حب مرصع بالاشواك

الفصل الخامس عشر

"قراءه ممتعه "
بعد ان بدلت دهب ملابسها ، لم تجد امها فبحثت عنها في كل مكان ولم تجدها ، فارتدت الخف المنزلي وفتحت الباب لتنزل الشارع وما ان فتحت الباب وجدتها تخرج من شقه عامر ، اصابتها الصدمه ولكنها لم تحرج امها امامه وصمتت حتي تتحدث معها في الشقه وعندما دخلت قالت لها بحده : ممكن تفهميني انتي كنتي عند الراجل ده بتعملي ايه وفي وقت زي ده

ردت عليها متلجلجه : والله يابنتي ماعملت حاجه .. ده انا كنت عامله صنيه بسبوسه ومكلتش منها غير حته فقولت خساره الباقي يبوظ

ردت بعدم اقتناع : طيب عملتي ليه بسبوسه من الاساس طالما مش هتاكلي منها وهتشحتيها

حنان : يوووه هو تحقيق كان نفسي فيها وخلاص ومكلتش كتير عشان بطني وجعتني فجأه
دهب : لا يا امي مش تحقيق ولا حاجه انا بس بسأل ، علي العموم تصبحي علي خير عشان عندي شغل بدري
تنهدت حنان بارتياح وقالت : وانتي من اهله الخير يا قلب امك
           ________
      في صباح اليوم التالي
ذهبت دهب الي عملها كالمعتاد ولكنها كانت في مزاج سئ بسبب ماحدث لها بالامس فبعد ان اصبحت في كامل اناقتها وارتدت فستان سواريه للمره الاولي في عمرها تأتي انسانه حقوده بكل حقد تقطعه لها هكذا وما زاد الامر سوءا مظهرها امام سليم ... دخلت الي المكتب وطلبت كوب من الليمون ليهدئ اعصابها قليلا ومارست عملها ..... وفي منتصف النهار اتت امرأه ثلاثينيه ومعها طفله جميله يبدو عليها من اصحاب متلازمه داون وقالت لها : لو سمحت انا كنت محتاجه استاذ سليم في موضوع مهم جدا هل ينفع ادخله النهارده ولا لا

ردت دهب بابتسامه : حتي لو مش هينفع انا هدخلك يامدام ولاء ، واخبار بنوتك العسل دي ايه

ولاء : اهو الحمد لله تمام
اخرجت دهب من حقيبتها واحده من الشيكولاته واعطتها للطفله وقالت : اتفضلي ياقمر

اخذتها الطفله بلهفه وهي مبتسمه فنظرت لها امها بضيق وقالت : مش نقول شكرا يانور
نظرت الطفله الي دهب وقالت : شكرا يا طنط
قبلتها دهب من وجنتها بقوه وقالت : العفو ياعيون طنط

واثناء ذلك الحديث هبت نسرين ووقفت امامها وقالت بعصبيه : سليم فاضي دلوقتي ادخله
ردت بكل هدوء وهي مبتسمه : لا مش فاضي للاسف وكمان بعد مايخرج اللي جوا هدخل مدام ولاء وبعدين هبقي اقوله انك هنا

نسرين : لا انتي زودتيها اوي ، انتي ازاي تكلميني بالطريقه دي انتي مش عارفه انا مين واقدر اعمل فيكي ايه

ردت ضاحكه : لا عارفه تقدري تعملي ايه ، بس علي فكره مردودالك اصل انا مش بسيب حقي ابدا حتي لو بعد حين

نسرين : اووووف انا غلطانه اني كلمتك اصلا انا هدخله علي طول

سارت نسرين مهروله للمكتب لتفتحه ولكن دهب ركضت ورائها بسرعه ومنعتها وهتفت : بقولك مش هينفع انتي داخله عماره من غير بواب
مسكتها نسرين من زراعها واسقطتها ارضا بقوه حتي ان دهب صرخت بقوه وقالت : الله يخربيتك انتي بتاكلي ايه

عندما سمع سليم الصراخ من الخارج خرج بسرعه اليهم ووجد دهب ملقاه علي الارض فمد لها يده وساعدها علي الوقوف وقال بقلق: ايه اللي وقعك كده