ﻣﻨﻘﻮﻟﺔ
ﺍﻟﺤﻠﻘﻪ 4
# ﻟﺮﺑﻤﺎ
~~~~~~~~~~ ~~~~~~~~
ﻓﻲ ﺣﻮﺷﻨﺎ ﺍﻭﻝ ﻣﺎﻋﻄﺎﻧﻲ ﺍﻟﻜﻴﺲ ﻣﺸﻴﺖ ﻧﺠﺮﻱ ﻟﻠﺪﺍﺭ ﻭﺍﻟﺒﻨﺎﺕ ﻟﻬﻴﺎﺕ ﻣﺎﺷﺎﻓﻨﻴﺶ ﻭﺻﻜﺮﺕ ﺍﻟﺪﺍﺭ ﻭﻓﺘﺤﺖ ﺍﻟﻜﻴﺲ ﺍﻟﻘﻴﺖ ﻓﻴﻬﺎ ﺷﻜﻼﻃﻪ ﻛﺒﻴﺮﻩ ﺍﻭﻝ ﻣﺮﻩ ﺍﻧﺸﻮﻓﻬﺎ ﻭﺳﺒﻴﺪﺭﻭ ﺍﺣﻤﺮ ( ﺯﻱ ﺍﻟﺼﻮﺭﻩ )
ﺍﻧﺎ ﻓﺘﺤﺖ ﺍﻟﺒﺎﺏ
ﻋﻮﻳﺸﻪ ﺭﺟﺎﺀ ﺍﻣﻴﺮﻩ ﺗﻌﺎﻟﻦ ﺑﺴﺮﻋﻪ
ﺟﻨﻲ ﻳﺠﺎﺭﻥ
ﺍﻧﺎ : ﺷﻮﻓﻦ ﺷﻦ ﺟﺎﺑﻠﻲ
ﺍﻣﻴﺮﻩ : ﺗﺠﻨﻦ ﺧﻴﺎﺍﺍﺍﻝ
ﻋﺎﺋﺸﻪ : ﻣﺎﺷﺎﺀ ﺍﻟﻠﻪ ﺗﺒﻴﺪﻳﻬﺎ ﺑﺎﻟﻬﻨﺎﺀ
ﺭﺟﺎﺀ : ﻛﺎﻥ ﺗﻮﺍ ﻫﻜﻲ ﻳﺸﺮﻳﻠﻚ ﻣﻌﻨﺎﻫﺎ ﺑﻌﺪ ﺍﻟﺰﻭﺍﺝ ﺷﻦ
ﺍﻧﺎ : ﺧﻤﺴﻪ ﻓﻲ ﻋﻴﻮﻧﻚ ﻗﺎﻟﻲ ﻛﺎﻥ ﻣﺎﺟﺘﺶ ﺟﻴﺒﻴﻬﺎ
ﺭﺟﺎﺀ : ﺗﻌﺎﻟﻦ ﺍﻧﺒﺨﺮﻭ ﺍﻟﺠﺎﺭﺍﺕ ﺟﻴﺎﺕ ﺑﻌﺪﻳﻦ ﻭﺍﻧﺘﻲ ﺍﻟﺒﺴﻲ ﺗﻮﺗﻪ ﻫﻮﺍ ﻭﺳﻘﻤﻲ ﺭﻭﺣﻚ ﺍﻟﻌﻘﺮﺑﻪ ﺭﻳﻨﺎﺱ ﺟﺎﻳﻪ
ﺍﻧﺎ : ﺣﺎﺿﺮ ﺑﺲ ﺍﻧﻠﻢ ﺍﻟﺪﺍﺭ
ﺍﻣﻴﺮﻩ : ﺑﺎﻫﻲ
ﻟﻤﻴﻨﺎ ﻭﺑﻌﺪ ﺍﻟﻌﺼﺮ ﺟﻦ ﺍﻟﺠﺎﺭﺍﺕ ﻛﻠﻬﻦ ﺍﺳﺘﻘﺒﻠﺘﻬﻦ
ﺍﻡ ﺭﻳﻨﺎﺱ ( ﻛﺮﻳﻤﻪ ) : ﻣﺐﺭﻭﻙ ﻣﺒﺮﻭﻙ ﻳﺎﺑﻨﻴﺘﻲ
ﺍﻧﺎ : ﺍﻟﻠﻪ ﻳﺒﺎﺭﻙ ﻓﻴﻚ ﺗﻔﻀﻠﻲ
ﺭﻳﻨﺎﺱ : ﺍﻫﻼ ( ﻣﻦ ﻏﻴﺮ ﻧﻴﻪ )
ﺍﻧﺎ : ﺍﻫﻠﻴﻦ ﺷﺨﺒﺎﺭﻙ
ﺭﻳﻨﺎﺱ : ﻓﻲ ﻋﺰ ﻭﻫﻨﺎﺀ ﻛﻴﻒ ﺑﻴﻜﻮﻧﻦ ﺍﺧﺒﺎﺭﻱ ﻳﻌﻨﻲ
ﺍﻧﺎ : ﺩﻭﻡ ﺍﻧﺸﺎﺀ ﺍﻟﻠﻪ
ﺭﻳﻨﺎﺱ : ﺍﻧﺸﺎﺀ ﺍﻟﻠﻪ
ﻭﺧﺸﻦ ﻭﺿﻴﻔﻨﺎﻫﻢ ﺍﻟﻘﻬﻮﻩ ﻭﺑﻜﻼﻭﻩ ﺟﺎﻳﺒﻬﺎ ﻣﺤﻤﺪ ﻟﻤﺎ ﺟﺎ ﻳﺨﻄﺐ ﻓﻴﺎ ﺍﻭﻝ ﻣﺮﻩ
ﺭﻳﻨﺎﺱ : ﻧﻮﺭﺍﻥ ﻣﻨﻮ ﺍﻟﻠﻲ ﻣﻨﺎﺳﺒﻜﻢ
ﺍﻧﺎ : ﻣﺤﻤﺪ ﺍﻝ ……
ﺭﻳﻨﺎﺱ : ﻭﺷﻦ ﻳﺸﺘﻐﻞ
ﺍﻧﺎ : ﺩﻛﺘﻮﺭ ﺟﺮﺍﺣﻪ
ﻋﻤﺘﻲ ﺳﺎﻟﻤﻪ ( ﺟﺎﺭﺗﻨﺎ ) : ﻡﻋﺮﻭﻑ ﺩﻛﺘﻮﺭ ﻣﺤﻤﺪ ﺍﻝ ……… ﻫﻮﺍ ﺍﻟﻠﻲ ﺩﺍﺭ ﻟﻌﻤﻚ ﺍﻟﻌﻤﻠﻴﻪ ﻫﻀﺎ ﻳﺠﻮﻟﻪ ﻣﻦ ﺑﻨﻐﺎﺯﻱ ﻣﺎﺷﺎﺀ ﺍﻟﻠﻪ ﻋﻠﻴﻪ
ﺭﻳﻨﺎﺱ : ﺍﻫﺎ ﻣﻄﻠﻖ ﻫﻮﺍ ﺻﺢ
ﺍﻧﺎ : ﺍﻫﺎ ﻣﻄﻠﻖ
ﺭﻳﻨﺎﺱ : ﺣﺘﻰ ﺍﻧﺎ ﻗﻠﺘﻬﺎ ﺩﻛﺘﻮﺭ ﻣﺸﻬﻮﺭ ﺷﻦ ﺟﻴﺒﻪ ﻟﻜﻲ ﻟﻴﻜﻮﻥ ﻋﻼﻗﻪ ﺑﺲ
ﺍﻧﺎ : ﻫﻪ ﻋﻼﻗﻪ ﻻﻻ ﻣﺶ ﻋﻼﻗﻪ ﺭﻭﺍﺩﻩ ﺟﺎﻃﻠﺒﻨﻲ ﻣﻦ ﺑﺎﺑﺎ ﻭﻭﺍﻓﻘﺖ
ﺭﻳﻨﺎﺱ : ﺍﻫﺎﺍﺍﺍ ﺳﻴﺎﺭﺗﻪ ﺗﺠﻨﻦ ﺷﻔﺘﻚ ﺍﻣﺒﺪﺭﻱ ﻣﻌﺎﻩ ﻓﻲ ﺟﻨﺎﻧﻜﻢ
ﺍﻧﺎ : ﺍﻫﺎ ﻋﺎﺭﻓﻪ ﻛﺎﻥ ﻣﻊ ﻋﺒﺪﺍﻟﻠﻪ ﻭﺑﻌﺪﻫﺎ ﻛﻠﻤﻨﻲ
ﺭﻳﻨﺎﺱ : ﺍﻟﻠﻪ ﻳﺎﻟﺰﻣﻦ ﻳﺎﻧﺪﻯ ﻧﺎﺱ ﺗﺎﺧﺾ ﺩﻛﺘﻮﺭ ﻭﻧﺎﺱ ﺗﻤﺺ ﻓﻲ ﺍﻟﻠﻴﻢ
ﺍﻧﺎ : ﻣﺶ ﻛﻞ ﺣﺎﺟﻪ ﻗﺮﺍﻳﻪ ﻭﻃﻠﻌﻪ ﻭﺧﺸﻪ ﺍﻟﻤﻬﻢ ﺍﻟﻨﻴﻪ ﺭﺑﻲ ﻳﻌﻄﻲ ﻛﻞ ﻭﺍﺣﺪ ﻋﻠﻲ ﻗﺼﺎﺩ ﻧﻴﺘﻪ
ﺭﻳﻨﺎﺱ :
ﻭﻣﺸﻮ ﺭﻭﺣﻮ ﻭﺑﻌﺪ ﺍﻟﻤﻐﺮﺏ ﺟﺎ ﺑﺎﺑﺎ ﻭﻗﻌﻤﺰ ﻓﻲ ﺍﻟﺼﺎﻟﻪ ﻫﻮﺍ ﻭﺧﻮﺍﺗﻲ ﻭﻣﺎﻣﺎ ﻭﻋﺒﺪﺍﻟﻠﻪ ﻭﺍﻧﺎ ﻛﻨﺖ ﻓﻲ ﺍﻟﻜﻮﺟﻴﻨﻪ
ﺑﺎﺑﺎ : ﻧﻮﺭﺍﻥ ﻧﻮﺭﺍﺍﺍﻥ ﻧﻮﺭﺍﻥ
ﺍﻧﺎ ﺳﻴﺒﺖ ﺍﻟﻠﻲ ﻓﻲ ﻳﺪﻱ ﻭﺟﻴﺘﻪ : ﻧﻌﻢ
ﺑﺎﺑﺎ : ﺍﻟﺮﺍﺟﻞ ﻗﺎﻝ ﺍﻻﺣﺪ ﺍﻟﺠﺎﻱ ﺑﻴﻘﺮﻯ ﺍﻟﻔﺎﺗﺤﻪ ﻭﺑﻌﺪﻫﺎ ﺑﻴﻄﻠﻊ ﺍﻟﻔﺮﺡ ﺑﺴﺮﻋﻪ ﻻﻧﻪ ﻭﺍﺗﻲ
ﺍﻧﺎ : ﻳﻌﻨﻲ ﺑﻌﺪ ﻳﻮﻣﻴﻦ
ﺑﺎﺑﺎ : ﻻﻻ ﺍﻟﻠﻲ ﺑﻌﺪﻩ ﻳﻌﻨﻲ ﻣﺶ ﺍﻻﺳﺒﻮﻉ ﺍﻟﺠﺎﻱ ﺍﻟﻠﻲ ﺑﻌﺪﻩ ﻭﻳﻮﻡ ﺍﻻﺭﺑﻊ ﺍﻟﺠﺎﻱ ﺍﻟﺒﻴﺎﻥ ﻭﺑﻜﺮﻩ ﺟﺎﻱ ﻳﺘﻔﻖ ﻧﺒﻴﻚ ﺍﻧﺘﻲ ﻭﻋﺒﺪﺍﻟﻠﻪ
ﺍﻧﺎ : ﺑﺲ ﺑﺎﺑﺎ ﺍﻧﺎ ﻣﺶ ﺍﻣﻮﺗﻴﻪ ﺷﻲ
ﺑﺎﺑﺎ : ﻭﺷﻦ ﺗﺒﻲ ﺍﺗﻮﺗﻲ ﺗﻤﺸﻲ ﺣﺘﻰ ﺑﻌﺒﺎﻳﺘﻚ
ﺍﻧﺎ : ﺣﺎﺿﺮ
ﻭﺧﺸﻴﺖ ﻟﻠﺪﺍﺭ ﻉ ﺍﻟﻔﺮﺍﺵ ﻭﻧﺒﻜﻲ ﻓﻲ ﺑﻜﻲ ﺑﺎﻟﻌﺒﺮﻩ ﻳﻌﻨﻲ ﻧﺎﺑﻨﺖ ﺯﻳﻲ ﺯﻱ ﺍﻱ ﺑﻨﺖ ﻟﻴﺶ ﺑﺎﺑﺎ ﺑﺎﻳﻌﻨﻲ ﻫﻜﻲ ﻧﺤﻨﺎ ﻣﺶ ﺩﺍﻳﺮﺍﺕ ﺣﺎﺟﻪ ﻏﻠﻂ ﺍﻓﻔﻒ ﻳﺎﺭﺑﻲ ﺑﺲ ﻫﻮﺍ ﺷﻜﻠﻪ ﺣﻨﻮﻥ ﻭﻳﺤﻜﻲ ﺑﻬﺪﺍﻭﻩ ﻳﻌﻨﻲ ﺍﻫﻮﻥ ﻋﻠﻴﺎ ﻣﻦ ﺑﺎﺑﺎ ﺍﻫﺨﺨﺨﺦ ﻃﻠﻌﺖ ﺍﻟﺸﻮﻛﻮﻻﻃﻪ ﺍﻟﻠﻲ ﺟﺎﻳﺒﻬﺎ ﻭﺗﻤﻴﺖ ﻧﺎﻛﻞ ﻭﺍﻧﻔﺶ ﻓﻲ ﻏﻠﻲ ﻟﻌﻨﺪ ﻣﺎﻧﻌﺴﺖ ﻭﺭﻗﺪﺕ .
~~~~~~~~~~~~~~~
ﻓﻲ ﺣﻮﺵ ﻣﺤﻤﺪ -:
ﻣﺤﻤﺪ : ﺟﺪﻱ ﺍﻧﺎ ﻛﻠﻤﺖ ﺑﺎﺕ ﺍﻟﺒﻨﺖ ﻭﺑﻜﺮﺍ ﻧﻤﺸﻮ ﻭﻧﺤﻜﻮ ﻣﻌﺎﻫﻢ ﻭﻳﻮﻡ ﺍﻻﺭﺑﻊ ﺍﻟﺒﻴﺎﻥ ﻭﻳﻮﻡ ﺍﻻﺣﺪ ﺍﻟﻠﻲ ﺑﻌﺪﻩ ﺍﻟﻔﺎﺗﺤﻪ ﻭﺑﻌﺪﻩ ﺑﻴﻮﻣﻴﻦ ﺍﻟﻌﺮﺱ
ﺑﺎﺗﻪ : ﻋﻠﻲ ﻛﻴﻔﻚ ﻳﺎﻭﻟﻴﺪﻱ
ﻣﺤﻤﺪ : ﺍﻟﺒﻴﺎﻥ ﻧﺒﻴﻪ ﻛﺒﻴﺮ ﺑﻜﻞ
ﺑﺎﺗﻪ : ﺑﺲ ﻫﻤﺎ ﻧﺎﺱ ﻋﻠﻲ ﻗﺪﻫﻢ ﻳﻌﻨﻲ
ﻣﺤﻤﺪ : ﺑﺎﺗﻲ ﺗﻮﺍ ﺍﻧﺎ ﺍﻧﻤﺪﻟﻬﺎ ﻣﺒﻠﻎ
ﺑﺎﺗﻪ : ﻋﻠﻲ ﻛﻴﻔﻚ
ﺟﻤﻴﻠﻪ ( ﺍﻣﻪ ) : ﻭﺍﻟﻞﻩ ﻛﺎﻥ ﺗﺴﻴﺒﻬﺎ ﻭﺑﻨﺖ ﺧﺎﻟﺘﻚ ﺗﺮﺟﺎ ﻓﻴﻚ ﺧﻴﺮ ﻣﻦ ﻫﺎﻟﺠﺎﻫﻠﻪ
ﻣﺤﻤﺪ : ﺍﻣﻲ ﻣﻌﺶ ﺗﻘﻮﻟﻲ ﻋﻠﻴﻬﺎ ﺟﺎﻫﻠﻪ ﺍﻟﺒﻨﺖ ﻧﺒﻴﻬﺎ ﻭﺧﻼﺹ ﺍﻧﺘﻬﻰ ﺍﻟﻤﻮﺿﻮﻉ
ﺟﻤﻴﻠﻪ : ﺍﺗﻌﻠﻲ ﻓﻲ ﺻﻮﺗﻚ ﻋﻠﻴﺎ ﻋﺸﺎﻧﻬﺎ ﻫﻀﺎ ﻛﻠﻪ ﻗﺒﻞ ﻣﺎﺗﺠﻲ ﻳﺎﺑﺎﻝ ﺗﺠﻲ ﺍﻓﻒ
ﻧﺎﺟﻴﻪ ( ﺣﻨﻬﻢ ) : ﻳﺎﺟﻤﻴﻠﻪ ﻛﻨﻚ ﻣﻊ ﺍﻟﻮﻟﺪ ﻓﻲ ﺍﻻﻭﻝ ﺯﻭﺟﺘﻴﻪ ﻣﻨﺎﺭ ﻏﺼﺐ ﺧﻠﻴﻪ ﻳﺰﻭﺝ ﻫﺬﻱ ﺑﻠﻜﻲ ﺗﺮﻳﺤﻪ
ﺟﻤﻴﻠﻪ : ﻻ ﻭﺍﺧﺮﻯ ﻳﺒﻲ ﻳﺴﻜﻨﻬﺎ ﻓﻲ ﻗﺼﺮ
ﻣﺤﻤﺪ : ﺑﺎﺗﻲ ﺳﻼﻡ ﺍﻧﺎ ﺑﻨﻤﺸﻲ ﻻﻧﻮﺭ ﻭﺑﻜﺮﺍ ﺑﻌﺪ ﺍﻟﻌﺼﺮ
ﺑﺎﺗﻪ : ﺑﺎﻫﻲ ﺑﺎﻱ
ﻭﻃﻠﻊ ﻣﺤﻤﺪ ﻻﻧﻮﺭ
~~~~~~~~~~~~~~~~
ﺍﻟﺘﻔﺎﻋﻞ
ﺗﻮﻗﻌﺎﺗﻜﻢ ﻟﻠﺤﻠﻘﻪ ﺍﻟﺠﺎﻳﻪ
#
