مروان يهمس بحب وحنين فى أذنها : مكنتش أعرف أن شعرك جميل اوى كده ... ومكنتش أعرف أنك بتوحشينى ومقدرش استغنى عنك كده ...نور أنا بحبك..
نور بحب : مروان انت بتتكلم جد؟
مروان بهمس: بتكلم بجد اكتر من اى وقت عدى .
نور تلتفت إليه : إيه ده مروان انت شربت ايه؟
مروان: شربت كاسين عشان أنسي حبك وازاى حبك يتنسي وانا مرتويه !
نور: انت مش عارف أنه حرام يامروان ؟
مروان: اللى اعرفه ان حرام عذاب الحب اللى احنا فيه ده.
نور:؛ انت اللى معذبنا يامروان.
مروان بهمس: طيب تيجى أصالحك؟
نور بخجل: لا أنت هتنام دلوقتي ونتكلم ف الموضوع ده الصبح مش عايزاك تعمل حاجة وتندم عليها....
تصبح على خير.
* فى صباح يوم جديد، نور تضع الفطور على المائدة *
استيقظ مروان: اااه صباح الخير...دماغى مصدعة اوى
نور: صباح النور ...عملتلك كوباية قهوة اشربها والصداع هيروح.
مروان: دايما فهمانى قبل مااتكلم وبتدورى على علاج ليا .
نور: مروان !
مروان يترك القهوة : هااا فقرة الأسئلة
نور: يعنى ايه حب؟!
مروان بحب: الحب إنك تشوفى اللى بتحبيه مبسوط، تشوفيه بخير دايما، حتى لو الخير ده بالبعد عنه! الحب شغف مبينتهيش لرؤية عيون الحبيب...الحب انى احافظ على اللى بحبهم حتى من نفسي ولو هتأذى مش مهم المهم راحة اللى بحبه....الحب تضحية يانور!
نور بهدوء:طيب هو الحب وحش؟
مروان: الحب ده أحلى حاجة ف الدنيا ... مينفعش تتبنى اى علاقة مهما أن كانت سواء إخوة أو صداقة أو جواز من غير حب ! حتى العالم كله ينهار من غير حب...الحب هو اللى بيقوى العلاقات ويخلينا مكملين للأخر...الحب هو اللى بيقوينا ف اوقات ضعفنا، كفاية ان يكون جنبى حد لما الدنيا تضيق عليا اجرى عليه ويستقبلنى بحزنى وتراكماتى بصدر رحب....نظرة العيون من اللى بحبهم وقت لما تتهز ثقتى ف نفسي بترجع ثقتى من جديد...ده غير انى لما ببقى معنديش قوة اكمل اللى بحبهم يمسكوا ف ايدى ويحاربوا معايا...الحب مشاركة اهو على الاقل مبحاربش لوحدي! الحب بيطمنا واحنا خايفين يانور.
نور: طيب وليه اللى بيحبوا بيهربوا من الحب؟
مروان: ليهم ظروفهم الخاصة.
نور: زى ايه؟
مروان: خايفين مثلاً
نور: هو اللى بيحب بيخاف مش انت لسه قايل إن الحب بيطمن.؟
مروان بهدوء ممزوج بحزن: بيطمن اه بس فى خوف! انا ك حد بيحب لازم اخاف...خايف اخسر اللى بحبه خايف أأذيه من غير قصد، خايف اعذبه، خايف اديله حب ويكون قليل، خايف مكنش استاهل الحب ده! لو بنحب لازم نخاف من خسارة اللى بنحبهم يانور..ماقولتلك الحب تضحية!
نور بحب: وانا عمرى ماشوفت سعادتى مع حد غيرك انا عارفة انك بتحبنى وبتعاند بس انا بعترفلك يامروان انى بحبك...مش هرتاح غير معاك!
* فى هذه اللحظة رن هاتف مروان *
نور: مين اللي بيرن..اكيد بابا كان عايز يكلمك...
مروان: دى مريم!
نور بدهشة: مروان لا...متردش.. اكيد مش هترد صح؟
مروان: مضطر ارد..
مريم: وحشتنى!
مروان: اظن ان ملهوش لزوم الكلام ده احنا كل شئ مابينا انتهى..
مريم: لا منتهاش...انا كنت غبية وعرفت غلطى، انا جيتلك لحد هنا يامروان عشان اعتذرلك واقولك انى بحبك.
مروان: جيتى هنا ازاى مش فاهم!
مريم: انا منتظراك ف مطعم الاوتيل تقدر تنزل ونتفاهم..
مروان: طيب انا جاى حالا.
نور: أكيد مش هتنزل صح؟
مروان: مظطر انزل مينفعش اسيبها لوحدها دى جت لحد هنا عشان تصالحنى!
نور ببكاء: يامروان وانا هتسيبنى لوحدي؟
ثم امسكت بيديه: متسبنيش يامروان انا بحبك متسبنيش..
مروان يزيح يديها عنه: متعيطيش يانور انا مش هسيبك واسافر يعنى انا هنزل اقابلها بس..
نور ببكاء: يامروان عشان خاطري...مروان..
* تركها تبكى وذهب إلى مريم *
مروان ل مريم: ممكن افهم ايه سبب وجودك هنا؟
مريم تحاول احتضانه: وحشتنى ياحبيبي
ولكن مروان يبتعد: انا عايز افهم سبب وجودك هنا!
مريم: تبقى انت لسه زعلان منى...صالحنى بقى ميبقاش قلبك أسود يابيبي.
مروان: انتى مدركة انك دلوقتي بتتكلمي مع واحد متجوز وف شهر العسل ولا لا؟
مريم: عارفه انك عملت كده عشان تعاقبنى.
مروان: لا انتى غلطانه انا عملت كده عشان بحب نور انما مفيش اى حاجه ف الموضوع تخصك لأنى نسيتك خلاص!
مريم: مش بالسهولة دى تنسانى..
مروان: لا بالسهولة دى عارفه ليه عشان انا محبتكيش...محبتش غير نور ولا هحب حد غيرها.
مريم بضيق: متقولش كده يامروان احنا بنحب بعض...
مروان ضاحكا: لا متقوليش انتى صدقتى الموضوع ولا ايه! انا وانتى اكتر ناس عارفين اننا محبناش بعض... تعرفى ايه انتى عن الحب تقدرى تعملى ايه عشانى ولا اى حاجه عارفه ليه عشان محبتنيش الموضوع كله كان انانية منك عشان الهانم لما بتحتاج حاجه لازم تجيلها حتى لو هتحطها ع الرف المهم ان محدش غيرها يااخدها مش كده!
مريم: لا انت فاهم غلط انا اقدر اعمل اى حاجه عشانك حتى عندى استعداد نتجوز فورا اول ماتطلقها.
مروان يصفق: لا برافو انجاز عظيم اوى...الهانم هتضحى عشان تتجوزنى ومش كده وبس لا بعد مااطلق نور مراتى حبيبتي...مين قالك انى هطلقها مفيش اى قوة ف الدنيا تبعد نور عنى..
مريم:-أنت مش شايف أنها مش جميلة؟ وانى انا احلى منها؟ متمسك بيها ليه!
مروان: لا، بالعكس دى هى اجمل واحلى منك مليون مرة هى احلى من الكل ف قلبى انا، يكفي أن روحها حلوة ، وقلبها فيه كل نقاء الدنيا، هادية بشكل مش طبيعى، بتتصرف بعفوية مطلقة ومتعرفش التلون او التصنع.
وأما عن جمالها فقواي القلبية مفتونة بيها من المرة الأولى اللى شوفتها بتضحك فيها، جميلة لدرجة تخلينى أكتب عنها سنين وسنين فى سبيل وصفها ، ولكن ف الأخر أعجز عن وصفها!، حتى ان ضحكتها جميلة بطريقة ملفتة!
مريم بضيق: بس هى مليانة بالعيوب!
مروان: وانتى مالك ؟! رغم عيوبها هتفضل حبيبتي وهتفضل هي الأجمل، فاكر أول مرة شوفتها عدت من قدامى بتضحك بلبسها الواسع، اتمنيت وقتها لو كانت بتضحكلى انا! ، يمكن انتوا شايفين ملامحها عادية ومش مبهرة! بس انا دايما شايفها مختلفة ومتميزة عن اللى حواليها....هى مش زى كل البنات أبداً، هى عندها قدرة خارقة إسمها خطف القلوب، تخطف قلب اى حد من غير ماتتكلم معاه....ازاى انتى تدعى انها مش جميلة؟! طبعا ما انتى غيرانه منها عشان هى الأجمل انما انا سرحان ودايب ف تفاصيلها...مشوفتيش الغمازة اللى اتحفرت ف خدها اليمين! الغمازة دى تشبه تمامآ الحفرة اللى كانت ف روحي قبل ماهى تيجى وتداويها .💙
مريم: طيب وانا يامروان!
مروان: انتى ايه؟ تقدرى تقوليلى كده تقدرى تستنينى كام سنة وتفضلى بنفس درجة حبك ليا...هه ده لو كنتى بتحبيني يعنى!
مريم: اقدر استناك سنين كتير..
مروان: سنتين؟
مريم: اه عادى.
مروان: عشر سنين؟
مريم: مروان دول كتير اوى!
مروان: بالظبط كدا بعيدا عن انى احط نور ف مقارنة معاكي بس نور استنتنى 15 سنة بالرغم من اللى عملته فيها وبتحبنى زيادة عن كل يوم ده غير انها بتتمنالى الرضا ارضى وتقدر تستنانى اكتر من كده...عشان حبها اقوى من اى حاجه ف الدنيا حتى اقوى منى!
مريم: الظاهر كده ان جرى لدماغك حاجة فى ايه ارجع لعقلك يامروان.
مروان يقف: بالعكس انا لأول مرة ف حياتى احس انى رجعت لعقلى...عن اذنك عشان اطلع اراضي مراتى حبيبتي..واتمنى مشوفكيش تانى.
مريم بضيق: مروان...مش من حقك تسيبني وتمشى كده..مروان...
* لم يعطيها مروان اى اهتمام وذهب ثم أمسكت بهاتفهها *
مريم: اتضحك علينا انا وانت ياحضرة الدكتور..
محمد: ازاى يعنى انا مش فاهم حاجه؟
مريم: يعنى اللى قالك ان جوازهم ع ورق بس كان بياكل بعقلك حلاوة...تعالى شوفهم دلوقتي بيقضوا شهر العسل بكل حب!
محمد بعصبية: انتى اتجننتي ايه اللي بتقوليه ده! انتى فين دلوقتي!
مريم: جيت عشان أثبتلك ان كلام الهانم غلط وانهم عايشين حياتهم وأحنا قاعدين بنعيط عليها!
محمد: وانتى ايه اللى وداكى هناك...تعالى حالا.
مريم: مش همشي من هنا غير ومعايا مروان....مش هسمحلها تتهنى بحبيبي أبداً أنت لو خايف عليها ابعدها من طريقى يامحمد عشان انا مبحبش حد ياخد حاجة بتاعتى..
* فى الجناح الخاص بالعروسين *
مروان بفرحة: نور...حبيبتي..انتى فين!
واخذ يبحث عنها حتى رأها نائمة فوق السرير و تدفن رأسها ف الوسادة..
مروان بإبتسامة: زعلانه منى عشان نزلت...كنت بخلص منها ياستى خلاص مفيش مريم تانى ولا اى حد هيدخل حياتنا...احنا هنعيش ف هدوء
ــ لا يوجد رد من نور.
مروان يرفع رأسها: قومى بقى بلاش دلع..
* فوجد نور فاقدة للوعى والدماء تسيل من انفها *
مروان بصدمة: ايه ده..نور...فوقى يانور...
ثم حملها بين ذراعيْه: متخافيش يانور انا معاكى هوديكى للدكتور حالا متخافيش..
" اخذها مسرعا إلى المستشفى.."
" فى إحدى المطاعم "
محمد بغضب: ممكن أفهم أنتى ناوية على ايه!
مريم: اهلاً بحضرة الدكتور شركي ف القدر التعيس..
محمد بغضب: مريم... عاوز افهم انتى عاوزه تعملى ايه!.
مريم: ههد عش الزوجية ده على دماغ نور...هخليها تحس باللى انا حسيت بيه بسببها.
محمد: اياكى تعملى كده...لو فكرتى مجرد تفكير بس انك تعملى كده تبقى ولا انتى اختى ولا اعرفك..
مريم: انت مغفل وراضي باللى حصلك براحتك انما انا مش هسكت..
محمد بحزن: مين قال انى راضي بس...انا تعبان اوى انتى مش فاهمه يعني ايه يكون حبيبك ف ايد حد تانى وحد تانى هو اللى بيبصله ويشوف ضحكته وحزنه وانتى بعيدة احساس بشع..
مريم: حاسه بيك عشان احنا الاتنين ف نفس الموقف عشان كده بقولك نبقى ايد واحده ونحل الموضوع..
محمد بحزن: مقدرش غصب عنى لازم استسلم للأمر الواقع..
مريم: وليه تستسلم طالما بتحبها اعمل كل حاجه عشان تبقى معاك.
محمد: بالعكس عشان بحبها لازم اشوفها مبسوطه وهى مش هتبقى مبسوطه غير مع مروان..
مريم: مروان بيعذبها على الاقل انت هتخاف عليها..
محمد: هو الحب ايه غير عذاب؟
ولو انا هستحمل عشان هى تتبسط ف الكام يوم اللى هتعيشهم بس..
مريم: تقصد ايه؟
محمد بحزن: مكنش ينفع اقولك بس هقولك يمكن قلبك يحن ومتعمليش حاجه وتسبيها تفرحلها يومين... مريم! الكلام اللي هقوله ده محدش يعرف بيه أبداً..
مريم: قلقتنى بكلامك قولى فى ايه؟
محمد بحزن: نور تعبانه اووي يامريم عندها مرض وحش.. واخر مره شوفت التقارير بتاعتها بتشير انها فاضلها زى شهر او اقل والمرض هيتمكن منها... معرفتش اقنعها تاخد الكيماويّ واخد منها المرض الخبيث ده.. ع الاقل بلاش ناخد ساعدتها وايامها الباقية منها وخليها تعيشهم بأمان.. بالله عليكي سبيها يامريم..
مريم: طيب اهدى انا مش شريره للدرجادي خلاص انا هسكت..
*فى المستشفى.... مروان يجلس ويضع يده على رأسه بحزن ثم يرن هاتفه *
نرمين: اهلا بالعريس اللى نسينا.
مروان بحزن: نرمين... نور تعبت..
نرمين بقلق: تانى! تعبت ازاى؟ ايه اللي حصل!
مروان: معرفش بس انا جيت لاقيتها نايمة على السرير ودافنة وشها ف المخدة بقومها لاقيت مناخيرها بتنزف دم ومش بترد!
نرمين بغضب: اكيد زعلت من حاجه... انت زعلتها يامروان؟
مروان بحزن: للاسف بس صدقيني غصب عنى..
نرمين بغضب: شششش ولا غصب عنك ولا زفت انت غبى وهتفضل طول عمرك غبى بتعذبها حتى وهى معاك.. حس بيها يااخى وخلى عندك دم وفرحها ف اليومين اللي عايشاهم دول هتفضل أعمى كده لحد امتى!
مروان: اليومين اللى عايشاهم؟
نرمين: هو انت متعرفش؟
مروان: معرفش إيه؟
نرمين: لا خلاص طالما نور مقالتش انا مش هقول..
مروان: مخبيين ايه عليا يانرمين!
* فى هذه الاثناء اتى مساعد الطبيب *
الممرض: حضرتك اللى جبت المريضه نور..
مروان يترك الهاتف: ايه انا..هى عاملة ايه دلوقتي؟
الممرض: هى ف العنايه المشددة...بس الدكتور محتاج يتكلم معاك ف مكتبه..
مروان: حاضر انا جاى حالا...
نرمين: نور كويسه يامروان؟
مروان: اه الحمدلله ف العنايه ادعيلها يانرمين..
نرمين: من غير ماتوصينى وصي نفسك الأول وخد بالك منها لحد ماترجعوا بالسلامه وانا هحاسبك على اللى عملته فيها ده!
مروان: انا اللى هشوف الدكتور عاوز ايه بس وهحاسبكم انتوا على اللى انتوا بتخبوه عليا ده!
نرمين: هنبقى نشوف الموضوع ده خد بالك من نور وابقى طمني.
مروان: طيب سلام..
"فى غرفة الطبيب"
الدكتور: تقرب للمريضة بأيه.
مروان بقلق: انا زوجها حضرتك.. هو في ايه!
الدكتور: للاسف مش هنعرف نعمل العملية!
مروان: حضرتك الموضوع مش مستاهل عملية.
الدكتور: والله الاشاعات والتحاليل اللى قدامى بتقول ان من فترة العملية لو كانت اتعملت كان كله هيبقى تمام بس دلوقتي مفيش احتمال 1٪ حتى اننا نعملها..
مروان: هو حضرتك مكبر الموضوع كده ليه! دول كلهم شوية انيميا عشان نور مش بتاكل كويس وكده.
الدكتور: انيميا ايه يااستاذ مش حضرتك تقصد المريضه نور محمد؟.
مروان: ايوة هى..
الدكتور: طيب قدامك اهى الاشاعات بتثبت ان الورم خبيث جدا والكانسر كلها اقل من شهر ويتمكن من جسمها كله!
مروان بصدمة: انت بتقول ايه!؟..
* لحظة صدمة مروان بمرض نور هى هى نفس صدمة واحساس معظمنا لما يتلقى خبر مرض حد بيحبه وكان بيبعده عنه بحجة انه هيكون كده بخير...مع انه كان بايده يكون دواه بقى سبب العلة!
البعد عن الحبيب ده بيبقى أصعب مرض واصعب معركة ممكن تعدى على اى حد! ــ عفانا وعفاكم الله ــ الانسان مبيبقاش عارف يهزم حنينه وشوقه ولا يبذل كل مجهوده عشان يقرب من الانسان اللى بيحبه ولا يحارب الدنيا اللى بتحارب فيه ولا يقف قصاد المرض وكل ده لوحده... ف طبيعى انه هينهزم ف اول معركة وهيموت!
وأظن الانسان لو معاه اللى بيحبه هيواجه كل العك ده بإبتسامه لطيفة حتى لو مفيهوش حته واحدة سليمة..كفاية انه لاقى حد ماسك ايده وبيسنده وواقف ف ضهره..على الاقل مبيحاربش لوحده!
*
💙💙💙💙💙
نهاية الفصل الثالث عشر.
#هدية_قلبى
#بقلمي_هدى_محمود
أنت تقرأ
هدية قلبي
Roman d'amourخُلقتْ التضحية من أجل الحبُ ، وخلق الحب من أجل أن نضحى بأنفسنا لكى يعيش ... لذلك ف الذي يستحق أن يسكن قلبك هو الذي يُشعرنا أن الحياة لا زالت جميلة مهما كانت قاسية، هو الذي يُشعرنا بالأمان مهما بلغت مخاوفنا، هو الذي يستثنينا حتى لو بأبسط الأشياء.... ...
