خيانة حارس المقبرة

الـبارت الـثامـن عـشـر والأخير

بعد ما اجت طعنة ريم بيد جبار اللي ضل ماسك بالسجينه والدم ينفر من ايده بشكل مرعب .. ريم ظلت ماسكه بطرف السجين الثاني بس انصدمت هي والبنات من ردت فعل جبار ومن اللي سواه اللي ظل ماسك بالسجينه من طرفها الحاد وجان يسحبها من ايد ريم اللي اهتزت من الموقف ومن الديصير ومن دم جبار اللي ترس ايدهه هم كدر جبار يسحب السجينه منها ...

عاد فورا راما جانت قريبه منهم شالت عصايتها وضربته على راسه ضربة وضربتين وثلاث ودفرته برجلهه خلته يوكع عالكاع بالكامل ...

طبعا رهف بعد مادفرهه جبار اول شي وطيرها بعيد عنه ماظلت واكعه بمكانها وتباوع عاليصير...

فورا زحفت ليعند سجينه جبار الجان شايلها اول شي وكدر يوكعونها منه وصارت باول الغرفة اخذتها ورجعت بس ماتعرف تستخدمها وماعندها جرأة ريم فخلتها يمها ...

عاد بعد ماوكع جبار عالكاع ودمه ترس الارض وثيابه وضربات راما وريم دوخنه بزياده حاول يريد يكوم وصار على ركبه ويحاول يستعيد توازنه ويوكف لكن قبل مايكوم رهف شمرت السجينه الثانية لريم

ماترددت ريم وفورا وبحركة سريعه ورشيقه صارت وره جبار دفرته برجلهه منعته من الوكفه ولما انحنى رفعت السجينه وطعنته بقوة بنص ظهره ...

جبار صاح صوت بعدها اهتزت اله المكبره كليتهه من الم الطعنة ووكع عالكاع غركان بدمه الديصب من كل مكان بجسمه ومشلوله حركته...

ريم : راماا بساع جيبيلي الحبل الطالعه وياه ،، هذاك هوه عند الباب جيبي الي بسرعة...

راما جابت الحبل فورا وشمرته لريم

ريم : يلا بنات تعالو ساعدوني نربطه من ايدينه ورجلينه هالنذل الخسيس ...

وفعلا ربطن البنات جبار وتركوه بنص الغرفة السجينة مغروزه بظهره والدم يصب منه ويون من الالم ويباوع عليهن بعيون ذبلانه بنضرات الضعيف المتحسر عيونه تغمض وتفتح..

فورا ريم كالت للبنات : هاي فرصتنه للهروب وحده منجن تطالع المفتاح من جيب جبار والثانية تجيب المقص والحقوني للسرداب نحرر ماما من جوه ...

ركضن البنات نزلن عالسرداب بعد ماجابن المفاتيح وتلاقن الام وبناتها من جديد ...

صاحن البنات ماما جينه يمه كدرنا نقضي على جبار النذل ونطعنه ..

قمر ماكدرت تتمالك اعصابها وعواطفها فورا دموعها نزلت وبجت : الحمدلله ع السلامة بناتي حبيباتي نور عيوني

وانو من اقتربن البنات من امهن ووصلن عندها انصدمن من حالتها شلون !!

دم سايل من خشمهه ومن حلكهه ومتيبس على وجهه وايدينهه مورمه مربوطه عالحديد وعيونها متنفخه من الضرب وثيابها حالتهن حاله مقطعات وجسمها كله كدمات زرك من اثر ضربات جبار العنيفه الها ....