اهلين كيفكم..
في كلام خاطري اقوله ..
ليش مدري؟!بس الي اعرفه انه كلام وبقوله
في ناس بحياتي سببت لي جرح وانا مسامحهم لكن مستحيل ومن سابع المستحيلات انسى الي سوه
ممكن كثير ناس نفسي..
تدرون ليه؟
لأن هذي دروس جتني بحياتي لسبب اكيد
ليش انساها
لو نسيتها راح اطيح بنفس الخطأ للمره الثانيه
طبعا ما قلت الكلام ألا وانا مجرب
قبل فتره انا انغدرت من شخص بس ما شغل بالي هالشيء
كثر هالسوأل الي شغل بالي
● ليش انعاد ليش انغدرت للمره الثانيه بس في مشكله اني انا ما غلطت لا على الاول ولا على الثاني ؟؟
تعرفون ليش
لأني انا سامحت
لا مو لأني سامحت لأني نسيت الي سواه الشخص الأول وما اخذت حذري من الشخص الثاني
السبب لأنييييي نسيييتتت (سامح بس لا تنسى)
انا غفرت لشخصين
لكن الاول نسيت وش سوى فعشان كذا طحت بالثاني بدون ما انتبه تدريجيا
انت لازم لازم ما تنسى الدروس الي تمر فيها
#لأن الحياه دروس والدنيا تجارب#
غير كذا في شيء ثاني
يا جماعه(○●)
☆ مو سهل
تسكت اذا احد
▪︎جرحك
▪︎اذاك
▪︎غدر فيك
▪︎استغلك .... الخ
☆مو سهل
▪︎تكتم غيضك
▪︎تشوف شخص يغلط عليك او يضايقك وما ودك ترد عليه الأساءه بالأساءه
انا فيني هذي الشغله الشخص اذا جرحني ودي اجرحه
وممكن الأغلب كذا وتجلس بينك وبين نفسك تقول بسوي و بسوي ولو سويت تقول بعد ليتني سويت انا ليش ما رديت كذا انا ليش ما قلت كذا
بس تدرون وقتها وش بيصير انت تنجرف مع هذي الناس الي ما تتسمى
وبكذا تكون نزلت من قدرك كثير كثير
كيف نزلت من قدرك؟؟
انت تكون شخص راقي تمام بس
لما تتجادل مع الي ما يتسمون كذا تكون نزلت نفسك لمستواهم
وحطيت عقلك بعقلهم
وبكذا انت تكون ما انتقمت ولا اخذت ثارك انت وصخت نفسك
كيف وصخت نفسي؟
هذولي الناس الله يكرمكم نعتبرهم زباله
مو الزباله اذا احتكيتوا فيها تتوصخون
هذا الي يصير بالضبط مع الناس هذي توصخون نفسكم
وللأسف للأسف معكم شخص وصخ نفسه بس
وعيت على نفسي ونظفتها من وصاختهم
وعشان كذا اذا انت راقي فلا تنزل نفسك و توصخها
خلك محتفظ بشيئين
اخلاقك
ولسانك
ذولي الأثنين:
يرفعون ناس
وينزلون ناس
وتجنب تجنب اي حوار او نقاش ينزلك لمستواهم
خلوكم صمان بكمان عميان اذا جيتوا تتعاملون مع هذي الناس الزباله
تغلط بدون سبب ،تجرح بدون سبب،تأذي بدون سبب
ارفع نفسك انت كبير ولا تغلط او تتهور وتنزلها
لأنك بتندم لأن هذي الناس بس هدفها واحد
تدرون وش؟
تستفزك تقهرك تخليك تفور وتسب وتشتم
وهم للأسف يسمعون من هنا و يطلعون من هنا
لأنهم ببساطه ناس بدون ضمير ناس عديمه احساس مستعدين يجرحون مره ومرتين وثلاث
وانت بكل مره بتهاوش تسب ترد لهم الي سووه بس
هم هذا الشيء يشحنهم زي البطاريه و يخليهم يزيدون
ويمكن يوقعونك ويحطونك بمواقف تخليك تبرر نفسك
مثلا انت سويت كذا ليش ولا قلت كذا ليش
بس تذكر تذكر مو مجبور تبرر....
اذا انت واثق انك محترم وراقي وما غلطت وكنت رافع نفسك فلا تبرر عمر التبرير لهذي الفئه ما يفيد
ويكفي يكفي انك عارف انت مين وهم مين
انت وين قدرك وهم وين قدرهم
------------------------------------------------------------
وبس والله
تدرون وش اهم شيء؟
هذي رساله وحبيت اوصلها
المشكله مدري لمين بالضبط😅
بس ممكن اعتبرها فضضه محترمه على نصيحه مكس يعني🙃
وبالنسبه للعنوان ابي اي شخص يشوف يعرف من هو سواء كان بنت او ولد تمام
وتصنعون شخصيه لنفسكم بالحياه واهم شيء اهم شيء تكون راقيه
يلا باي يا جميلين😊
