شعور الحب بعد الانتقام

البارت 7

البارت السابع
،،،،،،،،،،، شعور الحب بعد الانتقام ،،،،،،،،،،،

بقلمي _سوسه الربيعي _

سمير .. بأثناء خروج كرم من الشركه تعرض الحادث كولش قوي سببله فطر بالجمجمه ..

__ شلووووووون ؟ معقوله ؟

__ اي والله ست هو هذا الصار وكل الموظفين حزنو عليه للامانه كرم موظف موهوب ومحبوب من الكل واله احترامه للاسف هيج صار بي ..

گمت افتر واحوص بمكاني مااعرف شسوي وسمير يحجي براسي واني بالي مو يمه .. اخر شي عطت عليه .وكتله يروح ..

بقيت افتر وحايره شنو اسوي اروح للمستشفى لو ابقه شلون .. لا لا اكيد لازم اروح لازم اطمن عليه كلبي مثل النار .

شلت جنطتي بيدي وطلعت رحت ع سمير اخذت عنوان المستشفى الموجود بيها كرم واتوجهت للكراج شغلت سيارتي ومشيت ..

انور .. اجيت للشركه اليوم متاخر طبيت للكراج صفيت السياره وشفت لمار اجتي تركض شغلت سيارتها وطلعت صحت وراها..
لمار لمااااار .. لحظه وين رايحه ..

__اوووو هاي شبيها اشو متمسعني ولا حته انتبهت وشافتني واكف ..
معقوله اكو شي ؟ قلقت حيل شغلت سيارتي وتبعتها ..

شفتها وصلت يم مستشفى صفت سيارتها ونزلت ..

لمار .. مشيت سرعه الى ان وصلت نزلت ركض اتوجهت للاستعلامات سألت الموظفه . عن غرفه كرم ودلتني عليها

مشيت بالممرات ادور الى ان ليكت الغرفه دخلت شفت كرم امدد اكبالي نايم وراسه ملفوف بشاش ابيض ومغمض عيونه وبصفه مره تبجي عليه ..

دخلت بدون شعور تلقائيا شمرت روحي يمه وابجي

__ كرم شبيك كرم اكعد الله يخليك

بقيت ابجي واحجي الى ان حس عليه شويه وفتح عيونه مد ايده ومسح راسي وكال .

__ لمار هاي انتي .. لمار حبيبتي

__ اي اني جيت يمك كرم .. اني اسفه تركتك وحدك .. اني السبب الخلاك هيج تصير ..

بقه يمسح ع راسي ومغمض عيونه وهاي المره كاعده تريد تاكلني اكل بعيونها .. حجت

__ انتي منو حبيبه ؟
حسيت ع روحي وانتبهت كمت من مكاني مسحت دموعي ووكفت وحجيت

__ اسفه بس من قلقي ع كرم ما لاحظت وجودج اني لمار مديره الشركه اليشتغل بيها كرم

__ هلا بيج خاله .. اني اصير ام كرم

__ اهلا وسهلا .. كرم حيل عزيز علينه واله مكانه خاصه بالشركه موظف موهوب واله احترامه من الكل .. الف الحمدلله ع سلامته ..

__ الله يسلمج ويحفظج بنيتي

دنحجي ودخلت علينه بنيه متوسطه العمر حاطه عبايه ع راسها هيج شامرتها شمر وكايده طفل بيدها يطلع عمره 3 سنوات او اكثر .. تبجي وتعيط وتصيح يمه اخوي شبي .. يمه كلبي اخويه .