خيانة حارس المقبرة

الـبـارت الـثـانـي

قمر :
بعد كذا ساعة واني كاعده واحس حالي بعالم ثاني اتذكر المنظر والاحداث الصارت وقلبي يدك بقوه احس اسمع صوت نبضات قلبي تارسه الغرفة من كد ما مرعوبة

وزوجي خطيه ماتركني جابلي مي شربت وظل يمسح ع راسي ويقره عليه قران وبعض الاذكار الدينية لحد ما هديت شوي حضنته وضليت ابجي.

محمود: اسم الله عليج ام ريم ولج كافي شبيج شسويتي بينه اهدي خلاص هذا اني يمج زوجج وحبيبج وانتي بحضني محد يكدر يقرب عليج والله هدي بالج وطمني روحج وتعوذي الشيطان
هذا حلم بس الله يلعنه من حلم طولي بالج واهدي وهسه تروحين تتوضين وتصلين ركعتين تذكرين الله وتجين يمي ماعوفج اني لتخافين شبيج ماعرفج هيج....

قمر: حسيت بأمان من كلامه فعلا هداني وشوي شوي رجعت سيطرت ع روحي واستعاديت وعيي وتعوذت الشيطان وذكرت الله وكمت من فراشي توضيت وصليت ركعتين ودعيت الله يحفظنه من كل سوء
ورجعت ليم زوجي للفراش اللي ماتركني وجان يتجنب يذكرني بالحلم وابد ماسألني عنه بهذيج الليل لان ميريدني اتذكره واني بيني وبين نفسي هم ماردت اذكر منه شي...
اوووف اريد انسى لان من اتذكره جسمي يصير يرجف من الخوف المهم ضلينه نحجي بغير امور لحد مانسيت شوي ورجعنه نمنا للصبح...

صباح اليوم الثاني:

محمود: صح النوم ام عيالي الغالية لج فديت هالعيون الحلوة صدك هنياله اليكعد ويتصبح بهالوجه الحلوو يلا حبيبي صحصحي يكفي نايمة اني كاعد قبلج بهواي وجوعان اريد اتريك من تحت ايديج الحلوات قصدي اني والبنات ههههه

قمر (بعيون نعسانه وصوت ناصي مبين عليها التعب) جنها طالعة من معركة طويلة عريضة وجانت نايمة بعمق :
ههههه ها ها ابو ريم اشو تتغزل بيه اليوم شسالفه ترا احس كبرنه ع هاي السوالف عيب بعدين نصي صوتك لا تسمعنه وحدة من البنات شيكولن علينه امي وابوي راجعين يتمعشكون ابعض
مثل العرسان الجدد ههههه (وتضحك بخجل)

محمود : (قرب وباسها من خدها وهي لسا ماخلصت كلامها)
هههههههه قمورتي انتي تضلين بعيوني صغيرونه دايما شنو هاي كبرنه وماكبرنه (قرصهه بشقه من خصرها وكال) وبعدين واذا سمعن عاادي هسه اصيحلهن وخليهن يكعدن كبالنه واظل اتغزل بييييج اله تكولين كافي واشوفهن شكد ابوهن يحب امهن وميكدر بلياهه....

قمر (وخدودها صارن حمر من الخجل ) : محموووود كافي اششش خجلتني والنبي .. اكول خلني اكوم اسويلكم الريوك تاخر الوكت واكعد بناتك نايمات لهسه اكيد اووف الامهات يكعدن يلاكن بناتها قبلها كاعدات ومرتبات البيت ومسويات الريوك اله بناتي ميكعدن للعصر اذا ماكعدهن اني شهالبلوه

محمود : اممممم يي ع امهن طالعات يحبن النوم متذكرين حالج شكد جنتي تنامين هههههه لاتخافين مو طالعات بعيد بعدين يلا باجر يرجع الدوام ويصيرن يكعدن بكير هسه عطلة وخطيه خلهن يشبعن نوم....

هسه خلينه نعرفكم عالبنات اكثرر :
• ريم الاخت الجبيرة عمرها 21 سنة طالبة بكلية الحقوق مرحلة ثالثة حلمها تصير محامية وتدافع عن كل المظلومين خصوصا النساء لان دايما تكول مظلومات بمجتمعنه وحقهن ضايع بالنسبة لشكلها عيونها زرك وشعرها على شقار ماخذه من جمال امها هواي ويشبهونها بيها حيل وتكدر تكولون هي احلى وحدة بخواتها

وريم لمن لما جان عمرها شهرين جانت راح تموت ومرضت حيل وهذا كله حسب ماكاللنا الشيخ الوديناه عليه اخر شي بعد ما ملينا من المستشفيات انه البنيه عليها عين ومحسودة وهو سبب مرضها لان بالفعل جان كل من يشوف هالبنية يفتح حلكه ويصفن بجمالها وفتنة عيونها من طفولتها فا اخر شي صرنا ننتبه من هالشي وضلينه نرقيها ونضمها عن عيون الناس لحد ماكبرت والحمدلله هسه بالكلية وامورها تمام..

• راما 18 سنة طالبة ثالث اعدادي الاخت الوسطانية المشاغبة من طفولتها دايما مسويتلنا مشاكل بالبيت بالمدرسة ومعلماتها يشكون منها احيانا انو ماتكعد عاقلة هههه بس للامانة جانت شاطرة حيل رغم انها حركة وماتكعد هذا الشي الجان يشفعلها ماخليناها تترك الدراسة
راما لون بشرتها على احمر شويه وعيونهه زرك كبار ورموش طوال وشعرها كيرلي وعندها جاذبية وجمال حلوين

واخيرا وصلنه عند رهوفة الاخت الصغيرونه المدلله الدلوعة عمرها 16 سنة ماتاكل غير اكلات نباتيه ماتحب اللحم حجيها كلو بكياته ههههه اهلي مدللينها زيادة عن اللزوم من اصغر شغله تبجي ودمعتها بطارف عينها واذا حدا صيح عليها صوت يمكن تموت هههههه اسم الله عليها همين طالعه عالام لعيون الزرك نفسها وبياضها يخبل وقزومة شوي وشعرها ناعم واصل لاول ظهرها مو طويل هواي مثل خواتها ودايما مكفوشه بالبيت بس شعرها هم جانن يتمنون مثله كل البنات كد مو حلو ولايك عليها...

وهيج صرتو تعرفون كل العيلة وتخيلتو شكلهم وياي وانشالله اضيفلك صور تقريبيه الهم باقرب وكت انتظرونا بالبارت الثالث مشان نشوف شلون راح تبدأ احداث قصتنا وشنو راح يصير مع هاي العيلة اللي اكيد حبيتوهم ومتشوقين تعرفون الاحداث المفاجأة المنتضرتهم.....

- - - - - - - - نهاية البارت الثاني - - - - - - - -

تصويت وتعليق حبايب بدعمكم نستمر 😍❤️