حب مرصع بالاشواك

الفصل التاسع

" قراءه ممتعه "
في الصباح الباكر استيقظت سما بخمول شديد وهي تشعر انها اخيرا عادت اليها السعاده كما مضي قبل هذا الزواج البائس ، ارتدت خفها وذهبت لتوقظ خالتها وجدتها تتحدث هي وفارس ، كانت ستفتح عليهما الباب قبل ان تسمع جزء من الحديث فقد كانت تقول خالتها :
يافارس انا معرفتش انام طول الليل يابني بفكر في الموضوع

رد بجديه : طيب وايه رأيك

صفيه : انا هكلمك بصراحه يابني سما دي بنت اختي حته مني وزعلت اوي من اللي حصلها بس فرحت انك جبتلها حقها وطردت رشدي وامه الحربايه دي

تنهد فارس وقال: ادخلي في صلب الموضوع علي طول يا امي عايزه تقولي ايه

ردت صفيه متلجلجه: بصراحه انا عايزاك تتجوز بنت تكون انت اول حظها وهي اول حظك ، وسما انشاء الله ربنا هيعوضها خير وهيبعتلها ابن الحلال اللي يستاهلها ، ويكون بنفس ظروفها مطلق او ارمل

وقف فارس وتحدث بعصبيه بطريقه افزعتها وقال: انا بجد مصدوم فيكي يا أمي انتي اللي بتقولي كده اللي هو المفروض  وانتي خالتها وبتقولي كده امال سبتي ايه للاغراب ، بجد ياخساره ان ده تفكيرك

صفيه : لا يابني والله مقصد اللي انت فهمته ده انا عايزه مصلحتك ياحبيبي

فارس بضيق: وانا عارف مصلحتي كويس يا امي وجوازي من سما هو مصلحتي  ، اخر كلمتين هقولهملك يا امي قبل ما انزل عشان اتأخرت علي شغلي انا هتجوز سما حتي لو انتي رافضه يا امي ... لكن لو فكرتي كويس ووافقتي انا هكون اسعد مخلوق علي وجه الارض

ثم قبل يديها وقال : سلام يا امي

ردت بصوت منخفض : الله يسلمك ياحبيبي في حفظ الله

عند انتهاء حديثهم ركضت سما حافيه القدمين الي غرفتها قبل ان يراها احد ، جلست علي سريرها وظلت تبكي بكاء مكتوم وندمت انها تلصصت عليهم من باب الفضول ، وظلت تسأل نفسها لماذا شعرت بالسعاده عندما علمت بطلب فارس الزواج منها وشعرت ايضا بالالم والحزن الشديد عندما علمت موقف خالتها من هذا الزواج ؟!

-لم تفتح لخالتها عندما اتت لتوقظها وتحججت  انها مرهقه وتريد النوم فقط ، وظلت تبكي علي وسادتها حتي غلبها النعاس لتهرب من هذا الواقع المؤلم .
           .............

اتصلت صفيه في وقت الظهيره  بالحج عرفان احد اعمام سما الاكبر وعندما رد عليها قالت له:

ايوه ياحج عرفان اتأخرت ليه ده كله ده انا مكلماك من امبارح وانت قولتلي مش هتتأخر وهتاخد اول قطر هيجي القاهره

عرفان:  ايوه انا علي وصول خلاص كلها ساعتين واكون عنديكم 

صفيه : طيب كويس وانا مستنياك

وبعد وقت ليس بكثير كان قد وصل الحج عرفان الي الشقه القاطنه بها صفيه بعد تساؤلات كثيره ليعرف المكان بالتحديد فهو لم يأتي اليهم من قبل سوي مره واحده عند وفاه والده سما ،
فتحت صفيه له بسرعه وقالت له مبتسمه:
حمد الله علي السلامه ياحج نورت