بسم الله الرحمن الرحيم
#وعد_سليم٢
الفصل السادس
كسره القلب مابتحصلش الا لما بتيجي من اقرب الناس ،اصل لو ناس مش همانا افعالهم زيهم مش هيفرقوا معانا .
وده الي حصل بالظبط مع سليم الي اتفاجأ من اندفاع وعد حبيبته ،ازاي ترفضه اكيد بتهزر والموضوع هيخلص دلوقتي اكيد .
سليم الكبير وهو لسه قاعد علي كرسيه اتكلم :
ليه يا وعد ؟!
بصت وعد لسليم الصغير بتستشف منه رده فعله ممكن تبقي عامله ازاي لو اتكلمت
حست أنه هينفجر بعد شويه فهي عرفته كويس ،رجعت تبص لابوها وحاولت تتصنع الشجاعه واتكلمت :
رفضي مالهوش سبب .
كانت هتمشي بس سليم الصغير اتكلم وهي وقفت :
بس أنا مش هقبل بالرفض ده إلا بسبب .
غمضت عينها وهي مدياله ضهرها لو قالت مخاوفها هتجرحه بس هي معهاش كلام تاني تقوله .
أما سليم الكبير فقاعد في صمت بيترقب حركاتهم ونظراتهم وتعبيرات سليم بالذات ،وعد لفت ببطئ وهي بتحاول تبقي جامده في تعاملها واتكلمت :
مش مجبره ابرر لحد ... بابا اسمحلي انا اتاخرت ولازم امشي بعد اذنكم .
وبالفعل مشيت وسابته مش مستوعب ،مش مصدق الي بيحصل مش دي وعد الي كانت من يومين بس مهتميه بيه وعملاله اكل كمان .
أما سليم الكبير فسكوته ده مش بالساهل ابدا .
------------------------------------------------------------------------
باقي اليوم عدي بسرعه وجه يوم جديد وببدايته بدأت خطه نور الصغيره وشروق ع ابنها عاصم
كانوا قاعدين علي الفطار زي كل يوم والصمت مخيم عليهم ونور الكبيره انهارده بردو مش موجوده رغم محاولاتهم الكتيره انها تنزل معاهم بس هي حبسه نفسها في الاوضه .
شروق بصت لنور كدليل علي اشاره مابينهم قبل ماتبدأ تتكلم شروق وتقول :
سليم وعد !!
الكل انتبه ليها فهي كملت كلامها :
في عريس متقدم لنور وعايز ياخد معاد ويجي .
نور كانت بتابع عاصم من تحت لتحت ،عاصم الي مابنش عليه أي غيره أو اي تعبير يدل انه مضايق
أما سليم الكبير ساب الشوكه والسكينه واتكلم :
مين ده وعرفها منين ؟
-رجل اعمال شاب عنده ٣٠ سنه وطبعا شاف نور في حفله من الحفلات الي بنحضرها مع رجال وسيدات الأعمال الكبار .
اتكلمت وعد لاول مره :
ماقولتليش عليه ليه ده ؟
-هقولكم كل التفاصيل بس نخلص اكل الاول .
أما نور فظهر عليها اليأس لما لقت عاصم زي مهو بيتكلم ولا همه .
----------------------------------------------------------------------
الكل راح ع أشغاله الا يحيي ووعد الي قرروا يقعدوا يخلصوا شويه حاجات من البيت
وعد حطت الورق علي المكتب بتعب وقلعت النظاره بتاعتها واتكلمت :
يحيي انا تعبت بجد ماكفايه كده انهارده .
كانوا قاعدين علي الكرسين الي اودام بعض في المكتب بتاع سليم ،يحيي حط الورق هو كمان واتكلم :
خلاص ياحبيبتي انا هكمل باقي حاجات بسيطه .
سكتت شويه وبعدين اتكلمت بتفكير :
هو يوسف هيفضل بعيد كده لحد امتي نور صعبانه عليا اوي .
رجع ضهره لورا واتكلم بتعب :
والله مش عارف بس اكيد في حاجه غلط .
قامت وهي بتتكلم وبتتأوه من ضهرها وده طبعا عشان أنها مابقتش صغيره زي الاول غير أن القعده تعبتها :
انا هقوم أشوفها عشان انا مش مطمنلها .
شاورلها بمعني انها تروح وهي طلعتلها فعلا ،هو مسك الورق وكمل لحظات ولقاها بتنادي عليه جامد :
يحيي الحقني نور .
رمي الي في أيده وطلع ليها بسرعه وهو مخضوض .
-------------------------------------------------------------------
عدي كام ساعه ونلاقي ملك ووعد داخلين علينا ،فوعد خلصت شغل وملك راحتلها تروح معاها فهما صحاب جدا
ملك قعدت بتعب علي اقرب مكان ليها واتكلمت :
يعني عايزه افهم بردو رفضتي ليه ؟
وعد قعدت جمبها وردت وهي مضايقه :
مش هتفهميني .
لفت بجسمها كله وقعدت بجمبها واتكلمت :
لا نفهم قولي .
فضلت ساكته شويه مش عارفه تقول ولا ماتقولش بس في الاخر قررت انها تقول بعد ماتنهدت :
خايفه يكون زي عمو يوسف ساعتها هقتل نفسي ،خايفه اتعلق بيه ويخوني يا ملك و....
وعد ماكملتش كلامها لأنها لاحظت أن ملك وشها قلب :
مالك يا بت ؟
لاحظت انها بتبص وراها بصت للمكان الي بنت خالها بتبص فيه لقت سليم سمعهم .
--------------------------------------------------------------------
خلصوا الاجتماع اخيرا ورجعوا ع المكتب ،عاصم قعد مكانه ونور اودامه وهي بتتكلم :
كويس أننا خلصنا الصفقه دي كانت ملعبكه شويه .
هز رأسه بنعم ورد عليها :
جدا يلا الحمد لله .
سكتوا شويه بس نور كانت لازم تتكلم :
ماقولتليش ايه رايك في موضوع جوازي ؟
بصلها بابتسامه ورد بهدوء :
والله انا شايف أن ده الوقت المناسب انك تتجوزي بس استني اعملك تحريات عنه عشان انتي مش اي حد عشان اجوزك لاي واحد والسلام انتي اختي .
الكلمه نرفزتها وهي اضايقت اوي وفي لحظه قامت بسرعه واتكلمت جامد قبل ماتمشي :
عن اذنك رايحه الحمام
قفلت الباب وراها جامد وهو مش فاهم مالها وبيبصلها باستغراب ،لسه ماشالش عينه من علي الباب لقي موبايلها بيرن لمح اسم أمه علي الشاشه فابتسم وقرر أنه يرد
لسه ماقلش الو وشروق اتكلمت :
الخطه ماشيه تمام طبعا .
-خطه ايه ؟
والكلمه دي الي قالها عاصم وخلي أمه تبرق جامد من الخضه .
---------------------------------------------------------------------
يونس دخل بسرعه مخضوض علي ملك الي واقفه اودام باب المكتب :
يونس اتاخرت ليه ؟
-مسافه الطريق ايه الي حصل ؟
-وعد وسليم جوه وسليم بيطلع نار من وعد وعماله سامعه زعيق جامد وحاجات بتتكسر .
يونس مش فاهم في أي بالظبط ،لسه هيخبط علي الباب لقي وعد بتفتح الباب جامد وبتطلع بسرعه علي اوضتها ،اما سليم فواقف بينهج جامد ولا كأنه كان في حرب .
ملك جريت ورا وعد تفهم منها الي حصل ،اما يونس فكان لسه هيدخل لسليم سليم رفع كفه كاشاره أنه مايتقدمش ويروحله وهو خرج بسرعه من المكتب والبيت كله .
--------------------------------------------------------------------
-يالهوي يا نور نشفتي دمنا .
ده كان كلام وعد الي قاعده جمب نور اختها في المستشفي بعد مافاقت اخيرا
يحيي اتكلم وهو قاعد علي الكرسي الي جمب السرير واتكلم وكأنه بيعاتب :
من قلت الاكل والتعب ها .
بصتله ومش قادره تجادل معاه ،لحظات ودخل سليم الكبير وهو بيقول :
السلام عليكم .
ردوا السلام وهو لسه فاتح الباب ولسه وعد هتتكلم بس سكتت لما لقت يوسف داخل ورا اخوه من الباب :
سلام عليكم .
قالها بتعب ونور اول ماشافته برقت جامد واتكلمت بزعيق :
انت ايه الي جابك هنا ؟
رد عليه وهو مش متفاجأ من كلامها :
جاي اشوف مراتي .
هنا بقي نور انفعلت واتكلمت وهي بتشاور بايديها ووعد بتحاول تحوشها :
لا مراتك دي كانت زمان لما كنت مبطل حركات العيال الي كنت عاملها دي لكن دلوقتي انت لازم تطلقني .... طلقني يا يوووسف .
وهنا الكل سكت ومقدرش يتكلم .
----------------------------------------------------------------------
خرجت من اوضه وعد صاحبتها وبعد محاولات من ملك باءت بالفشل قررت انها تسببها وتجيلها مره تاني
كانت هتروح لاوضتها لقت ياسين اودامها ،بصتله وهي قلبها بيدق جامد وده طبعا بيحصل كل اما تشوفه
أما هو فقدملها الموبايل بعد ماصلحوا ومسكته وكانت لسه هتسحبه فضل مسكه ،بصتله باستغراب والبسمه الي ع وشها راحت فاتكلم ياسين بشك :
رقم مازن بيعمل ايه عندك ؟!
وهنا ملامحها اتغيرت تماما مابين الاستغراب وعدم الفهم
في حاجات جديده هتظهر وحاجات قديمه بتخلص مين قلبه هينتصر ومين قلبه هيتكسر
وعد سليم ٢ تابعوني
#تيسير_محمد
