رواية ليبية"بعد موتي" بقلم الكاتبة Manoo

الجزء الرابع عشر "الجزء ماقبل الأخير"

الجزء الرابع عشر :- "بعد موتي"
الجزء ماقبل الأخير

إستغربت من شوق وكيف مشت من غير ماتودعني ، كنت طول الطريق
نجهز فكلمات ننهي بيهم لقاءنا ، لاكن سرعان مانزلت شوق ومشت واختفت خلف حيطان البناية وخلتني بين كلمات مجهزهم ومشاعر محبوسة حبيت نطلعها ،
نزلت من السيارة وكان "سليمان" الي يكون جارنا مقعمز ف حييته وطلب مني نشاركه القعدة ونا وافقت ، ممكن نريح نفسي شوي من التفكير ، هدرزنا في عدة مواضيع بس كان سليمان يسأل ف أسألة غريبة عني وعن شوق ، من تكون ؟! وشن مطلعكم ف هالوقت ؟! ، وانت متزوج وغلط ، كيف تتجرأ وتقولي كلام وتوجهني وانت مش عارف شوق شن تكون بالنسبة ليا
، خديت أسألته بوضع عادي ومقدر الاستغراب الي عنده وإستأذنت منه وركبت لحوشي ،
لقيت بلقيس مقعمزة تراجي فيا ، ليش هك تديري ؟ حسسيني فيوم من انك زعلانة وكسري الدنيا !! ماتحسسنيش ديمة بأن انا الظالم ؟ ، وقفت شوي ونا نراجي ف صدمات تانية منها ، بس تفاجئت بردة فعلها الي كان غير متوقع ولا حد رح يتوقعه ، قربت مني وهمستلي وقالت

_حتكون أحلى بابا

انتي بعقلك ؟ لالالا اكيد عندك خلل ، قبل ساعات كنتي زي الاعصار الي مايرحمش وتوا !! توا انسانة ف قمة الطيبة والرقة ، جمدت ذهلت من كلماتها الي تغلغلت ف اعماقي وصحت شي كان راقد ف داخلي ، صحت حس الطفولة الي فياا وخلتني متشوق لأن نكون أب ، بس مش منك يازوجتي أعذريني مش منك

إكتفيت بإبتسامةة ومشيت لاكن بلقيس اعترضت طريقي

_وسام شن رايك نبدو بداية جديدة لو مش ع خاطري ع خاطر الي فبطني

انتي مجنونة اكيد ، انا توا كنت بادي حياتي وطاير فرحة تبيني نهدم الي بنيته عشان نبدى معاك ، لا انتي مش مجنونة انا الي مجنون ، انا الي كذبت ع نفسي ونسيت كلام سليمان عن شوق وكلامه وقصة ان تقدملها وناوي الزواج منها ووصية بوها ليه ، انا الي مجنون لما   تهجمت عليه ووبخته وتخلصت من اكوام غضب تراكمت فقلبي لسنوات وصبيتهم ف وجهه
، شوق تحبني وبدينا بداية جديدة بس ليش القدر مصر ع معاقبتنا ليش يطلعلنا ف عقبات من حيث لا ندري ، لو كنا مامشيناش ع الشط راه توا مالقيتش سليمان ولا عرفت ابشع حقيقة ، لو كنا ماتلاقيناش ولا رجعتي ولا حبيتك ولا انولدت شن كان رح يصير ، وتوا زوجتي تطلب من ف بداية جديدة وانا خالي من اي مشاعر عشان نعطيها ، ف هاديكا اللحظة تخلطو عليا الافكار وتزاحمو لين سببولي صداع ،مسحت راسي ومشيت لداري وتمددت ع السرير وخليت بلقيس في خيبتها

*_سليمان ارجوك ماتديرش اي شي تندم عليه
_اسمعي ولد عمك مسح بيا الأرض وقلت ماشي بس بياخدك مني مرة تانية مش رح نسمحله
_انت شن تحكي ؟؟ شن تقول !!
_بوك موصيني عليك وانتي وليا ومفش حد حيحبك قدي
_الدنيا ليل والصباح رباح

وسكرت الخط ونا مزال نبي نحكي ونفهم بس معش استحملت ، وسام عرف هذا الي كان ناقص ، ليش يصير معاي كل هالشي ؟! انا شن درت عشان نتكافئ بهكي ، زعما وسام شن يفكر توا وشن رح يدير ؟؟ وانا شن رح ندير !! ، مرت عليا ليلة كانو ساعتها الاولات من اجمل الساعات والاخيرات من اكثر الساعات أرق وبشاعة وتفكير