رواية ليبية"بعد موتي" بقلم الكاتبة Manoo

الجزء الثاني

الجزء الثاني :- "بعد موتي"

نحاول بقدر الامكان ان مانفكرش فيك ، بس فكرة عدم التفكير فيك بروحها تضايق فيا ، مابالك لو مافكرتش فيك فعلاً
، "خاين" هل تنطبق عليا هالكلمة او لا ، خاين لبلقيس الي زوجتي بالإسم بس ، ولا خاين لنفسي الي وعدتها بأن معاش نجيبلها المتاعب وخلفت بوعدي ولا خاين لشوق الي مش قادر ننساها ولا قادر نتوقف عن حبها ، بأي حق نوصف نفسي بالخيانة ؟؟ بحق حبي لشوق ولا بحق نفسي ولا بحق زوجتي

"الحب" مش شي ساهل الحب مسؤولية وكبيرة هلبة ، لما الراجل يحب بقلبه صعب جداً ينساه مهما كابر او تظاهر بالنسيان ، وحبك ياشوق كان كل يوم يثبت جذوره في قلبي أكثر لين ثبت وترسخ وصار صعب إستأصاله ، مش عارف هل حبك ورم عايش معاي أم أكسجين صعب نعيش من دونه .

كنت في العيادة مقعمز مع صديقي "هيثم" نوقعو في بعض الاوراق ، طبعاً هيثم من اعز اصدقائي ومن اقرب الناس ليا والي مانخبي عليه شي ، بس خبيت عليه معاناتي في الحب والولاء لزوجتي ،
كنت في حاجة لأني نحكي لشخص ويشور عليا ، بس كون ان انا راجل حانفقد هيبتي لو حكيت لراجل ع حبيبتي وحبي واموري العائلة "هكي في مجتمعي" ،
حاولت أكتر من مرة نحكي لهيثم بس تذكرت معتقدات المجتمع بالهخصوص فانسكت ونخلي الغصة الي فقلبي ونحتفظ بيها لنفسي

_هيثم نبي نسألك سؤال
_اسأل
_وخود الموضوع بجديات
_تي قول ياراجل مايحشمك شي
_تحب خطيبتك ؟
_شن هالسؤال
_جاوبني ي رااجل
_اي نحبهاا
_لما تفكر فيها تحس بشي في اعماقك ينبض ، تبي تكون قريب منها ديما ، وتحس بإنها شي يخصك ولازم تحافظ عليه
_اي صح ، لاكن ماتقوليش خيرك هالأيام قالبها قيس وليلي ههههه‍
_لا عادي الجو تمام
_ان شالله خير وخلاص هههه‍

ماخديتش اي نصيحة من هيثم ، ومااستفدت شي ، اعتمدت على نفسي وعلى تفكيري وعلي قراراتي .

رجعت مراهق من جديد بشوفتك ، وكأن في أكسجين تجدد في داخلى ، كنتي انتي في كل حياتي وفي كل وقتي ، ورجعتي من جديد محاولة تكوني زي قبل وانا أسواري ضعيفة قدامك ، رغم قوتي الي نتضاهر بيها بس في داخلى أشياء متشتتة ومتلاشية وماعنديش قوة كافية عشان نرممها ونلمها ، لكل واحد فينا نقطة ضعف ، وكنتي إنتي نقطتي الوحيدة والي نضعف منها وعليها ،

أنا انسان والانسان يغلط ، بس أي نوع من الغلط ؟ ، غلط عن غلط يفرق ، هل رجعتك هادي وولادة مشاعر جديدة في قلبي غلط أم رجعتك هيا الغلط ، وين الصح ؟ ، كان كل طريق مظلم قدامي ، أو ممكن انا نظلم فيه لأن قلبي يبيك يبي حبك ياشوق ،

مرت الأيام وكل يوم ننعزل فيه عن الناس وعن نفسي كتر من الي قبله ، مرت عليا الأيام بصعوبة ، خديت إجازة من الشغل مش لأني تعبان ، لأن شوفتك كل يوم الصبح تشد فيا ليك أكتر ، عارف بأن انا قاعد ندمر في نفسي وهالدمار مفش شي يصلحه غير نفسي ، وشن فايدة الاصلاحات والترميمات لو النفس منهارة