبو فيه
اني: تعرف المقر متاعهم وين
احمد: واحد بس التاني منعرفش
اني: تم توا تكلم الي متعرفش وين مقره اتقوله تتلاقي انته وياه في مكان ع الساس بتشري منه الحشيش الي عنده في المقر كله توا كلمه وتفاهمو وقولي وين المكان به
احمد: تم
اني: يزن مزال خدمتك
يزن: تمام
امشيت وكتبت في الكراسة تعالو اجتماع واعطيتها الي واحد من الحراس
الحارس: تعالو بسرعة اجتماع
5 دقايق وكانو الكل قدامي
وقف احمد ويزن جنبي واني نكتب ونعطي فيهم يقرو
احمد: جهزو روحكم وجهزو السلاح بنطلعو مداهمة منبيش ولا غلطة وجهزو سياراتكم عندكم ربع ساعة بس اتجهزو فيها روحكم وبسرعة ربع ساعة وكل ايكون تمام وبنطلعو
كلهم: تم ودارو التحية وامشو يجهزو في روحهم
اني فتحت باب مخزن عندي واخديت زوز واقي رصاص واعطيت الي احمد ويزن
احمد: وانتي
اني هزيت براسي لا
احمد: اعلاش لا
اني اعطيتهم بيكا الزوز واخديت كلاشن حطيته علي كتفي والبلجيكي متاعي في حزام الاسلحة الي لبسته علي كتافي وبيكا في يدي
يزن: هلبا اعليك هكي
اني درت بيدي وراي طلعو وصقرت المخزن وامشيت اقعدت نستنا فيهم يجهزو
جهزو روحهم كلهم ووقفو قدامي
كانو في سيارات مصفحات وكلهم لابسين واقي رصاص وكلهم شادين سلاحتهم الي بيكا والي كلاشن وكلهم عندهم بلجيكي مع السلاح متاعهم وكلهم لابسين عسكري وعلم ليبيا فوق السيارات
اني كتبت الخطة
احمد: الخطة كلكم بتوقفو بعيد مع يزن وتستنو اشارة مني وبنمشي اني واحمد بس ع الساس بنديرو الصفقة والاشارة امنين انقول تمام انتم تهجمو وتشدوهم كلهم الي متواجدين في المكان ونبي هجوم من غير ضرب رصاص حاولو اتشدوهم من غير مايرمو اعليكم رصاص ولا ايفيقو بيكم ولو اضطر الامر ارمو اعليهم لكن منبيش ولا واحد يهرب تمام
كلهم: تمام
اني درت بيدي هيا وركبت سيارتي وكلهم ركبو سيارتهم كل 4 في سيارة
طلعنا من المقر اكثر من 250 سيارة
وامشينا وصلنا درست ودرسو كلهم سياراتهم اخديت المنظار شبحت القيت تاجر الحشيش مدرس سيارته ومعاه جماعة مفيش حد معاهم غير هما بس
اني اشرت علي اليمين واشرت علي اليسار امشو مجموعة جيهة اليمين ومجموعة جيهة اليسار
احمد: مجموعة من الخلف
ركبو سيارتهم وامشو
احمد: مجموعة تقعد معاك يايزن وكان سمعت وداد في التلفون قالت الاشارة اعطي اوامر بالهجوم من جميع الجهات تم
يزن: تم
ركبت سيارتي اني واحمد وخلينا الاسلحة فيها نزلنا بي بلجيكي بس
احمد: اهلين ياوحش
الوحش: اهلين بي احمد وين ليك وحشة
احمد: ليك اكثر
الوحش: عرفنا
احمد: كيف ماتعرفش وداد
الوحش: نورتينا ياوداد.. جبتلك الحشيش الي عندي في المقر كله ومزال فيه بضاعة جاية بعد اسبوع
احمد: تم فلوسك واتيات
اني ابتسمت
احمد: شني الأنواع الي فيها
الوحش: جميع الانواع الي يعجبك تلقاه
اني اذكرت اني منقدرش نتكلم درت الي احمد بيدي 👍
احمد: تمام
يزن اذكر انه منقدرش نتكلم وسمع احمد قال تمام اعطي امر بالهجوم
وحاصروهم وشدوهم طول من غير حتي مقاومة
يزن جي شدني اني واحمد: واخيرا شديناكم
الوحش: كيف صار
احمد: ارخي ارخي
يزن: احني البحث الجنائي
اني ابتسمت طلع ذكي يزن هادا
ربطوهم بالحبل وكعمزوهم مع بعض ودارو اعليهم دائرة واحني معاهم وجي ضرار هوا والشرطة وقاموهم كلهم
يزن: خليهم هادم الزوز نبيهم
ضرار: تم
رفعوهم ويزن فك الحبل متاعي اني واحمد وهوا فرحان
اني كتبت: منور يزن شكرا علي الذكاء واحسن حاجة درتها انك ربطنا معاهم بش مايشكوش فينا
يزن: تعلمته منك هادا كله
اني ابتسمت وكلهم جو
اني كتبت واحمد يقرا
احمد: توا بنمشو انهدو علي مقر تاجر حشيش رأس كبير وردو بالكم لانه مداهمة واكيد بتصير رماية الرصاص البسو الواقي ونبي قناصات يحمونا وتحاصرو المكان كله ومنبيش ولا شخص يهرب ولا يخش حتي الاكسجين لا والقناصات اهم حاجة
كلهم: تم
احمد: ردو بالكم علي روحكم ومنبيش لاجرحى لاقتلى
كلهم: تمام سيدتي
ودارو التحية وركبو سياراتهم وامشو
وصلنا غادي ونزلنا لبسنا اللتام كلنا وركبو القناصين فوق مباني عالية جنب المقر وحاصرو المكان كلهم واعطيتهم اشارة بالهجوم
____________________________
شني رايكم في الحلقة اعطوني رايكم في التعليقات
وصوتو للرواية وتفاعلو كويس
وشني تتوقعو حيصير من جديد والغاز الرواية بالشوية بالشوية تبان وتتطلع
مع السلامة 💖
للكاتبة: لولو حبيب ❤