خيانة حارس المقبرة

الـبـارت الـثـالـث

في صباح اليوم التالي
الساعة 9:00 بتوقيت بغداد

قمر :

بنات يلا كومن تريكن صار الريووك لشوكت تضلن هيج نايمات بدال ماتكعدن بكيرر تساعدوني بشغل البيت ترا النسوان يحسدني لان عندي 3 بنات يكولن مريحاتج اكيد بشغل البيت وكلشي بس ميدرن بيجن هيج تجلطن الماينجلط ديلااا كومن وياجن دقيقتين وتلحقوني عالغرفة الا ترا يصير شي مايعجبجن ابد....

رهف: افففف بس لو اعرف شنو مستفادة تكعدنا بكييير حتى بالعطلة مالتنه مايصير نرتاح اهئ اهئ ....

راما: دنجبي رهوفه😐انتي شوكت شبعتي نوم عساس شوكت ماكعدناج تصيحين ماشبعت نوم عوفي السهررر وشوفي شلون الكعده الصبح حلوه بس مع هذا وياج حق هم بكير حيل تكعدنه هههههه

ريم: اكول يلا كومن نروح هسه كل يوم نفس بدجن تعيدن نفس الفيلم يلا امشو نروح نتريك بلا ماتعصب علينه اكثر من غير شي مدري شبيها ماما هالايام صايرة عصبية اكثر من قبل هههههه

'الكل مجتمع عالريوك" :

راما: والله هالايام الجو ربيع كلش حلو مال الواحد يطلع رحلات او يروح يغير جوو جد ملينه من كعدة البيت والروتين نفسه شرايكم نروح على شي مكان ماما بابا خذونه نروح نغير جوو  نروح مكان بعيد شوي نطلع من بغداد ع غير محافظة وين ماجان نزور قرايبنا بوحدة من المحافظات الحوالينه

رهف: ايييي ماما الله يخليج خذينه نروح نغير جو والله احس صابني اكتئاب من الكعده بالبييييت وهسه معطليين وباجر يرجع الدوام ومانفضه لشي ونرجع ع روتين الدوام البايخ المملللللل اهئ ....

محمود: اوهووو عالدوخه من الصبح هسه شنو حلمانات بالفرفره انتي وياها ههههه اكول انجبن ماكو روحه مكان هذا الشاطرات بي موو استعدو يلا راجعو دروسكم شوي استعدوا للسنة الجديدة او سوولكم شغله نافعه بهالبيت بنات اخر زمن😒

قمر: محمود شبيك وياهن هيييج خطيه ترا معطلات وضايجات من الكعده بالبيت انوب تكلهن ادرسن لحقانات عالدراسة والشغل مايخلص وبيني وبينكم اني هم ضايجه من الكعده بالبيت من زمااان ماطلعنه شي مكان غيرنه جو

محمود (يضحك)": عفيييه واني اكووول هالبنات على منو طالعات يحبن الفرفره هييج غير عليج اذا انتي الام هيج تحجين لعد ماينلامن ههههه اروح عالشغل احسنلي من هالدوخه

قمر: ديلا عساس انت وشغلك مامخلي محافظة مو رايحلهه مقضيها سفر وفرفره وونسه اكثر من الشغل خلينه ساكتين لا نفضح المستور كدام البنات واطير هيبتك هسه هههههههه بدنا نروح يعني بدنا نروح .....

رهوفه: ييي كفوو يمه هذا الحجي ههههههههه والله بابا مقضيها ونسات وطلعات ونحن رايحه علينه محبوسين بين 4 حيطان والله ظلم هذا بابا ميصيرر نحن هم نريد نطلع نتونس اهئ....

محمود: 😐ياربي شهالعيلة كل وحدة لسانها اطول من الثانية😂يابه خل اكوم اروح عالشغل احسن ما ارتكبلي جريمة بوحدة منجن ع هالصبح هههههه حسابكم بس ارجع تأخرت هسه (وطلع من البيت)

رهف بصوت عالي: هييييي عاشت الحكومة😂والله احلااا ام انتي بالعالم ييي خلنه نروح نتونس هيييج نغير جو يلا ماما ها شتكولون وين نروح مانروح اني ابالي نروح لهوااي اماكن نفر نص العراق شكلتو😂

ريم: ايي رهوفه نصي صوتج شوي شبيج اليسمعج عبالج كاعده بسجن واطلقوا سراحج خلاص دوختي ابوج وامج ترا قابل اول مرة بحياتج تطلعين مكان هههههه خلاص خل نشوف ماما شنو رايها وين نروح....

قمر (تباوع عليهن بطرف عينها): خلصتوا نقاش انشالله هسه🤔اي ست رهف جنه خيالج واسع هواي صاير🤔وين حابه تروحين انوب شرايج ناخذج ع باريس تسوين شوبينغ غاد هههههه

رهوفه: يبووو عاد لاحقيني عالكلمة خلاص سكتت مابديي شي بكيفكم انتو وين تريدون قبلانه معد اعطي اقتراحات ابددد اهئ...

قمر : امممم لكيتها😮،،، بنات شرااايكم نرووح للنجف نضل اسبوع عند خالتكم ام حسين وبناتها واريد ازور قبر امي الله يرحمها هم صارلي زماااان مارحت زرته هسه اكيد تكون عتبانه عليه ومو راضيه عني بقبرها.....

البنات بصوت واحد: ايييي يمه احسن فكرة😍اتفقنه...

قمر :  لعد استعدوا بعد ثلاث ايام ابوكم يسافر لشغله ونحن ننطلق للنجف وهسه اقنع ابوكم وماراح يرفض جهزولي حالكم يلا .....

    - - - - - - - - نهاية البارت الثالث - - - - - - - - -

انتظرونا بالبارت الرابع ولاتنسونا من التصويت والتعليق مشان نستمر وتعرفون شنوو الراح يصير وي قمر وبناتها من تفاصيل واحداث جديدة❤️❤️