بسم الله الرحمن الرحيم
#وعد_سليم٢
الفصل الاول
الحياه عودتنا أننا هنواجه مشاكل كتير وزي ما عودتنا نواجهها عودتنا نتغلب عليها ومانستلسمش ليها .
واحتمال كبير نقابل نفس الموقف اكتر من مره في حياتنا ، وكمان مش احنا لوحدنا
فأكيد ناس زينا بتعيش نفس ظروفنا وبتعرف تتغلب عليها وكأننا توأم بس كل واحد في مكانه وزمانه .
كانت بتتزين عشان هي ملكه الليله ،طالعة شبه مامتها بالملي .. الفرق بينهم الحجاب وشويه تجاعيد
وعدين بس الام تختلف عن بنتها في ملامحها الي كبرت .
وبفستانها القصير البيج بكم وكل اما تتحرك اخر الفستان يتحرك معاها لأنه كان واسع من تحت
وبكعبها الي من نفس اللون وشعرها الطويل الي واصل لوسطها ومفروض بطريقه تجنن .
اتكلمت وهي بتلبس الحلق :
مامي !! يلا بسرعه زمان صحابي جم تحت .
ردت عليها وعد الكبيره وهي بتلفلها ،كانت لبسه بنطلون قماش ابيض وعليه جاكت لبني وتحتيه تي شيرت ابيض وطرحتها الي كانت جنان بيها نفس لون الجاكت
كانت لابسه كعب ابيض ،وده كان استايل لبسها دايما مع اختلاف الموديلات والالوان .
بصتلها وهي مضايقه منها ومن صربعتها :
ايه ياوعد براحه مش كده وبعدين استني ملك جايه .
-مين جايب سيرتييي ؟
(ملك يحيي عليان ١٨ سنه نفس ملامح مامتها الهادئه وطبعها الي مش هاديه خالص )
دخلت عليهم وهي بسلوبيت اسود أكتافه عريانه وشعرها عملاه ديل حصان وهو اسود
كانت لابسه جذمه واطيه من اللون الفضي :
ايه ياست وعد براحه يلا انا جهزت وخدي السلسله الي عيزاها اهيه ممكن نخلص .
لبستها فعلا ،وانضمت ليهم نور الي فضلت زي ماهي وجسمها الي حافظت علي رشاقته
كانت لابسه بلوزه بيج تليق بالسهره وبنطلون جينز اسود وشعرها رفعاه بفورمه تليق بسنها :
ايه ياحلوه منك ليها مش يلا ولا ايه ؟!
وعد الصغيره بصتلها وبتمثيل الزعل اتكلمت :
كده ياخالتو ده انا عيد ميلادي حتي انهارده .
راحتلها ومسكتها من ودنها واتكلمت :
عارفه كنت هديلك هديتك بس عشان خالتو دي مافيش
حضنت خالتها من كتافها كده :
خلاص احلي نور في الدنيا والله .
وراحت باستها من خدها .
بصتلها بطرف عنيها وضحكت نور وقالت :
بتكلي بعقلي حلاوه بس موافقه .. يلا ننزل وتحت هدهالك .
--------------------------------------------------------------------
أما تحت بقي فكان الوضع كالتالي ،سليم ويحيي ويوسف واقفين بيتكلموا مع مجموعه من رجال الأعمال .
شروق بفستانها الموف البسيط والحجاب الي قررت تلبسه وكان من نفس اللون ،كانت بتلف في المكان تسلم علي الناس والي محتاج حاجه تدهاله
بأن عليهم كلهم العجز بس برغم ده كله لسه حلوين وخصوصا سليم الي مهما يكبر شكله عشريني
سمعت حد بينادلها لفت كان شاب زي القمر واخد طول وشعر أبوه وعيون أمه ،لابس جاكيت كحلي وتحته تي شيرت ابيض وبنطلون جينز ازرق :
خالتوووو ايه الجمااال ده .
(يونس سليم عليان عنده ٢١ سنه ومرح جدا وبيعمل بلاوي في البيت وبره البيت طويل رشيق واخد شعر أمه الاشقر وعيون وملامح أبوه )
ردت عليه وهي حطه ايديها علي كتفه :
يايونس يابكاااش .
ضحك جامد ورد عليها :
والله ابد زي القمر ،بقولك ايه ؟!
سألها وهو بيوطي صوته فسايرته :
هو بابا عرف الي حصل ؟!
بصتله بضحكه وردت عليه :
سليم ابوك لو كان عرف ماكنش سابك هايص كده .
وسابته ومشيت .
بره الفيلا وخصوصا في جنينتها وعلي المرجيحه كانت نور الصغيره الي شبه اختها الكبيره في كل حاجه بس الفرق أن نور شعرها قصير واسود ووعد شعرها طويل وبني
كانت لابسه فستان اسود طويل ومقفول من فوق وشعرها واصل لرقبتها .
وجمبها قاعد صديق طفولتها عاصم الي فضل زي ماهو كل عيد ميلاد ليه يجبلها هديه وبالفعل كان بيقدملها الهديه في نفس المكان :
هديه كل سنه .
كان مبتسم زي أبوه بالظبط نفس الجسم والطول والعرض لكن شعر وعيون أمه ،كان دايما المختلف مابيحبش يتقيد بلبس كلاسك لا الكاجول كان استايله الأساسي عشان كده لبس تي شيرت اسود وبنطلون جينز ثلجي .
ردت عليه وهي بتقدمله علبه صغيره :
بمناسبه عيد ميلادك ال ٢٦ احب أهديك الهديه دي .
فتحها وكانت عباره عن سلسله فضي وفيها دلايه بتتفتح جواها صوره ليهم هما الاتنين مع بعض .
لبسها بسرعه ونور اتكلمت :
اوعي تقلعها بقي دي مني ليك .
هز رأسه ببسمه وماتكلمش .
نرجع تاني جوه ،ونلاقي بنوته جميله لابسه فستان احمر قصير ومقفل من فوق وكعب عالي اسود ، وعامله شعرها الأسود الطويل علي جمب
بشرته بيضاء وعيونها غامق زي لون شعرها
(سيلين يوسف عليان عندها ١٨ سنه منطويه مش مختلطه بحد حتي مش مختلطه بحد في البيت بس ممكن تختلط شويه مع وعد الكبيره )
كانت واقفه علي جمب ،بس في ولد جالها ،هي ماتعرفوش بس خمنت انه من زمايل وعد من الشغل (وعد حبت تستقل وتبقي في مكتب محاماه )
كان وسيم ولابس كلاسيك طويل ورفيع وشعره مجعد بس كان حلو .. وعيونه سوداء :
مساء الخير .
ردت عليه من غير نفس :
مساء النور .
مد أيده يعرف نفسه :
فؤاد السيد زميل وعد في المكتب .
بصتله وماتكلمتش جات تمشي مشي وراها وهو بيتكلم بردو :
هو انتي ماسلمتيش عليا ليه .. انا بس كنت عايز اتعرف عليكي مش اكتر أن....
بس وقف لما لقي واحد طويل وعريض بيعترض طريقه ،سيلين لفت وماتكلمتش بس هو اتكلم بنبره غامضه :
احذر انت في بيت محترم هنا ومع عيله عليان محدش يعمل كده .
انسحب بهدوء وهو محرج ،فلفلها اتكلمت بشكر :
يونس شكرا جدا ليك
(ياسين سليم عليان توأم يونس ٢١ سنه واكبر منه بخمس دقائق واي نعم توأم بس في الشكل بس اما الطباع مختلفه تماما فياسين هادي جدا وعاقل )
كان لابس بدله من اللون الرمادي فاتح وشعره بيعمله قصه مختلفه كمان عن اخوه فكانت بتدل علي شخصيته وأنه هادي جدا .
رد عليها باختصار :
العفو .. بس احذري .
النور اتقفل ونزلت وعد الصغيره من علي السلم والمزيكا اشتغلت .
الكل بصلها وهي راحت ناحيه التورته الي كانت كبيره اوي وعليها صورتها علي السفره .
بصت حوليها بتدور عليه مش لقياه
ظهر عليها انها مضايقه ،سألتها شروق :
مالك ياحبيبتي .
طبعا كان بهمس وهي ردت عليها بهمس :
هو ماجاش ولا ايه ؟
لسه هترد عليها ظهر شاب قدامها في نفس العمر وكان طول بعرض وببسمه مبينه غمزاته رغم الاضاءه البسيطه اتكلم :
آسف يا سندريلا بس ماكنش ينفع اجي من غير هديتك .
بصت ليه بفرحه وبعدين بدأت تطفي الشمع .
بعد ماخلصوا وفتحوا النور ظهر لبسه الي كان عباره عن جاكيت بني وتحتيه تي شيرت بيج وبنطلون الجينز بنفس اللون لكن بدرجه تليق .
شعره الاسود الغزير وعيونه العسليه وغمازته كانوا مخلينه ولا عارضين الازياء كان هو أول واحد يقولها :
كل سنه وانتي جميله .
-وانت كمان كل سنه وانت طيب .
اتكلمت وعد الكبيره :
عاصم سليم ووعد كل سنه وانتو طيبين ياولاد .
الكل فاللهم كل سنه وانتو طيبين .
سليم الكبير وهو متألق ببدله سوداء راح لحبيبته وعد باس ضهر أيدها واتكلم :
كل سنه وانتي معايا .
ضحكت جامد بكسوف وبرغم سنهم ده لسه بتتكسف بردو بس ردت عليه :
هو انت كل عيد ميلاد للولاد تقولي كده .
رد عليها وهو باصص في عيونها :
طبعا مش انتي الي جبتيهم يبقي عيد ميلادك انتي .
ضحكت مره تانيه وبعدين بص الناحيه التانيه لبينته وراح قدملها علبه صغيره قطيفه :
كل سنه وانتي طيبه يانور عيني .
مسكتها بفرحه وفتحتها فكان انسيال الماس رقيق جدا ،اتفجأت بيه وراحت حضنت ابوها جامد :
ربنا مايحرمنيش منك ابدا يا بابي .
طبطب علي ضهرها بفرحه وبعدين نزلت بصت لسليم الصغير وقالتله بتكشيره :
فين هديتي .
سحبها من ايديها وخدها علي الجنينه وهو بيقول :
جماعه اتفضلوا معايا دقايق بس .
بالفعل راحوا معاه ودقيقه وكانوا في اوضه معموله من الخشب متزينه من بره ... دخل وفتح النور كان بني هادي اوي وكله كان عباره عن كتب مترتبه بطريقه حلوه ومرسوم بالكتب دي اسم وعد ،وفي كنبه متوسطه في حجمها وفيها نور ابيض .
بصتله بعدم فهم وهو بصلها وبابتسامه حب اتكلم :
دول روايات والنوع الي انتي بتحبيه ، وهنا (شاور علي الكنبه) تقعدي تقري وقت ماتحبي ودي عزلتك ومملكتك من النهارده .
ردت عليه بفرحه وهي داخله بتتفرج بشغف :
سلييييم بجد مش عارفه اقولك ايه ماتحرمش منك يارب .
-ولا منك ياحضره المحاميه .
ربع أيده وبيتفرج باستمتاع علي فرحتها ،سليم الكبير طبطب علي كتفه كذا مره بفخر واتكلم :
تسلم ايدك .
بصله بفرحه وماتكلمش .
------------------------------------------------------------------
دخلوا جوه تاني وابتدي كل واحد يندمج مع التاني
يوسف الي بأن عليه الكبر بس هو بيحاول يخفيه باي طريقه وكان لابس بدله كحلي وقميص أبيض تحتها لقي نور الكبيره واقفه مع شروق راحلها وساحبها من أيده وهو بيقول :
معلش بس كده اسحب مراتي دقيقه .
ضحكت شروق ونور اتكلمت :
انت بتسحب جاموسه .
-اكتر ياقلبي
برقتله جامد :
نعممم؟!
كمل سحبها ورد :
ياستي تعالي بقي هقولك حاجه .
راحت معاه ووقفوا علي جمب ونور بتكشيره :
نعمممم
بصلها وانشكح :
وحشتيني .
بصتله وهي رافعه حاجبها واتكلمت :
وده وقته يعني ؟!
مسك أيدها وباسها :
ده في اي وقت وكل وقت .
نزلت ايديها بسرعه :
بس يايوسف الناس .
مسكها تاني ورد :
مراتي ياجدع الله .
وبسها تاني ضحكت علي جنانه الي هيفضل متلازمه حتي وهو كبير كده .
----------------------------------------------------------------------
شروق كانت واقفه مع سيده اعمال مهمه فجأه لقت الخادم بيقدملها ورده حمره فيها كارت علي صنيه تقديم ،خدتها وهو مشي وفتحتها ولقت فيها "الموف حبيته بيكي ياجوفيتي
يحيي"
بصت ليه وهو واقف بعيد عنها وابتسمتله بفرحه وهو كذلك .
فاقت علي كلام الست الي وافقه معاها بتقول :
يحيي بيه جان خالص .
بصتلها ببسمه بسيطه وبعدين بصت ليحيي تاني بقلق .
-----------------------------------------------------------------------
ملك وبعد ماترددت كتيير اوي عملت الخطوه دي وراحت لياسين الي كان واقف لوحده بيبص علي حمام السباحه ومش بيتكلم :
بتعمل ايه ؟!
بصلها بطرف عينه وبعدين رجع بص اودامه ورد :
مابعملش .
-انت ليه مش مندمج معانا ؟!
قالتها وهي بتتمني يبقي معاها كلام بس هو اختصر في رده :
ماليش في جو الحفلات ده .
اتنهدت وهي مش عارفه تقوله ايه فسابته ومشيت أما هو فضل زي ماهو وحتي ماخدش باله أنها دايما بتحاول تتكلم معاه .
-------------------------------------------------------------------
كان بيتكلم في التليفون بهمس في ركن لوحده عشان ماحدش ياخد باله :
يابني خلاص ابويا معرفش حاجه ... ياعم هنسهر انهارده زي كل يوم ، ايوه ياعم وهرجع زي انهارده ومحدش خد باله اصلا .
وقف كلام لما سمع صوتها بتنديله بصدمه :
ياااسين !
لفلها ببطئ وبعدين اتكلمت تاني :
انا لازم اقول لعمو سليم فورا .
وسابته ومشيت بسرعه .
أما هو فبقي علي حافه الهاويه هل فعلا هتقوله ولا ده مجردتهديد في الفصل التاني انتظروني
الفصل الاول بسيط مافيهوش لا توقعات ولا تنبأت اوي .
عملت جزء جديد لان في بعض التعليقات شوفتها بتقولي اني مابينتش جانب من الجوانب في الروايه لازم يبقي موجود ممكن يكون سهو عليا بس هظهره في الجزء ده انشاء الله
واتمني يعجبكم زي الجزء الاول ❤️
#تيسير_محمد
