خيانة حارس المقبرة

الـبـارت الـعـاشـر

ام حسين : هلا وغلا بأم ريم شخبارج طمنيني عنج هاا شلون خطرنه ابالكم وجيتو سويتولنه هالمفاجأة الحلوه...

قمر : والله دوم بالبال انتو بس تدرين والله مانفضى طول السنة دوام البنات وشغل ابو ريم اللي دايما مسافر ومسؤولية البيت وهبج والبارحه كوه قنعناه نجيكم وهيج همين نغير جو وبيني وبينج اريد اروح ازور قبر امي صارلي زمان ماجيت زرتهه هسه اكيد مو راضيه عليه بقبرها

ام حسين : اي صح صارلج زمان ماجيتي زرتينه ولا زرتي قبر الوالدة يلا خير سويتي ماقصرتي بهالجيه

قمر : اي لج تدرين حتى كوابيس اخر فترة صارن هواي يجني فا داكول لحالي هاي اكيد اني مو راضيه عني وتريدني ازورها واجيب البنات ههههه والله اعلم

ام حسين : يي خلاص لعد اليوم ارتاحوا واشبعوا نوم وباجر او العكبه روحو زوروها انتي والبنات همين علمود يزورن كبر بيبيتهن ويقرولها الفاتحة...

قمر : يي هو هيج وانتي شنو ماتريد تجين ويانه

ام حسين : لا والله ماكو داعي من جم يوم جنت غاد زرتها واني كل فترة هيج كل شهر انزل ازورها تدرين المكبره يمنه مو بعيدة

قمر : امممم تمام لعد اخذ البنات ونروح وحدنه وهمين اريد نروح نزور الامام علي (عليه السلام) وبعدهه نروح للمكبره

ام حسين : اي ليش لا ماتقصرين احسن شي تسوينه والله جيتو وجيتو

•••  بالطرف الثاني •••

جابر بعد ساعات جوه العمليات لحسن حظه نجحت العمليات اللي جان املهن ضعيف شوي وطلع من المستشفى...

بس اصابته جانت بليغه اضطر الاطباء يستأصلوله جزء من الكبد وجزء من الامعاء فا حركته صارت صعبة وخفيفة والدكتور كاللهم ممكن يرجع لطببعته بعد كذا سنة من المعالجة بالادوية ومعالجة فيزيائية....

وبعد فترة تحسن شوي وسمر ماكانت تتركه ظلت وياه وزاد تعلقهم ببعض وغير معاملته وياهه فقرر انو يتزوحها ويعيشون سوه بالبيت

وسبحان مغير الاحوال بعد ماطلع من العمليات وقالوله الدكاترة انه طلع الموت تغير حال جابر وانصلح حاله حتى تفكيره تغير وترك افكار واعمال الحرام الجان يسويهه قبل

حتى فكرته بالانتقام من قمر وبناته الجان يسولف بيها اول من طلع من العمليات شالها من باله بعد ماحس بذنبه وهيج وان الله عاقبه وهسه اعطاه فرصة ثانية علمود يتوب ...

••• بالعودة لبيت ام حسين •••

// مر اول يوم ببيت ام حسين الامور عادية وطبيعية والبنات خلصنهه ضحك وشقه وسوالف البنات

وام حسين وام ريم همين خلصنهه سوالف امهات هههه عن البيت ومسؤولياته وامور البنات والعائلة وحجت ام حسين لام ريم شلون جان عرسان يتقدمون لبناتهه وترفضهم هي وابوهن لان ابالهم مايزوجونهن الا يخلصن دراستهن وهالشي نفس تفكير ام ريم اللي أيدتها وشجعتها على هالشي المهممم هاي سوالفهن جانت وهيج بامور البيت ويتفنن بطبخات مميزه سوه وكذا //

• ام حسين عندها بنتين راح نتعرف عليهن :

نوارة : عمرها 17 سنة طالبة خامس اعدادي

سوسن : عمرها 19 طالبة بكلية الاقصاد مرحلة اولى

• صباح اليوم الثاني :

قمر تحجي وي ام حسين :
والله ياخيتي لو تدرين شكد نمنا بعمق البارحه كد ماتعبنه بالسفرة هاي وتدرين بينه زمان ماطلعنا من البيت وهيج سافرنا كذا ساعة مانا متعودين عاد بالليل حل علينه التعب ههههه

ام حسين : يبووو خطيه بس والله وياج حق تدرين اني اذا انزل اتسوق من السوك هيج ساعتين زمان افتر ارجع للبيت انام بل 9 المسا من التعب😂چنه كبرنه والله راحت ايام النشاط والشباب مثل اولي

قمر : اي والله وانتي الصادكه راحت هذيج الايام ياربي حسن الخاتمة احسن شي😂😂

ام حسين : وجع مو لهالدرجة هههههه اسم الله على عمرج دنشاقه لاتندمجين هواي اكووول امشي نسوي الريوك ونكعد هذن التعبانات يتريكن ويكعدن يسون شي شغله نافعه بهالبيت احسن مو نايمات مثل الشسمهن😂🤐

قمر : صحي ماكتلج ام حسين مساع دافكر اكول أأجل روحتنه للزيارة لباجر والله مابيه اتحرك مكان اليوم احس جسمي مكسر هههههه

ام حسين : ييي خلاص لباجر او العكبة منو راكض وراكم مشينه يلا نسوي الريوك هههههه

/// مر نهار اليوم الثاني مثل الاول الكل مبسوط ومكيف ومتونسين وامورهم زينة وراح تعبهم ونسوا الصار وياهم من مشاكل وديعيشون كل لحظة بلحظتها ///

الساعة 11:30 ليلا :
//يدك رقم غريب على موبايل قمر//

قمر : الو منو وياي ؟؟

(صاحبة الرقم بصوت مرعوب وبي رجفة) : الووو ام ريم افف اخيرا حصلتج وينج يمعوده قلبت الدنيا عليج وين مختفية

قمر : هلاا ام حيدر اني بالنجف والله عد بيت اختي شبييج خير انشالله شهالرقم الغريب المتصله منه وشبي صوتج هيييج خو مصاير شي بيج او بحدا هالويلاد بيكم شي احجيي طمنينييي

ام حيدر : مصيييبة يا ام ريم مصييبة وطاحت بروسكم اففف اني من يمي شكد مقهوورة عالراح يصير بيكم يالله متستاهلون ليش هيييج😭😭😭وانتي شهالحظ مانكم بالبيت افففف

قمر : ول احجي وللججج وقفتي قلبي شصاير مصيبتيش الصايرة طاحن رجليني ترا مو الخوف احجي شصاير يلا كولييي

ام حيدر : ام ريم خذي نفس عميق وهدي وفتحي مخج وركزي وياي علمود تعرفين شتتصرفين فهمانة ....

       - - - - - - - - - نهاية البارت العاشر  - - - - - - - - -