وجع الحب (مكتملة )

الفصل الخامس

الفصل الخامس
                💔 وجع الحب 💔
                      روني محمد

( لا اله الله وحده لا شريك له الملك وله الحمد وهو على كل شيء قدير)

في فيلا شريف
     دلف شريف مسرعا الي غرفه ورد بعدما سمع صوت صراخها ، ليجدهم كالأتي ,,
عمر ممدد على الأرض و ورد فوقه مرتديه ملابس بيتيه خفيفه على الرغم من انها محجبه.....
شريف بحده : ممكن اعرف انتو بتعملو ايه بالظبط...
    انتفضت هي لتنهض وتبتعد عنه ، لتبحث عن اسدالها وترتديه ، وبعد ان احكمت اغلاق حجابها قالت
-: وانا خارجه من الحمام لقيت الهمجي ده في اوضتي ، وكان عاوز يخنقني ،كتم بوقي وانا بخلص نفسي منه وقعنا عالأرض ، شوفت يا خالو عشان تعرف اني عندي حق انا لازم امشي من هنا في أقرب وقت ....
  وقف عمر يهندم ملابسه قائلا بتحدي
-: كدابه يا بابا كالعاده ، انا جيت اعتزر لها زي ما حضرتك طلبت مني لقيتها بتشدني لجوه الاوضه ، وعاوزه حاجات كده استغفر الله العظيم ، طبعا انت مربيني و عارف اخلاقي قولتلها عيب انتي بنت عمتي وفي مقام اختي مينفعش الي انتي بتعمليه ده فلقيتها راحت صرخت لما انا رفضت وقالت انها هتتبلا عليه واهو حضرتك جيت بنفسك وشوفتها لابسه ايه ، وقال ايه راحت لبست هدومها اول ما انت دخلت ..
       رفعت سبابتها امام وجهه وقد تمكن منها الغضب قائله
- : تصدق انك قليل  الادب ،ومش محترم ، بانا هبصلك انت !! انا ابقى غلطانه لو اعدت في البيت ده دقيقه واحده معاك ، دانا عندي استعداد ارجع ألمانيا انشالله اموت ولا اعيش معاك في بيت واحد....
عمر : اولا صوبعك ده يا حلوه لأكسرهولك ، ثانيا لسانك الي عاوز قاطعه ده تلميه شويه ، ثالثا لو عاوزه تمشي مع ألف سلامه المركب الي تودي ، ولا عوزاني اوصلك!
   جلس شريف بوهن وتعب على الكرسي خلفه وامسك رأسه ليقول باجهاد
-: انا خلاص تعبت من مشاكلكم الي مبتخلصش ، انا مش حمل المناهده وتعب القلب ده ، اعمل حسابك يا عمر ورد لو مشيت من البيت انا هكون قبلها وانتي يا ورد ا....
       قاطع كلامهم صوت طرقات الباب لتدلف الخادمه وتدعى سناء قائله بعمليه
-: شريف بيه في ناس عاوزين حضرتك تحت.... 
شريف : ناس مين مقلوش هما مين ، وعاوزين ايه ؟
سناء : لا ..بس هما لابسين لبس صعيدي و  قالوا عاوزين حضرتك ضروري...
شريف : طيب روحي شوفيهم هيشربوا ايه وانا نازل وراكي...
   خرجت سناء ، ثم وجه كلامه لورد قائلا
-: انسي يا ورد انك تمشي من هنا امك الله يرحمها كان ليها نص الفيلا دي يعني احنا الي ضيوف عندك مش انتي ، شيلي الشنطه دي من هنا مش عاوز اشوفها تاني وأجلي كلام فالموضوع ده دلوقتي لغايه لما اشوف مين الناس الي تحت دي....
ثم غمز لعمر ووجه كلامه له قائلا
-:وانت يا عمر  خف هزارك التقيل ده علي بنت عمتك ، دي ملهاش حد غيرنا ويلا بينا ننزل نشوف مين دول  ....
     عقدت زراعها امام صدرها قائله بتحدي
- : لا ليه ربنا ، الي مبينساش حد ، وربنا قادر ياخدلي حقي... 
عمر بنفاذ صبر : يلا يا بابا ، انا خلاص صدعت ومبقتش طايق نفسي.....
شريف: ورد اهدي كده واعقلي ، وخليكي هنا ، وانا هنزل اشوف الناس الي تحت دي وهجيب عمر ونيجي نصالحك..
   كاد عمر ان يعترض الا ان يد والده التي سحبته قد اوقفت الكلام بحلقه....
       خرج الاثنان من الغرفه ليتجها الى اسفل ، وما ان دلفا غرفه الصالون ، حتى تفاجأ كلا من عمر وشريف  رجلان بملابسهم الصعيديه ....
      جلس شريف بوهن على اقرب كرسي له بعد ان  عرف هويتهم....
فهو كان على معرفه بكبيرهم من قبل ، وكذالك فهو يشبه كثيرا اخاه والد ورد !!
     
عمر : ايوه خير ممكن اعرف مين حضراتكم...
كبيرهم ويدعى حافظ :  احنا چايين ناخد الامانه الي عنديكم ...
عمر بعدم فهم : امانه ايه ؟
حافظ : بنت اخوي محمد الي جاعده اهنه ، احنا عرفنا انها جات من السفر على اهنه.....
   نظر كلا من عمر وشريف الي بعضهم ، ليبتلع شريف غصه في حلقه قبل ان يتكلم ويقول
-: اتفضلوا طيب نتكلم الاول ، ونشرب حاجه...
حافظ :احنا سلمنا وشربنا ما نجصش الا ناخد بنت خوي ونعاود جبل المغرب.....
شريف : ميصحش يعني انتو جايين من سفر ولازم تعدو تخدو واجبكم...
سالم (ابن حافظ) : متشكريين جوي ، بس زي ما والدي قال لازم نعاود جبل المغرب ، انت خابر الطريق زين من هنا للبلد مش أقل من 6 ساعات ....
شريف : يا بني الكلام اخد وعطا ، انت ضفنا ولازم تاخد واجبك وانتو سيد من يعرف الاصول صح ولا ايه يا حج حافظ؟
حافظ :عداك العيب يابن الاصول كلكم واجب...
     نادى شريف على سناء وطلب منها تجهيز طعام الغداء للجميع ، وما ان خرجت سناء حتى جلس الجميع واخذوا يتبادلون الحديث بينهم
شريف : امال انتو عرفتوا ان ورد وصلت مصر ازاي ، دي يادوب مكملتش يومين...
سالم :من الرجاله الي انت بعتهم يدوروا عليها عندينا ، ناس من البلد قطرتهم وجم قالولنا انك انت الي باعتهم... امال ورد مجتش ليه علي عندنا...
شريف : وهنا ولا هنا ايه هنا بيتها ، وهناك بيتها بردو ، وانا كنت هسيبها يومين ترتاح وكنت هاجي بنفسي انا وهي واخليها تسلم عليكم ...
حافظ : وادينا احنا سبقنا ، نادي عليها بقى عشان اشوفها...