رواية المتيمه (روايات ليبية)

الحلقة الاولى (1)

#رواية_المتيمه ❤️

الحلقه الاولى 1

(بقلمي نور الاسلام 🧘🏼‍♀️)

يوم الجمعه ساعه 1:22 الظهر والشمس سخونه هلبا

منار:لابسه سروال جينز ازرق وقميس ابيض وفي دوائر صغار بالوردي ولابسه فوقه طرف طويل لفوق الركبه وردي ولابسه وشاح باهمال،،مامااااااا هيااااا

سناء:امها / واقفه ع الرخامه وتصب في الطبيخه بعصبيه، باهييي غير اصبري ونتي طايره غير من يجري في جرتك بس

منار: قرنت حواجبها وطرمت شاربها بملل، ياماما هيااا المسلسل تو يفوتني والاعلان قريب يتم هيااا وحتى الشمس سخونه هلبا  هيااا

سناء:صبت من الطبيخه وسكرت الطنجره وحطت مغطه ع القعدة ،هاكي شدي وسلميلي علاها هلبا

صفاء:خدتها منها،، باهيييييي ماما ،،وطلعت تسرع شاده القعده بايديها الزوز بحزر وخايفه تحرقها

سناء:غسلت ايديها في الحوض،،حنان ياحنان تعالي جاي   

حنان:اخت منار اكبر منها مواليد97هاديها عكس منار ومسالمه هلبا،،،بهدؤ نعم ماما

سناء:خدت المنشف وبدت تنشف في ايديها، ،تعالي وتيلي السفره بوك تو قريب يولي من الجامع

حنان:ع طول شمرت ايديها، حاضر يام وين منار مشت لحناي

سناء:ايه كيف طلعت تو

-----------------------------------

منار/ وصلت لحوش حناها لقت الباب مفتوح دفاته برجلها وخشت بصوت عالي ،،حناااااي حنااااايييي

خيريه:حناها/ فرحت هلبا لما سمعت صوتها ،،تعالي جاي تعالي

منار: بفرحه اتجهت لغرفه حناها بابتسامه عريضه،،، حنايييي

خيريه:تعالي جاي تعالي يابنتي

منار: قربت منها حطت القعده جنبها، كيف حالك حناي

خيريه: الحمدلله وينك معادش شبحتك ليك يومين معادش جيتي لهني

منار:قعدت وربعت رجليها،،ااااه شن بنحكيلك بس اااااخ وخلاص

خيريه:قرنت حواجبها، خيرك شن في

منار:هادي ماما يلي حبستني

خيريه:علاش شن مدايره؟ 

منار: بارتباك" ااء والله مادرتش حاجه اقسم بالله مادرت حاجه اني والله

خيريه: شبحت فيها بنظره شك، ،ايه ايه مديرتيش شي اني يلي نعرفك ونعرف عمايلك السوده

منار: ضحتك بصوت عالي وقفت ،،هههههههه المهم حناي اني بنمشي تو تاخرت

خيريه: شبحت في القعده وابتسمت اقعدي تغدي معاي سايريني

منار:وقفت،لا حناي تو في العشيه تو نولي ونهدرز عليك