#البارت الثامن عشر
#ظلمني القدر والنصيب
#بقلم ليلى الركابي
....................
و ليتنا نستطيع إيقاف الزمن على لحظات كنا بها سُعداء ..!
...................
طفلة نايمه بهدوء بوسط امها وابوها حست على حركة يمها وفتحت عيونها بنعاس شافت امها كامت لبست عبايتها وراحت نزلت من الجربايه تركض وراها ملحكت بيها لان قفلت الباب وراها بجت وهي تردد كلمه ماما
فزيت من نومي وبعدني الكلمه ارددها ماما
شكد اكره هاي الكلمه احسها كابوس باوعت صديقتي نايمه يمي رجعت تمددت ودمعي ينزل مشتاقه لاخواني صار هواي مشايفتهم
رجعت افكر واذكر كل لحضه مؤلمة لان ماعندي بحياتي لحضات سعادة غير خمس سنوات الي جنت بيها ما واعيه للدنيا ومااعرف صاحبك من عدوك
خمس سنوات جان عمري خمس سنوات بس من تركتني امي اول يوم راحت بيتنه انخبص واني صرت ابجي واكلهم اريد امي طفله مااعرف شديصير بس حضن والدة
شالني صالح يسكت بيه كل اخواني وخواتي يمي يردوني اسكت بس بقيت اسبوع وتمرضت كلش مرت صالح وصلاح حارن بيه وشنو اريده يسونه يمكن لو امي ما سوت مثلهن
مرت ايام وتعودت اكلهن اثنينهن ماما وي جهالهن
اختي نجوة كل اسبوع تجي تبقه يومين يمي وتروح
وكوثر بيتهم بعيد بس ما تركتني لازم كل شهر تجي يمي وتبقه هواي يلا تروح
ومياسين تاخذني وياهم كل شهرين ابقه اسبوع اسبوعين وواحد من اخواني يجيبني
اما نور كل يومين يمي نص يوم وتروح
وابوي الي صار وين ما يروح ياخذني وياه وتعلمت عليه واذا صادف مرة نايمه وهو طالع اكلبها مناحه واخواني يطلعوني يودوني يمه
جنت اسمع كلمه خطيه يتيمه وماافهمها
مرت اسنين وصار عمري 10 سنوات دخلت بأحسن مدرسه اهليه ودرجات كلها كامله لان محد يتركني بدون دراسه اخواني واخواتي ونسوان اخوتي كلهم يدرسون ومن غير جهالهم اكبر مني ويهتمون بي
واذا مرة كلت مااشتهي كلها تجي تتوسل يمي شنو تردين وخاف احد مضوجج
تصرفاتهم ودلالهم عودني اعيش هيج واريد ادلل ويميزوني بكل مكان هاذا الشي خلاني اشوف نفسي واتعالى
مجنت اعرف سبب الدلال وليش اني هيج لان جنت صغيرة وما تخطر على بالي هيج اسئله..
مرة طلعت وي ابوي لصديقه جنت لابسه بنطرون اسود وقميص احمر وشعري عايفته مفتوح
شالني وهو يبوس خدي... هلا بفطومه شونج عمو
دفعت بملل ورديت واني ادير بوجهي... زينه
