صباح الخير
ظلمني القدر والنصيب
بقلم ليلى الركابي
البارت الخامس
،،،،،،،،،
هبة، ،،، تقريبا كملت تجهيزات عرسي وباقيه انتضر بين الخايفه وبين المتحمسه لحياتي الجديدة
امي رجعت وره اسبوعين وقابلين على حسين بس نروح رسمي نخطب
بيوم عرسي بالضبط قبل لا اروح للديالى اجتني رقيه راسها يخر دم ركضت مفجوعه عليها شلتها اشوف الجرح يطفر دم وماتحجي بس تبجي اخذها حسين مني يركض
واني ضليت الوب بالساحة منتضرته ماطول ساعه زمان واجه راسها ملفوف اخذتها غسلت وجها واني اسايسها بالكلام اريد افتهم من الضاربها
طلع ابن جيرانه الورطت حسين وخطبتله حطيت عباتي على راسي ورحت الهم وبتي وياي وامي تصيح حتى ارجع وراي روحه
دكيت الباب وطلعلي ابوهم والله فشلة كتله عندي شغله يم المرة دخل يصيحها ونام فرد نومه ضليت مصلوبه بالشمس يمكن نسوني
طلعتلي حمرتها بحلكها والشعر اصفر كتلها حتى بدون سلام تدرين ابنج شمسوي لو لا
باوعت لرقيه وحجت، ،، بتج تسبه وتغلط عليه ادبيها
هبه،،، هي زين تعرف اسمها منين تعرف للسب خاف ابنج
كالت، ،، لا والله ما تدرين بيها حكج متيهتها بالشوارع تكله انعل ابوك واشك امك وغيرها من الفشاير خلينه ساكتين
سحبت رقيه من ايدها وحطيتها كدامها، ،، بس مو يفشخها اجتني مفرفحه ودمها بطولها تقبلين انيم الطابوكة براس ابنج هسه
بعد كلام هواي اخذت بتي ورجعت للبيت والعصبيه صاعده عندي يوم مصخم من ساسه
لكيت امي منتضرتني نروح وحسين مكتف ايديه استحيت منه واكيد سمع صوتي يلعلع
المهم رحنه للديالى لبيت خالي ابو مرتضى جانو منتضرينه وثاني يوم العرس من بيتهم اطلع
امي كضت حسين الا يشوف البنيه الخطبتها هو كالها مو وكتها بس عافته وراحت صاحتها اني ضحكت وعفته وامي هم طلعت
لكيت رقيه منطلقه وتحجي وي البنات كعدت يمهن جنت حافه ومكمله نفسي
سو حنه بس للولد اني ماردت وثاني يوم رحنه للصالون ويانه خالتي فاطمة مختارين البدله هم
ساعات وكملت وبقينه ننتضر لمن اجه مرتضى من صعدنه عود باركلي بقيت ساكته وامي ردت عليه
رغم رقيه صغير بس جانت تباوعلي بغرابه واحس الدمعه بعيونها انكسر كلبي من شفتها واكفه على صفحة وصافنه عليه
جابتها رهف الي وهي تكلها ماما عروس يلا ضحكت وكفت يمي تسولف
اجت الزفه وحلفتهن بتي تصعد يمي
نزلت البركع ودخل غير لزمتني الرجفه اريد اسيطر الزم الماسكة ماكو اخذ ايدي ومشينه والهوسات ورانه
