رواية ليبية"بعد موتي" بقلم الكاتبة Manoo

الجزء الخامس

الجزء الخامس:- "بعد موتي"

قبل كنت تقولي انتي اجمل انسانة شافتها عيوني ، بس توا تقولي انتي الأجمل من انسانة ديمة معاك وهيا "زوجتك" ، غريبة الدنيا وحني زايدنها غرابة والأغرب قدرنا الي يخبط فينا ويعاقب فينا على زلات من الماضي ،

دموعي الي لقو فرصة عشان ينزلو مابوش يوقفو ، البحر ووسام حياتي الماضي الذكريات هذا كله انا نبكي قدامه ولقيت فرصة عشان نبكي فإجتماع كل هالأشياء ،

هبت ريح قوية وحسيت بيها ف عظامي لأن كانت مشاعري عارية وخالية من حب يحميها ولا شي يدفيها ، مشاعري متشتتة ومتلاشية وفاقدة طريق توصل بيه لمرادها

*نشوف ف شوق غارقة ف دموعها وحزنها ومش طالع يإيدي شي ، شوق الي قبل مانرضاش عليها الدمعة والي لازم نعرف سببها ، توا هيا تبكي عشاني ، تبكي عليا ، انا قبل كنت فرحتها توا حزنها والسبب الي يبكيها ،

_شن الي يبكي فيك!؟
_مادخلكش

قاعدة زي ماانتي ماتغيرتيش أبداً ، تأكدت توا ان نا سبب الي تبكي عليه ، لأن قبل لما نسألك شن يبكي فيك ولو الموضوع مش متعلق بيا تحكي كل شي بس لو الموضوع يتعلق بيا توصدي كل باب ممكن يخليك تحكي وتقولي كلمة بس فيها ألاف الكلمات ، تقولي كلمة مليانة مشاعر مبهمة مش معروف لوين تتجه ، تقولي "مادخلكش" ، وكالعادة لما تقوليها نبتسم بسرور ونقولك "ي روووحي انا مزعلها" وترفعي حاجبك وتشوفيلي بغضب ونقولك "كملي زعلك عادي لأن نستمتع بشكلك وانتي زعلانة" هالمرة تشوفيلي بتقزز وتقولي "لا والله" وبعدها خلاص معش نقدر نكذب أكتر من هك ولا نقاوم زعلك ونبوح بالأسف "أسف لو زعلتك" وعلى طووول تحكيلي السبب ،

شفتو أنا قداش خبير ف كل حركات شوق ، هل خبرتي تستحق انها تضيع ؟؟! ، انا زي كل انسان في يده موهبة وخبره وحلمه ان يكمل مسيرته تحت ظل هالخبرة ، حتى انا هك خبير وموهوب في كل حركة صادرة منك ، ومن الطبيعي جدا ان نكمل مسيرتي تحت ظل خبرتي وهيا إنتي ،

_ع فكرة شكلك وانتي زعلانة ......

قاطعتني وقالت

_جذاب ، نعرف
_شوق حني شن !!!
_تشوف انا وين واقفة
_اي
_تشوف ف الباخرة هاديكا
_اي
_هادي المسافة الي بيننا
_بس رغم المسافة الي بينك وبين الباخرة حيجي وقت وترسى ع الشط ونفس النقطة الي انتي فيها
_شن تقصد
_ترجمي ، ااه يلا وقت عليا بنطلع مع بلقيس
_امتى ؟
_بعد المغرب
_اها يلا مانعطلش عليك ، اقضو وقت ممتع

وهادي كانت أخر كلمة منها ومشت من غير وداع ولا أي شي ، مشت بس ذكراها قاعدة ف عقلي مامشتش ، مشت بس ريحتها مزال نستنشق فيها ومامشتش ، مشت ومشي وسام ومشو الأيام زي الباخرة الي مرت من قدامنا ، ونتمنى ان نرسو على الحب زي مارست الباخرة ف الميناء ،

*بيطلع هوا وبلقيس !! شن بيديرو ؟؟ وليش يقوللي ؟؟ ، وليش نسأل !! هادي حياتهم وهما حرين ، بس ليش مش قادرة ننسى ، كان خاطري نسألك قداش تحب بلقيس ؟؟ ، كيف تتعامل معاها ؟؟ ، زي ماكنت تتعامل معاي قبل سبعة سنوات ؟؟ ، كيف كيفف ؟؟ كيف مرا تاخد معاملتك ليا وكيف تسمحلها !! ، بالزبط زي ماانا سمحت بأن نبتعدو ، هذا عقابك ولازم تخضعيله ، وتستاهلي الي يصير فيك ، هكي قلت لنفسي بس في داخلى نكذب في الي قلته ومستمرة ف الأسئلة الي تجي وتمشي ويجي بدلها سؤال ويمشي ويحلو مكانه أسئلة ماليهاش أجوبة او ممكن ماليهاش أساس من الصحةة ،