انا النهارده كنت حاسه ان الاهلي هيكسب بما أنه فريقي المفضل وعشان الفرحه دي وبرغم أني مالقتش تفاعل حلو ع فصل امبارح قررت انزل فصلين انهارده واتمني تفرحوني وتتفاعلوا ❤️
بسم الله الرحمن الرحيم
#وعد_سليم٢
الفصل الحادي عشر
كل فرد ليه غلاوته عند أهله وفئه من الي حواليه مابيحسش بالمحبه دي الا لما يغيب أو حتي حاجه تصيبه سواء فرحه أو حزن
وعد وسليم الصغيرين وصلوا اودام مديريه الامن بعد ماسليم عدي عليها وخدها وبصفتها محاميه فهي قدرت تساعدهم كتير اوي في أنهم يكشفوا عليه ،طبعا اول ما وصلوا كان يونس مستنيهم فوق .
دخلوا علي قاعده البيانات الخاصه بالمسجلين وقدروا بعد ماكتبوا اسمه أن يظهر لهم عنوان تاني وفي اللحظه دي كان في نفس المنطقه الي فيها عربيه سيلين مبعوت قوه للبحث .
اتضح من البحث في البيانات أنه اتحبس خمس سنين في قضيه مخدرات وبسرعه ونظرا لأن عائله عليان معروفه ومع بعض التوصيات قدروا يتحركوا بسرعه مع الشرطه .
اتفق يونس أنه يتحرك للعنوان وسليم الكبير ويحيي ويوسف يلحقوه ،اما سليم الصغير فضل مع وعد يدوروا في بياناته عن أهله أو صحابه تحسبا أنهم مايلقهوش في العنوان ده
--------------------------------------------------------------------
كان شايلها وهي مغم عليها وبتنزف ،حطها علي ارض في مكان من الضلمه مش باين ملامحه بس ممكن يبقي بدروم
اتكلم الراجل التاني الي كان لابس جلابيه صعيدي وتخين وبشنب عريض ،ولابس طقيه بيضه علي رأسه وقال بصوت تخين :
بص يااشرف هتروح تبلغ الناس وشوف هنخلصوا ميتا انت عارف السن ده مش تخصصي واني مافييش حيل .
اتكلم الشاب الطويل والعريض الي لابس قميص ابيض مفتوح نصه ،بشرته قمحيه ورافع شعره بطريقه شبابيه :
يامعلم متولي انا ماكنتش مخطط اني اجيبها انا وصفاء لقيناها وقولنا انت اقربلنا .
-طب وصفاء فين دلوك ؟
-رايح يشوف الناس ويستعجلهم أننا نخلص قبل ماتفوق .
كان بيبص عليها وهو بيتكلم فمتولي رد عليه :
باين عليها بت ناس .
كمل اشرف وقال بسرعه :
عشان كده لازم نخلص بسرعه قبل ما أهلها يعملوا شوشره ... هطير انا .
سابهم ومشي ،متولي قعد اودامها علي الكرسي بتاعه ومسك الشيشه ونده علي الصبي بتاعه :
تعالي ياولد غيرلي الحجر خلينا نشوف آخره المصيبه دي ايه .
--------------------------------------------------------------------
خبط الكرسي الي اودامه برجله جامد وهو بيتكلم :
يعني رااااح فين ؟
ده كان صوت يونس الي اول مالف لقي عمه وخاله وأبوه
فسليم بأن من وشه أنهم فهموا أنه مش موجود فسليم اتكلم موجه الكلام ليحيي :
يحيي !! اتصل بوعد وسليم قولهم يكملوا تدوير .
وبالفعل حصل كده ،اما يوسف فمقدرش يعمل حاجه غير أنه نزل يقعد في العربيه وهو بيحاول يصمد .
سليم استغل أن يحيي بيكلم وعد وراح لابنه بعد مارقبه للحظات وحط أيده علي كتفه واتكلم :
مش مرتاح لنرفزتك دي .
يونس بص لابوه وماتكلمش لانه مش فاهم وسليم كمل كلامه :
انت مهتم اكتر من اخوها ،في حاجه صح ؟
نفخ ورد وهو بيبص الناحيه التانيه :
بابا مش وقته الكلام ده سيلين هي الي اهم .
هز رأسه باقتناع وهو بيتوعد أنه يخليه يعترف في مره .
------------------------------------------------------------------
نور وعاصم رجعوا البيت بناءا علي طلب سليم عليان بأن لازم يبقي في حد مع الامهات في البيت
اول ماعاصم وقف بالعربيه اودام القصر نزلت نور من غير ماتتكلم مع العلم انها مافتحتش بوقها معاه طول رحلتهم في الدوير علي سيلين
-نور!!
كان نداء عاصم ليها ،غمضت عنيها وبعدين فتحتها وبصتله :
يانعم .
-هتفضلي سايقه الهبل ع الشيطان كتير .
كان سؤال عاصم ليها وهو واقف اودامها مش بيفرقهم الا سم ،ردت نور بكل قوه :
نعم انت واعي للي بتقوله ؟
-ايوه انتي بتستهبلي من الصبح
ربعت ايديها وردت عليه :
والله بقي استعبط استهبل براحتي .
هنا عاصم علي صوته واتكلم بعصبيه :
والله اتغابا عليكي
-ايه هتمد ايدك عليا يعني ؟
رد بقوه اكبر :
واكسر دماغك كمان لو ماتعدلتيش معايا من امتي بقيتي كده ؟
-من وقت ماستغبيت و....
وهنا وقفت فهي كانت هتقوله بس هو لازم يسأل علي قصدها :
استغبيت وايه كملي ؟
ماردتش وودت وشها الناحيه التانيه ،قرب منها ومسكها من كتفها واتكلم :
قولي استغبيت في ايه ؟
بصتله بخوف وتوتر فهي مخها واقف ومش عارفه تعمل ايه .
-----------------------------------------------------------------
بعد ما عرفوا اخر الاخبار من وعد عن طريق ملك لما بتكلمها كل شويه ،ياسين قاعد جنبها في العربيه ومرجع رأسه لورا بتعب ساندها علي ضهر الكرسي
اتكلم بقلق :
يارب يلاقوها بقي لان قفله موبايلها وعربيتها الي عامله حادثه وهي مش جواها دي يبقي مافيش حاجه طبيعيه .
كملت ملك باختصار :
خير ان شاء الله .... ممكن اروح ؟
رفع رأسه وبصلها واتكلم :
مش ناويه ترضي عني بقي ؟
-ارضي عنك في ايه يابني ؟
كانت بتستعبط وهو بصله بصه تدل علي أن هو فاهمها
-ماتبصليش كده يا ياسين بعد اذنك .
-انتي قولتي ايه ؟
اتخضت من سؤاله فردت باستغراب :
ماتبصليش كده .
-ايوه ياايه بقي ؟
فكرت مع نفسها لحظه وبعدين فهمت فسكتت وهي مكسوفه فكمل ياسين :
اول مره احس أن اسمي حلو كده ؟
بصلها بحب وهي مكسوفه وهي بعد فتره رفعت عيونها ليه ونسيب الاتنين يسرحوا في بعض .
--------------------------------------------------------------------
بعد ما وعد وسليم بلغوهم بأماكن أصحابه اكتشف أن في تلاته يعرفوه والتلاته دول بينهم وبين بعض في السكن مش كتير
وبعد ماراحوا لأول واحد اخر واحد عرفوا أنه كان معاه
دلوقتي يونس وسليم ويحيي ويوسف والشرطه كمان في بيته وبيسألوه وهو بينكر :
معرفوش بقالي كتير ماشوفتوش .
يوسف اتكلم بانفعال :
عليا النعمه لو ماتكلمت ليبقي اخر يوم في عمرك .
الظابط كمل بعد يوسف وقال :
تحب تتكلم هنا ولا في القسم وتتروق بحاجه علي كيفك .
بلع ريقه وبص بخوف وماتكلمش ،يونس ماستحملش اكتر من كده قام ضربه لكميه ومسكه من ياقه قميصه وقومه بعد ماكان قاعد وجرجروا منها وهو بيقول :
انت هتيجي معانا حالا لمكانه والا .....
جرس تليفونه رن قاطعهم ،مسكه يونس بسرعه فظهر اسم صفاء ففتحه عليه وفتح الاسبيكر :
اشرف انت فين ؟
يونس شاورله علي اساس يرد ولما لقته مرداش راح زقه بايده في رقبته بتهديد فرد :
في البيت .
-لا سيب الي في ايدك وتعالي علي البدروم القديم هنعمل العمليه هناك ماتتاخرش .
وقفل السكه علي طول .
سليم قرب من أشرف واتكلم :
عمليه ايه ؟؟!
يحيي اتكلم وراه :
ماتنطق .
حس أنه خلاص وقت انه يتكلم فقال :
تجاره أعضاء
ومن هنا صدمه احتلت الكل .
--------------------------------------------------------------------
نقلوها للبدروم القديم زي ماتفقوا ،حطوها في شوال كان موجود في الأرض واتكلم صفاء الي كان لابس تي شيرت اخضر وبنطلون اسود واقرع وبشرته بيضاء وقصير :
ها يا دكتور خلصت ؟
كان في سرير طبي وعليه واحد ميت بطنه مفتوحه ومتفضي من جميع أعضائه
والدكتور لابس البالطوا وماسك المشرط والجوانتي الي لابسه كله دم ،رفع رأسه واتكلم :
شيلوه يلا خلصنا ... استني ارتاح شويه ونبدأ فيها
-لا دي بالذات لازم تخلص في ساعتها .
هز الدكتور رأسه وحطوها مكان الي قبلها فسمعوا كلامه
شال الكمامه من علي بوقه وبص لصفاء واتكلم :
مش هبدأ شغل الا لما اخد فلوسي كلها .
-عيب عليك خلصها وعلي اتفقنا
-لا انتو خنصرتوني في نص فلوسي .
صفاء بنفاذ صبر واتكلم :
بقولك ايه أنجز عشان دي بالذات انا خايف منها لان أهلها مش اي حد بأن من بطاقتها انها من عيله عليان .
الدكتور خاف وبعد شويه لكن صفاء طمنه :
ياعم ماتقلقش أهلها مايعرفوش حاجه والا كنا في التربه يلا .
ليبدأ الدكتور بعد ماداها حقنه البنج أنه يمسك المشرط ويحطه علي المنطقه المطلوبه في بطن سيلين الي كانت في الضياع .
وتنقسم الشاشه بين سيلين الي بيبدأ الدكتور في عمليته فيها ويونس الي كان بيسوق بسرعه كبيره عشان يوصل للمكان
هيوصلها ولا مش هيلحقها وهتتضرر ،نور هتضعف وهتعترف ولا في منقذ هيجيلها
يونس بان عليه الحب بس مسير أبوه يخليه يعترف ،هل ملك كده حنت ولا لازم ياسين يتعب شويه
واخيرا ايه منتظر كلامن سليم يوسف عليان ووعد سليم عليان وشروق ويحيي كمان
وعد سليم ٢ تابعوني
#تيسير_محمد
