حب مرصع بالاشواك

الفصل العشرون

في صباح يوم جديد ارتدت سما ملابسها وخرجت من غرفتها وقبل ان تخرج من الشقه نادتها خالتها : سما متعرفيش فارس ساب البيت ومشي ليه ؟

ردت بتوتر : معرفش اسأليه

ردت بحده : مانا سألته ومردش عليا قولت اكلمك انتي يمكن تردي

تنهدت بضيق وقالت : طيب انا مستعجله دلوقتي ولما ارجع هنتكلم في الموضوع ده

صفيه : علي راحتك اتفضلي

نزلت من العماره وطلبت سياره عبر الهاتف لتقلها الي المشفي وبعد نصف ساعه وصلت الي هناك ودخلت مباشره الي معمل التحاليل وقامت بعمل تحليل الحمل لتتأكد من شكوكها ثم بعد ان اخذتها اتجهت الي الطبيبه النسائيه في نفس المشفي وانتظرت دورها ودخلت اليها : لو سمحت يادكتور ، انا كنت عايزه اتأكد  ان النتيجه دي صح

نظرت الطبيبه الي التحليل ووجدت ان نتيجته ايجابيه بالفعل فقالت وهي مبتسمه : ده اختبار حمل رقمي كمان بيبقي ادق من العادي انتي ازاي شاكه في كده

ردت بقلق : عارفه بس عايزه اتأكد برضه

الطبيبه : طيب انتي العاده الشهريه بقالها اد ايه مش بتجيلك

سما : حوالي ٣ شهور تقريبا

ردت باندهاش : وده محسسكيش واحد في الميه انك ممكن تكوني حامل مثلا

قالت سما وهي متلجلجه : لا اصل ده كان بيحصلي من زمان فمشكتش خالص ، لو سمحت انا عايزه اتأكد

تنهدت الطبيبه : طيب هعملك سونار

بعد ان صعدت سما علي سرير الكشف وضعت علي بطنها ماده لزجه ثم وضعت جهاز السونار عليه وقالت وهي مبتسمه : دول تؤام كمان

ثم اشارت لها علي الاجنه وقالت : انتي ازاي محستيش بحركه لحد دلوقتي

ردت وهي ترتجف من الصدمه : لا محستش نهائي

الطبيبه : اه ممكن تكون حركتهم خفيفه عشان لسه في الشهر الرابع عموما الشهر اللي جاي حركتهم هتبقي اقوي

بعد ان هندمت ملابسها جلست امام الطبيبه وقالت لها : انا هكتبلك علي فيتامينات وحديد تستمري عليهم لاخر الحمل ... ولو حابه تتابعي معايا تعاليلي بعد ٣ اسابيع

سما : تمام

وبعد ان صافحتها خرجت كالتائهه تتخبط في كل من يمر بجانبها .. كل الدلائل حولها كانت تؤكد لها انها بالفعل حاملا ولكنها تجاهلت ...واكثر مايؤلمها ان يحدث الان في توقيت غير مناسب بالمره في وقت ارادت فيه الهروب من هذه الزيجه حتي ولم يقبل ان يطلق سراحها

        ___________
وعند وصولها الي العماره قبل ان تصعد بالمصعد وجدت اثنان من افراد الامن يضحان بشده وشعرت انهما يتحدثان عنها وان واحدا منهما اشار عليها .. فعادت الي البوابه مره اخري وقالت بعصبيه : انتوا بتضحكوا علي ايه ممكن اعرف ده لو تسمحوا
رد واحدا منهم : والله يا استاذه سما بنتكلم عن واحد صاحبنا عمل موقف يضحك ..
ردت بضيق : بعد كده ياريت تركزوا في شغلكم وبلاش الاستهتار ده