°•صراعات بحر الحياة•°
♤بقلم: جون سان&وجدان♤
على اثر كلامو دمعو عينيها تنهدات كتحاول تماسك دموعها لكن هيهاااات ثم هيهات محسات بيهم تا هبطو سخان على خدها مارين بشفايفها لي كيترعدو ....ضماتو لصدرها و نطقات بصوت مخنوق طاغي عليه الحزن
ثريا: لا لا اخويا ...فين غتمشي ولمن تخليني .....معامن ندابز وعلامن نغوت ....خويا حبيبي وبابا تاني ....نتا غترجع لداركم براسك مرفوع وانا عمري نخليك مخصوص ....الله يخليك ليا اخويا ....
زادت ضماتو كتر لحضنها وطلقات عنانها للدموعها يتساقطو براحة على خذها ...محسات الا بيديه ضايرين على خسرها ...طبطبات على ضهرو و بعدات عليه شوية كتمسح فدموعها
ثريا: خويا ياسين ...تسنا شوية هنا انا جاية واخا .....
ناضت دخلات للدار ...طلعات نيشان لبيتها لقات زينب كطل عليهوم من الشرجم ودموعها دايزين تنهدات وهزات بزطامها ونطقات كتشوف فزينب
ثريا: زينب يالاه معايا نوصلو خويا عند اشرف ونطمن عليه ونرجعو ....
حركات زينب راسها بايجاب ولاحت عليها كاب خفيف من فوق البيجامة وهبطو بالحس ...لقاو ياسين مزال كالس على حالتو ...سدو الباب بعدما تاكدو بلي هازين السوارت ومشاو مبعدين على الدار فطريق دار اشرف ...
مسافة طريق قليلة وكانو قدام دار اشرف بحكم ساكنين فدرب التاني لي حدا درب ياسين .....دقو الباب وبقاو كيتسناو ...سمعو شي حد هابط من الدروج بعدو شوية على الباب احتراما وحناو راسهوم كيتسناو ...
تفتح الباب وخرج منو اشرف وفيديه الهاتف ديالو شاف فيهم وابتاسم لكن سرعان متلاشات ابتسامتو فاش لمح وجه ياسين لي مضروب ومنفوخ ....قرب لعندو كيسول فيه مالو لكن بدون مجيب ....تنهد وشاف فثريا
اشرف: ختي ثريا ياك لباس
ثريا: اشرف خويا ايبقا معاك واحد المدة ...مهم هو ايشرحلك اش واقع ..عفاك خليه معاك وانا كل نهار غنجي نطل عليه وانجيب اش خاصو واخا ...
اشرف: اختي واش عاد كتوصيني على خويا وصاحبي ...حسبيه فدارهم ومتهزيش الهم انا هو ياسين وياسين هو انا الله اودي كوني هانية
ثريا: شكرا اخويا اشرف ...عفاك فاش طلع عيط ليا على عاليا نهدر معاها......
(عاليا هي خت اشرف الكبيرة مزوجة وعندها بنية فعمرها 3 سنين ساكنة فكازا ولكن جات عند مها تكلس معاها شوية مجرد تعريف بسيط باش تعرفو شكون عاليا)
اشرف: واخا ختي ....طلع اشرف ومعاه ياسين لي هاز ساكادو فضهرو بعدما سلم على ختو ووصاتو على راسو
دقائق وهي تهبط عاليا كتجمع فشعرها الاشقر لابسة بيجامة طويلة ديال الدار بابتسامة على وجها .....وقفات قدام زينب وثريا وسلمات عليهم
عاليا: ثريا لباس اختي كيدايرة مع شي خدمة ...عمي حسن وخالتي حليمة لباس عليهم
ثريا: لباس اختي عاليا الحمد لله ربي يخليك ..احم مهم اختي خويا ايبقا مع اشرف واحد المدة علاما يتحل واحد سوء تفاهم
عاليا: لا اختي كوني هانية ياسين بحال الى فدارهم راه منين كانو صغار وهونا بزوج وحتى اشرف كيجي عندكوم حشومة تقولي هكا كوني هانية اختي وانشاء الله كلشي يتحل
ثريا: انشاء الله اختي ...شكرا وتصبحي على خير
عاليا: ربي معاك احبيبتي ....
طلعات عاليا للدار وثريا وزينب رجعو ادراجهم للدار ديالهم ...دخلو وسدو الباب ....طلعو للغرفتهم وكل وحدة تخشات بلاصتها كيطيبو نعاسهم ....
~~~~~~~~~~~~~~
داز اسبوع بعض العلاقات فيه متوترة وعلى المحك وهنا الكلام على ياسين وباباه لي واخا يتلاقاه فطريق مكيهضرش معاه......وثريا ايضا لي هازا فخاطرها من جيهتو فالاخير كيبقا خوها وسندها بعد باها...كلشي فهاد الدنيا بالمكتاااب علاااقاااات تبدا وعلاقات تهرس كلشي مكتب علينا من عند الله...
فاق بكري قبل صاحبو قاد فراشو وحل صاكادو ديالو وهز حوايجو وشيتة دسنين وبوماض دليطراس لي شرات ليه ختو....هز اتخوس ديالو ودخل لحمام قضا حاجتو بزربة وخرج....لقا اشرف حتا هوا يالله فايق صبح عليه وكلس كيقاد شكارتو حتا نطق اشرف
اشرف: واش غتمشي ليوم لليسي
ياسين هز فيه راسو: اه ضروري را منيمتا وانا مغيب ودروس كيفوتوني
اشرف: اوا صافي را وجهك نيت بدا كيبرا ليك عادي الا مشيتي را كلشي كيسولني عليك وحتا ياسمين ديما كتسولني وكنتهرب
#يتبع🍁
