لبوة اسد (مكتمله)

البارت السابع والاخير

السَلٱمٌ عـَلـْيگمّ

كتلها -انتي ناخية فاطمة الزهراء وهي محصنتج انتي وجهالج وهاي شنو حتى تخافين ‏​‏منها من تحجي وياج اقره بوجها المعوذات- كلتلي 'مادري رقية اخااف جاي اتخيل' ضليت اسولف وياهه واغير موضوع لحد ماارتاحت اما مرت علي خذوها لهذا الشيخ و امي راحت وياهم اني من طلعو ضحكت جلال سئلني كلي 'شبيج تضحكين' -يمعود مرت علي جاي تجذب بس هي غارت من اختك- جان تحجي مرت جلال' شنو هو لعبة حتى تغار' كتلها -انتي تعرفين شيء واني اعرف شيء- سكتت ضل اخوي جلال يسئل هذا الملك وهو يجاوبه اتفقنا بـ 9 نطلع للنجف صارت بـ11 الصبح ياله طلعنه للنجف ورانه طالعين علي ومرته و ام مرت علي لان مرت علي خابرتها تكلها تعاي انتي هم بيجن جن اجت المره خايفه طالعين ورانه لكربلاء لان هي مارايده تروح للنجف. طول الطريق اني رافعه الجامه مالت السياره وصلنا منطقه مزارع وبساتين وخضار كلت خلي انزلها اشتم هواء نزلتها واسمع اشكال الاصوات من صريخ ومن بجي رجعت سديتها بسرعه رغم البساتين ماكو بيوت وفارغه وصلنه للامام قبل ماادخل مثل الواحد يكلي لادخلين بس اني امشي بس لازمه امي وامشي كوه لان رجليه مزرفه وطگاگ حرك دخلت كعدت كبال الضريح لان ماكدر ادخل رفعت راسي واشوف اشخاص بيض وعدهم اجنحه يعني البياض مالتهم يخبل ضليت صافنه بس وجوهم ماطالعه ويفترون فوك ضريح الامام ضليت صافنه وبصفي مرت جلال ومن الجهة الثانيه امي وتبجي وتنخه واني بدون حركه بس اباوع مثل المتعجب بشيء اول مره يشوفه  امي كالت نطلع بره بالصحن نكعد يم جلال ويجيبلنه عشه كتلها -يلا- كمنه هستوني طلعت من الحظره ومره كبيره لازمة عكازه متدري وحطت العكازه على اصبعي المحروك بس شصار بيه ماحجيت وصلنه لجلال كعدنه يمه نزعت الجوراب لكيت الطكاكه ممروده مرد بس الالم موتني اخذت وصله من امي وشديت اصبعي بالوصله ورجعت لبست الجوراب راحو امي وجلال جابو العشه تعشينه وضلينه كاعدين شويه تذكرت شلون بهذلت اهلي بهل يومين وهم ماعدهم بجيت

امي 'شبيج يمة'

رقية: يمةة احلفج بهذا ابو الحسن عذروني ادري بهل يومين خليتكم لا ليلكم ليل ولا نهاركم نهار يمةة ادرري انتم ماعدكم بس يمة والله مو بيدي من تحلمت صحت عليج وعلى ندى ومديت ايدي على فراش ندى بس محد جاوبني محد اجاني
رجعت ابجي بحركه لان صدك من اتذكرها كلبي ينعصر ولهسه من اتذكر هذيج اللحظه كلبي يضل يدك بسرعه وجسمي ينهل

امي: وولج شلون تحجين هيج شلون لعد نعوفج هيج
بعدها رجعنا والطريق لازم يفوت ابو السياره على المقبره فتنا بالمقبره وبس سيارتنه ويا طريق نفوت بيه نلكاه لو مسدود براميل لو بـ تل تراب مرت جلال ضلت تبجي من الخوف كتلها -لاتبجي شبيج هسه نطلع حاولي تنامين- امي تقره معوذات وايات وجلال و السايق نخطفت الوانهم وصارو صفر مرت جلال كالت 'رقية ماكدر انام لحكيلي مرت علي تتخيللي وتطلع كبالي  شلون تخوف بيه' اني شايله قران وعلك لفيت العلك على ايدها لان ضلت توجعها والقران خليته كبال وجها وكتلها غمضي صدك والله هدئت شويه لكن احنه ماكو ماطلعنه من المقبره ياطريق نلكاه مسدود حجيت بكلبي- مولاي جايينك من مكان بعيد ومرضه ونتشافه يمك مولاي وتخلينه بهل ضيج مولاي احلفك بالزهراء طلعنه من هالمحنه - مشينا شويه ولكينه هم سياره هم خطيه تايهين وهم فتنا بطريق وراهم ولكيناه مسدود لفينه ورجعنه فتنا بطريق ثاني ونلكه محل هذولي اليبيعون مي ورد سئلناه كال " وين رايحين عمي منا فوتو كبل وطلعون للشارع العام" صدك فتنا والسياره ورانه مشينا شويه ونلكه سيارات هم هواي يفوتن فتنا وصدك مسافة وطلعنه للشارع العام رجعنا للبيت دخلت سلمت على اهلي ونمت لان صار يومين مانايمه عيوني مورمه وهالات سود صايره عندي بالحلم اني واكفه وطريقين كدامي وبيهن بوابات كبااار وليفوك مكتوب (اعوذ بالله من الشيطان الرجيم) وبيها نار والثانيه (بسم الله الرحمـن الرحيم) وبيها اشجار يعني حضار اني مشيت للبوابه البيها خضار وفزيت من النوم ..كعدت سولفت لاهلي الحلم امي كلتلي ' الله سبحانه وتعالى نجاج من هالمشكله الوكعتي بيها' شلنا من بيتنه واخوي علي تقريباً شهرين ماشايفه بيتنه صارت مشاكل بين بيت علي ويانه رجعنه بدون مانجيب اي غراض ويانه لان مرت علي تصيح واني صارت بيه اليتعارك يمي واليصيح اتخربط لبيتنه فتت للبيت رحت اشوف الحياطين الي من اصرخ واشوف احد يكتب عليها فتت لغرفتنا افتريت البيت كله تراب وفارغ رجعت حياتي شويه شويه بس بعدني من اتذكر گلبي ينقبض وجسمي يضل يرجف ..
.
الى ان مرت 5 شهور على هذا الحادث تقدملي ولد مزوج ومطلك فبعد مافكرت بحالة اهلي واخوي علي شاد ويانه وافقت اجه الولد شافني وافقم وصارت الخطوبه لكن بيوم الخطوبه تخربطت ماعرف من الخوفه او مادري بس كل تفكيري بس لا ترجعلي المشكله لحد مخلصت الخطوبه اني بس ادعي الله تعدي سلامات عليه تمت الخطوبه والحمد لله ماكو شيء
.
زين: مرحبا اني زين عمري 29 سنه اني عسكري بالاستخبارات اخوي الجبير شيخ واني شيخ بس اصغر منه عايش اني وامي بس ابوي متوفي واخواني كلهم مزوجين وعازلين ماعندي اخوات تقدمت لبنيه وبعد ماشفتها وخطبتها حبيت هالبينه لان من اسولف وياهه على فطرتها وطيبه كلش صح اني مطلك بس الصوج مو مني من البنيه لان جانت حشاكم مو خوش انسانه وبس شكراً الكم وشكراً للكاتبه (شكراً الك انت والله يحفظكم لبعض ويزيد المحبه امين رب العالمين)
.
صار العرس بعد اقل من شهر لان الولد مستعجل بعد ماكمل العرس واخذوني دخلوني للغرفة وطلعن وعافني ضليت وحدي كاتلني الخوف دقائق واسمع بره حجي لحظات وانفتح الباب عليه اني مدنكه بس يمكن واحد بس ينفخ عليه ابجي صكيت سنوني حيل سمعته

زين: السلام عليكم

رقية: عليكم السلام

زين: شلونج

رقية:  اااا الحمـ...د لله

زين: ههههه شبيج تأتأين

رقية: مااا... مابيه شششيء

زين: لاتخافين يابه

اجه كعد بصفي اني مدنكه رفع راسي بايده باوع بعيوني وباسني بگصتي جسمي رجف كله رجعت ليوره هو هم ابتعد شويه بس حسيته ضاج اجه يفتح التسريحه تقرب لجسمي وباسني بجتفي وخرت منه كلي 'شبيج يابه لتخافين' سكتت ودنكت سلمت نفسي لان بعد ماكو امل كمل تسريحه بعد مطلع طن ماشات اجه كعد يمي هم رفع راسي واخذ شفتي بشفته باسني اني هنا عيوني صبن وحدهن طاحت دمعات عليه وخر راسه وباوع عليه لزمني من زنودي بثنين اديه وكفني كدامه بدأ يفتح بالبدله اني هنا بعد مادريت بنفسي مادري شكد وقت لكن كعدت لكيت نفسي على الجربايه وبس بملابسي الداخليه ومغطيني التفتت يمنه ويسره اكو شيشة عطر يمي رفعت نفسي لكيت زين يدور بالكنتور

رقية: ززززين شششسوي
اجه زين بسرعه الي والشفته لابس تراك ونازع القاط وجه صاير اصفر خطيه

زين : ولج شبيج وكعتي هسه ردت اوديج للمستشفى بس ادورلج على ملابس انتضريني

رقية: لا لا مابيه شيء هاي دائماً الحاله وياي

زين:  شنو قصدج دائماً وياج

رقية:  زين راح اسولفلك سالفه ادري مو وقتها بس لازم اكلك حتى اعرف شنو موقفك وياي

زين: حبيبتي احجي خوفتيني

رقية: اني قبل 5 اشهر ..... وسولفتله القصه من الالف للياء

زين:  رقاوي حبيبي هذا امر الله وقضاءه شاء يصير هيج واحنه الحمدلله من تجاوزتي هالمشكله وطلعتي سالمه حبيبي انتي هسه مريتي وام بيتي وكلشي بحياتي صح اني مطلگ بس اني جنت مامقصر وياهه بس هي حشاج انسانه طايحة حظ اما انتي هسه ثقلج ، حملج، سندج، ابوج،  اخوج،  حبيبج،  زوجج كلشي تردين اني اصيرلج تخافين اني احتويج ،تبجين على صدر وماخلي احد يشوف دمعتج 

رقية: يعني متخاف مني

زين.: ليش اخاف هذا مو سبب حتى اخافج وثانياً انتي هيج تغلبتي على خوفج عمي والله انتي لبوة

رقية: هههههههه وانت الاسد

زين: خوش رهمت لبوة اسد (هااا خيه رقيه هنا سالفة الاسم بليله العرس مختارينه 😁😂)

بعد ماحجه هالكلام اطمنت وصدك حسيت عندي سند وامان من اخاف لو من اختنك اروحله حضنته وبستة بركبته بدون وعي

زين: خرب يومج شلون اليوم مناكل كيك

حجاها وضحك وخرت عنه بسرعه ودنكت اباوع لنفسي بس بملابسي الداخليه صرخت وغطيت نفسي بأديه هو ضحك وهز ايده اني هم ابتسمت بخجل ودنكت وصار.........

.
.
النـهـايـة 🌺🖤
.
القصة حلوه
وبيها عبرة ونصيحه
كتبوها الي بالكومنت
والكومنت الحلو ومرتب انشره
هو وصاحب الكومنت
.
اتمنى ماأطلت عليكم