شعور الحب بعد الانتقام

البارت 6

البارت السادس
____شعور الحب بعد الانتقام ____

بقلمي _ سوسه الربيعي _ ،،،،،،،،،،،،،

قريت المكتوب .. كمت اكمز من الفرح ..

واخيرا راح اشوفه واتعرف عليه ..
طول هالاشهر واني متشوقه وافكر بهاليوم واكول شوكت يجي ..

بس منو هو ؟ معقوله كرم .؟؟؟؟.
زين اني ليش فرحانه هلكد .. اني من نفسي مستغربه
زين يجوز فد كمين لو شخص يريد يوكعني بمصيبه ..

بس لا ... لان لو هيج جان اجه بصوره مباشره واتهجم وواجهني مو بهيج اسلوب ..

هسه قابل هي تايهه باجر اروح واشوفه منو ..واخلص من هالشغله المدوختني ..

مااعرف شلون كضيت يومي بسرعه الى ان رحت بفراشي مددت واني افكر باجر شلون راح يكون ..

ثاني يوم ..

رحت للشركه كالعاده دخلت المكتب فتحت الجرار .. ماشفت اي رساله واصله .. استغربت ..

مشه اليوم طبيعي وانور اصلا ماشفته سألت عليه كالو مامداوم ..اظاهر بعده زعلان .

واني بقيت كاعده ع نار واباوع ع الساعه شوكت ينتهي الدوام حته ارجع للبيت واتحضر للموعد ..

مشت الساعات وانتهى الدوام .. رجعت للبيت .. اتغديت شلون ماجان ورحت مددت بغرفتي ..غفيت شويه ..
بعدين كمزت اباوع ع الساعه لكيتها بالخمسه العصر ..

ركضت للحمام .. سبحت وطلعت بالبرنص والمنشفه ع راسي .. وكفت ع الكنتور ..

اممممم شلبس .. طلعت ستره بيج وبنطرون باوعت ع روحي ..

اووي شنو هاللبس قابل رايحه لشركه .. خلي البس شي مفرح ..

طلعت فستان بينصل لونه وردي فاتح لركبه وستره سوده بردن مطرزه بتطريز ذهبي نازك .. كولش حلوه وشيك ..

وكفت ع المرايه شسورت شعري وبقيته محلول ..
امممم زين احط مكياج لو لا ؟
اي اخلي طبعا قابل شخسرانه ..

خليت مكياج بس خفيف وهادئ ..

شفت نفسي اقتنعت بيها .. طولي وجسمي حيل كاعده ويه الملابس ..
بقه الحذاء والجنطه لبستهم وضميت غراضي ..
شلت سويج السياره وطلعت ..

مشيت مسافه الطريق الى ان وصلت للمطعم .. دخلت بقيت اباوع..شلون راح اعرفه .. بقيت محتاره وافكر ..
كعدت واني اباوع بوجوه العالم وكل شخص اشوفه يباوعلي اكول اي احتمال هو هذا صاحب الرساله ..

بقيت كاعده الا ان اشتميت العطر .. وبده يتقرب عليه اكثر واكثر لحد ماسمعت صوت اجه من ورايه ..

__ واخيرا لمار

التفتت حته اعرف منو .. انصدمت شنو ؟؟؟
هاي انت؟ گمت من مكاني مصدومه ..