خيانة حارس المقبرة

الـبـارت الأول

"بغداد"

قمر: اني ام لـ3 بنات عمري 38 سنة ربة منزل ما اشتغل اهلي زوجوني صغيرة وعمري 15 سنة حتى دراستي ماخلوني اهلي اكملها من كد مايخافون عليه تزوجني ابن عمي محمود اللي هو جان ابن عمي وزوجي وحبيبي وكلشي الي بالدنيا..

امي وخالاتي وعماتي جانو كلهم يخافون عليه حيل واني صغيرة لان ع حجيهم جمالي ماله مثيل واليشوفني يكول مو بشر هاي ملاك من السماء
عيوني كبار لونهن ازرك غامق ورموشي طوال سود وشعري بني فاتح طويل ونااعم لاخر ظهري واصل وبشرتي بيضه وصحتي وسط لا ضعيفة ولا سمينة ههههه وخدودي دايما بيهن احمرار وكانما خجلانة من شي بس هنه هيج عادي ههههه اي بس هيج بكل تواضع يعني😂

المهممم وعيت عالدنيا متزوجة من ابن عمي الجان يخاف عليه من الطير الطاير ويحبني ويدللني واني هم بالمثل وخلفت منه 3 بنات ريم الجبيرة وراما الوسطانية و رهف الصغيرة.

محمود: اني محمود عمري 43 صاحب شركة مبيعات وتسويق شغلتنا نفتر عالمحافظات ونروج ونبيع منتجاتنا..
اول ماتزوجت بنت عمي قمر جنت اشتغل وي ابويه بهاي الشركة وتعلمت اساليب الشغل منه وبعد فترة توفى استلمت مكانه بالشغل وطورت الشركة اكثر وامورنه زينة الحمدلله

الله ما كتبلنا غير يكون عندنا 3 بنات فقط لان قمر زوجتي بعد ما جابت بنتي رهف الاخيرة انصابت بنوع من التكلس بالمبايض ومعد تكدر تخلف وماخلينا دكتور بالعراق ما رحناله لكن بدون امل.

مانعرف هي عين صابتهه من الناس لان الكل جان يتعجب ويتغزل بجمال بناتنه وشكد يشبهن امهن وطالعات جميلات وحلوات عليهه او يمكن جسمها ماتحمل او الله اعلم لكن حمدنا الله ع كل حال وقررنا نربي بناتنا ال3 ونهتم بيهن....

قمر: جنه عيله مثل اي عيلة ماتخله حياتنا من المشاكل احيانا بس بشكل عام جنه عيلة مثالية متفاهمين ام واب وبناتهم الحلوات المميزات اللي كل نسوان المنطقة يتمنونهن الولدهم بس اني ماريد اكرر الصار وياي اريدهن يطلعن دارسات وفاهمات ومثقفات وبيدهن شهادة بالمستقبل تفيدهن اذا جار عليهن الزمان لا سمح الله وتدرون الشهادة مثل السلاح بيد المره دايما تفيدها

قمر : بيوم من أيام الربيع فزيت من النوم مرعوبة بنص الليل.. كابوس من اسوأ كوابيس حياتي ماعرفت تفسيرو ولا استرجيت اسأل عن معناه من كد مايخوف ومرعب..

ويكولون الحلم المو زين ميصير تحجي بي المهم ضلت احداثه ابالي بس بعد الصار راح اكلكم شنو حلمت..

الحلم جان اني بمكان واسع مثل صحراء مابي لا طير ولاشجر ومحد وياي لوحدي بيها ودنيا مثل وكت غروب..

وفجاة اصير اسمع اصوات غريبة واحس بالخوف وبثواني تقلب السما سوده اباوع عليها وانها انترست غربان سود تصيح بصوتها البشع بصوت عالي وكل شوي واحد منها يقرب من راسي واحاول ابعدهن..

وفجأة ماحسيت غير بذئب ضخم يطلع من بعيد لونه بني غامق عيونه تجدح شرار وانيابه بارزة ولعابه يسيل من حلكه منظرة مرعب لدرجة خلاني ارجف وماعرف شسوي وبلمح البصر اجاني يركض من بعيد..

وهنا اندرت وصرت اركض بكل سرعتي والتفت وراي وكل شوي يقترب مني جان اسرع مني بهواي حتى وصلني ودفعني من وره رماني بالكاع وصار فوقي

اني هنا جمدت بمكاني تحته انتظر يخلص عليه ويقتلني المنظر رغم انه جان حلم بس حسيته حقيقي حييل عيونه تباوع بعيوني بنظرة حادة مرررعبه ولعابة ظل ينكط على وجهي احس بحرارته واني انتضره ينهي حياتي ويقتلني..

وفجاة عوه وصاح بصوت عالي وداس برجلينه على رجليه وعضني من بطني بقوه غرس بيه انيابه وهنا فزيت من النوم اصرخ وصيح كبل ضليت اباوع على بطني واتلمس المكان اذا بيها شي او اثار للعضه من كد ماتخبلت واني بس ارجف حيل وجسمي ينفض كله وابجي دموعي متوكف كعد زوجي على صياحي وحاول يهديني ويقره عليه قران ويمسح على راسي واني احس فقدت ماحس بأي شي حوالي بس منظر هذاك الذئب والصار ابالي....

          - - - - - - نهاية البارت الأول - - - - - - -

لاتنسونا من التصويت غوالي ..❤️