السلام عليكم ورحمة الله وبركاته 💙
صباحكم معطر بذكر الله
كيف الحال؟
جواهرنا
SosoAlijet
س1 :هل المجاهدة في ترك المعاصي لها ثواب حتي لو اتأخر عن ترك معصية معينة بس بحاول ان معملهاش تاني وللعلم هي مش ذنوب خلوات خالص.
الإجابة :
طبعًا ، ربنا بيقول "وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا " ..
فكرة إنك متعلق بذنب جدًا ومش عارف تسيبه ،
لكن بتجاهد عشان تتركه ،
وتفتكر أن من ترك شيئًا لله عوضه الله خيرًا منه.
مجاهدتك دي مش هتضيع هباءً عند ربنا ،
حتى لو بتقع تاني في نفس #الذنب..
المهم متيأسش وتفضل تجدد توبتك ،
وتدعي ربنا يتوب عليك منه
لو وقعت للمرة الألف ، قم وتب للمرة الألف وواحد ، ولا تقنط من رحمة الله.
سيقبلك ، فربك غفور رحيم كريم ..
___
___
ربنا يثبتك ويرضى عنك ويتوب عليك ويغفرلك ويرزقك خيري الدنيا والآخرة ويسعد قلبك ويجبر خاطرك ويحبب قلبك في الطاعات ويكره قلبك في الذنوب والمعاصي ويقسم لك من خشيته ما يحول بينك وبين معصيته يارب.
__
لا حول ولا قوة إلا بالله العلي العظيم.
س2 :
طيب شوف انا بحب بنت جدا وبجتهد عشان اتقدملها وكلامنا بسيط جدا وقولتلها مش عاوز نتكلم تاني عشان حرام بس اول ما اجهز هاجي اتقدملك لقيتها بتقولي دي حجج عشان تتهرب و كلام من ده اعمل ايه ؟
الإجابة :
بتحبها هي أكتر ولا ربنا ؟؟؟
عاوز ترضيها هي ولا ترضي ربنا ؟؟
خايف لتتخطب وتجوز حد غيرك ولا خايف ربنا يغصب عليك و تُعذب بسببها ؟؟
هل تظن إنها هتبقى زوجة صالحة أو يبقى في بركة لو كانت من نصيبك وهي عاوزاك تستمر في علاقة مُحرمة ؟؟
هل دا حب أصلاً ؟؟
هل هي فيها مواصفات الزوجة الصالحة ؟؟
_اسأل نفسك الأسئلة دي و لما تلاقيلها إجابة اعمل اللي انت عاوزه ...
____
لا حول ولا قوة إلا بالله العلي العظيم.
س3 :
و للعلم ان انا بجاهد نفسي كتير جدا عشان مكلمهاش و مردش عليها و ممكن اقعد بالأيام مردش عاوز اقطع العلاقة الحرام و مش عارف احنا اه بينا كلام بسيط بس لا يجوز.
الجواب :
وأنت ليه تعذب في نفسك وتجاهد وممكن تقع وتكلمها !!
احترم ضعفك ربنا عز وجل بيقول : (وخلق الإنسان ضعيفا) ..
بلوووووك يا حبيب قلبي طالما الموضوع كدا ...
لو هي صالحة وعاوزة ترضي ربنا تمام ، لو لأ وعاوزاك تستمر في الحرام يبقى مع السلامة ..
ومن ترك شيئاً لله عوضه الله خيراً منه.
واعرف ان " ما عند الله لا يُنال إلا بطاعته"
____
لا حول ولا قوة إلا بالله العلي العظيم.
س4 :
هي دينيا كويسه بتصلي و بتحفظ قرآن و انا والله لولا اني بحب ربنا اكتر من اي حاجة لولا اني تعبان كده يا رفيق اوكل امري لله و اعملها بلوك.؟
الجواب :
بلوك يا حبيب قلبي ، ربنا أولى وأحق..
رزقك بإيد ربنا وحده ، طول ما بترضي ربنا اعرف إن ربنا هيراضيك ..
لو كلمتوا بعض خفيف هيبقى ذنوب وممكن متكونش من نصيبك ولو من نصيبك ليه تبدأوا حياتكم بحرام والعياذ بالله ويبقى فيه محق بركة..
____
لا حول ولا قوة إلا بالله العلي العظيم.
س5 :
ونعم بالله يا صديقي ادع لي بالتوبة و الثبات بالله وهعمل بلوك ان شاء الله ولو في نصيب الله قادر يجمعنا
الجواب :
هدعيلك دايماً يا حبيب قلبي.
بس بالله عليك تثبت وتوكل على الله وبلوك بلوك بلوك 💪.
أنا في الخدمة في أي وقت يا حبيب ❤️
ربنا يرضى عنك ويرزقك الزوجة الصالحة اللي تعينك على أمر الآخرة.
س 6 :
صدقت يا اخويا فعلا بس الواحد كان ضعيف و مش قادر ياخد قرار صارم
الجواب :
هتخده دلوقت بإذن الله وهستنى تقولي عملت بلوك وبعدت 💪💪💪
___
لا حول ولا قوة إلا بالله العلي العظيم.
س7 :
عملتلها بلوك✊🏻 و باذن الله هغير رقمي عشان ميبقاش في مجال للتواصل تاني و يا خويا والله انك شجعتني جدا علي الخطوة دي ربنا يعلم كنت تعبان ازاي من الذنب ده.
الجواب :
عااش يا حبيب قلبي 💪💪💪❤️.
الحمد لله ، ربنا يتوب عليك ويثبتك ويرضي عنك ويرزقك زوجة صالحة عاجلاً غير آجل يارب ويوسع عليك بالحلال الطيب يارب.
_
لا حول ولا قوة إلا بالله العلي العظيم.
أنت تقرأ
تحدى (بالقرآن نحيا)
Narrativa generaleتحب التحدي يالله انضم وتحدانا وإذا كنت بس كلام معليش ما عندنا وقت نضيعه..... ((خِتَامُهُ مِسْكٌ ۚ وَفِي ذَٰلِكَ فَلْيَتَنَافَسِ الْمُتَنَافِسُونَ)) ممكن تكون طريقة التسميع صعبه لكن دعينا نحسب فوائدها ونقرر 1)اول شيء اصابعك ستشهد يوم القيامة انك كت...
