حب مرصع بالاشواك

الفصل الثامن

-صعدت دهب الي منزلها بعدما غادر سليم ، ودقت  علي الباب بنغمتها الخاصه وفتحت لها امها في الحال وقالت لها بقلق:
يا حبيبتي يا بنتي حصل ايه ؟ ورجعتي بدري كده ليه

ردت عليها ضاحكه : بركيلي يا ماما انا اترفدت اترفدت

ثم دخلت غرفتها لتبدل ملابسها وفي اثناء ذلك قالت امها باندهاش : فرحانه عشان اترفدتي ، عوض عليا يارب عوض الصابرين ، انتي يابت اتهبلتي ولا شاربه حاجه

بدلت ملابسها بسرعه وخرجت من غرفتها وامسكت امها من زراعيها واخذت تدور بها وقالت مبتسمه : لا يا امي ولا اتهبلت ولا شاربه حاجه بس هشتغل مع استاذ سليم سكرتيره

ردت عليها بفرحه عارمه: يافرج الله الحمد لله ده انا كنت مضايقه طول ما انتي شغاله في المطعم كان اجهاد عليكي اوي يا حبيبتي

دهب : اطمني بقي  الشغل ده خفيف ومفيهوش ارهاق ، اسيبك انا بقي عشان اتأخرت

ردت حنان باستغراب : اتأخرتي علي ايه يابت انتي لسه جايه اصلا

دهب : اه مانا نسيت اقولك حقك عليا يا حنون ، انا قبضت النهارده ٤ الاف جنيه بحالهم خدي نصهم حلال عليكي والنص التاني هخده انا ، وهجيب لبس ليا عشان يناسب الشغل

حنان: ياحبيبتي يابنتي ، لا خديهم كلهم هي الفلوس اللي هتتبقي هتجبلك ايه دي الاسعار بقيت نار

ردت دهب ضاحكه : متقلقيش عليا ياحنون، انا هنزل الوكاله هجيب من هناك اللبس هناك ماركه ورخيص جدا يعني الف جنيه حلو اوي

ردت حنان باستسلام: طيب يابنتي اعملي اللي يريحك بس خلي بالك من نفسك

قبلت دهب امها علي رأسها وقالت لها : متخفيش عليا يا ست الكل ده انا افوت في الحديد

حنان : روحي يابنتي الهي يريح قلبك ويسهلك الطرق
          ...................
         في اليوم التالي

ركبت دهب اتوبيس النقل العام ، وهي ترتدي بدله كلاسيكيه سوداء اللون وقميص حريري  ابيض وتاركه خصلات شعرها حره علي غير العاده ،وقد كان الركاب ينظرون اليها بانبهار مما زاد من ثقتها بنفسها.....
وبعد قليل نزلت من الاتوبيس بقوه الدفع ثم عدلت ملابسها باناقه وصعدت الي المكتب وعندما دخلت وجدت المكان خالي تماما لا يوجد به سوي سليم فقط فانقبض قلبها وقالت له : صباح الخير يا استاذ سليم

سليم بابتسامه مشرقه: صباح النور يا دهب ، برافو عليكي جيتي في المعاد مظبوط ، وانا بحب اللي بيحترم مواعيده

ردت برهبه : شكرا ، بس هو ليه المكتب فاضي هو النهارده اجازه ولا ايه ؟!

رد مبتسما : لا ولا اجازه ولا حاجه يا ستي بس انا خليتك تيجي قبلهم عشان اقولك شويه تعليمات قبل ما يوصلوا
ثم تابع حديثه بجديه وقال:
تعالي بقي هندخل جوه بدل ما احنا واقفين كده