رواية ليبية"بعد موتي" بقلم الكاتبة Manoo

الجزء الأول

الجزء الأول :- "بعد موتي"

أنا دكتور أسنان وعندي عيادتي وحياتي ، بس مكانش عندي الحب
، الحب الي يغنيني عن كل شي والي يغنيني حتى عن نفسي ، فقدت الحب قبل سبعة سنوات وتحطم تماما يوم تزوجت وفي ليلة زواجي تحديدا حبي انحرق وبدي هباء وانحرق قلبي الي كان يحمل حبي ليك يا "شوق" ، عرفت معنى أسمك في يوم هاجرتي فيه مع عيلتك ، إشتقتلك بقد معاني حروف أسمك ، اشتقتلك بقد جمال ضحكتك ، إشتقتلك بقد الحب الي كان بيننا .

شوق تكون بنت عمي الي كان عايش معنا في نفس الحوش ، حنى عائلة مترابطة وكنا نعيشو في شقق في حوش او مبنى واحد ، نولدت شوق لما كان عمري سنتين ، صرنا خوت وكبرت قدام عيني ، كانت أختى وصديقتي وأخيرا حبيبتي ، وماتمنيتش ننتهو حبايب ، تمنيت ننتهو زوجين ، بس شن الفايدة ؟ مجرد أمنية وخلاص ،

قصتي مع شوق كانت غير عن كل قصص الحب الي نسمعوها ، بدايت حبي ليها كان ونا عمري 18 سنة وهيا 16 سنة ، حبيتها رغم أخوتي ليها ، عشقتها تحت اسم الصداقة ، إحترمت صلة القرابة الي بيننا بإحترامي لحبي ليها والي مزال هيا ماتعرفاش على الرغم من اني متأكد من حبها ليا والي مخبياته بالزبط زي ماانا مخبيه

، في يوم كنا ماشيين لإستراحة العائلة يعني حنى وعمامي ومن بين عمامي عمي "خيري" الي يكون أب شوق وهيا معانا ، كان يوم حلو بس شعلت فيه غيرتي لما كنا نلعبو في الصراحة انا وولاد عمامي وبنات عمامي ومعاهم شوق لما سأل واحد من ولاد عمامي شوق وقاللها "من بيننا حنى في ولد معجبة بشخصيته وشكله؟!" ، توقعت تجاوب وتأشر بصبعها عليا بس أشرت بصبعها على خوي "سليم" الي كان نسخة مني ، نضت وماتحملتش ومشيت بعيييد ونا حاير "انا نسخة من سليم خوي ، شن الفرق الي بيننا ، الناس كلهم يقولو ان انا شخصيتي اقوى من سليم ، شن الي عماها وخلاها تجاوب وتأشر ع سليم؟" ،

بعد حيرتي بلحظات جمعت روحي الي تشتت بسرعة ورجعت لمكاني وين ماكنا نلعبو بس مالقيتش حد ، انا عطلت وكلهم خشو للحوش ، قعمزت ع الكرسي والغيرة حارقتني ورجلي ماوقفتش حركة ،

_خيرك نضت وماكملتش لعب معانا؟
_شوق !! شن الي طلعك توا ؟
_عادي حسيت بالملل داخل فاطلعت
_هونا سليم داخل بريله تو يطير عليك الملل
_شن دخل سليم توا ؟؟
_يقولو لما تشوف الشخص المعجب بيه والي تحبه تفرح ويطير الملل فبري لسليم تو تفرحي ويطير الملل
_اهاا به تصبح ع خير
_ستني
_ها
_بس انا لما نشوفك نفرح ويطير الملل
_ويعني ؟
_أنتي فعلا معجبة بسليم
_ههههه‍ غبي انا أشرت عليك انت بس ماكنتش لابس نظاراتك لهذا فكرت ان أشرت ع سليم
_هههه‍ قولي والله
_ههههههههع والله
_وحق الي خلق هالضحكة الا نحبك
_اسس انت شن تقول حنى خوت
_معش تكدبي ع نفسك انا نحبك وانتي تحبيني

إكتفت بضحكة خجولة وخشت من غير ماترد بي ولا كلمة ، حسيت بشي حلو في هاديكا اللحظة ومش عارف كيف جتني شجاعة وبمنتى البساطة خلتني نعترفلها ، طرت من الفرح لما فكرت فإنها معجبة بيا ،
من هاديكا الليلة غيرت إسم شوق في تليفوني من "my only sis" لي "my heartbeat" نبظات قلبي هكي سميتها ، وخليت كل نبظة في قلبي تنادي فيها ، وخليتها تعيش في قلبي وتسمع نبظاته ، بس للأسف انها محاولتش أبدا تحبني زي ماأنا حبيتها او ممكن هيا منعت نفسها وسمعت كلام امها لما تقوللها فكيك من حب الأقارب وغيره ، بعد علاقة بيننا إستمرت سنتين وبالسر على عيلتنا ، تنازلت عن حبنا وكلمت غيري وسمعت كلام امها ، حب
ي ليها منعني من وصفها بالخيانة ، حبي ليها منعني من كرهها ، مفش أي شي يشفعلها في قلبي ،
حرقتني وقتلتني في يوم هاجرت هيا وعمي وأمها وانقطعت أخبارهم ، 5سنوات ونا نحاول ننساها وننسى ان في يوم حبيتها ، حاولت نستأصل حبي ليها بالزواج ، فتزوجت "بلقيس" الي تعذبت ولحد الأن تتعذب معاي من البرود الي في قلبي تجاهها ،
فكرة أنك تحب انسانة وتبني معاها أحلامك وسعادتك وفجأة متلقاش هالانسانة وتلقى بدلها وحدة تانية صعبة هلبة .