ابتسمي لعل الحرب تخجل

بارت 9

خاسنا نلقاوها باش نفذ وصيت جدي الى مقدرتش اولدي نفدها نتا خاسك تلقاها
الامير:ماتقولش هاكاك ابا نتا باقي صحيح وباقي سنين تابعينك تحكم فيهم باش يزيد الخير فلبلاد القدام رتاح امولاي انا انتولى امور لبلاد هاد ليام
السلطان:فوسايطك اولدي فوسايطك
مشا الامير يناقش امور لبلاد مع باقي الوزراء الشراف
...الامير:علموني بخبار لبلاد
وزير من الوزراء:مولاي الامير في قبيلة بعيدة طريقها طويلة المونة تسالي وهي ماتسالي والعجب من هادشي فامر هاد القبيلة كل مرة تبدل طريقها الطريق اللي جابتك اليوم ماترجعك غدا وهادشي كلو بسباب سحارة سميتها عقيسة مالكة القبيلة والعباد وسحرها مايفلتو منو غير الشداد . الناش كايتشكاو حيت القحط ولا فكل مكان من غير واحد المرا جوادة تعطي بيديها ولسانها عندها واحد الجنان خيرات القبيلة كلها منو تعطي المسكين وتجود على اليتيم ولكن عقيسة حرقات المرا جنانها وجات تشكا من القبيلة لمدينة السلطان وكانتمناو منك امولاي تعطينا خبارها وخبار القبيلة
الامير:دو الزرع والروز  وقولو المرا توجهكم لطريق القبيلة وجيبو معاكم عقيسة تعدم وتولي عبرة لقاع السحارة والمتمردين 
الوزراء والشراف:امرك امولاي
الامير:الى كان غير هادشي كلشي يمشي
ناض الامير وخرج مشا لجناحو وطلب جارية تمسدلو ضهرو راهو عياان وعياتو شؤون الدولة وحكامها

كانت عود الريحان كاتخطط بغات تهرب من القصر ولكن خسها وقت باش تعرف كيفاش تخرج منو وامتى ومنين هاتخرج هادشي كلو كاتخمم فيه وكادور فدروب القصر بحال الهبيلة وهي راها كاتحفضهوم وتخزنهم فعقلها
ايوا داز الوقت وراحت لجناح الحريم مالقات حد خرجات لشرفة النسا كاطل على جناان كبير عينيك ماتشبع من خيرو ايوا جلسات فالارض على مخدة كبيرة وبقات تمنظر وتفكر مداز عليها البارح وليوما ماحسات براسها حتى بدات تغني وتالف وتنغم اللي سمع صوتها يبات يحلم بيه صوت كايبورش اللحم : سمعني نعاود ليك ماجرى لي
ياللي منهار شفتك تغير حالي
حزنة قلبي الغايبة عادت
مشا فرحي ومشا سعدي
ياللي منهار عتبت باب داري
خاطري مجروح وحاسة راسي مدبوح
ولا عندي السيف صعيب فالشدة
خايفة راسي يتقطع ليوم ولا غدا
راني خايفة من حرب النسا
وقلبي مبغا يهدااا
وهي كتلحن وبصوتها كاتغرد وتشكي  كان دايز من البستان بعبايتو الحمرا حتى سمع غناها وتسحر بصوتها 
تعجب!حيت هو اللي ديما يسهر على غنى النسا ويتنغم عمرو سمع بحال هاد الصوت ولا حتى فالحلم وعلاش عمرو دخل لجناحو ولا تسنط ليه
دخل للقصر وراح عند الشريفة
وقفات ليه وتحنات مبسمة حتى اذن ليها براسو عاد ناضت
الشريفة:كيف بقا مولاي السلطان امولاي
الامير:حالتو صعيبة ولكن كولشي ممكن نشاء الله قريب يتعافى ويرجع كيف كان وكتر
الشريفة:انشاء الله،خير امولاي ؟
الامير:بغيت الطير اللي كايغرد فجناح النسا .. ندخل هاد الليلة نلقاها فجناحي جالسة
الشريفة: سهرة امولاي ولا..
الامير:بجوج .. خليتك ليك الراحة هاد الساعة
مشا الامير وعيطات الشريفة على الوصيفة
الشريفة:الطير اللي كايغرد فجناح النسا وجدوه ووصيوه على الله يبات معاه تال الصباح
الوصيفة:كاع النسا كاينين فالكشينة الالا الشريفة حتى حد مابقى فجناح الحريم
الشريفة: كيفاش.. الطير اللي سمع مولاي كايغرد الليلة يكون عندو
خلاتها ومشات ...
تنهدات عود الريحان وناضت كاتجمع جلايلها حتى وقفات عليه الوصيفة طالقة شرارها
الوصيفة: نتي اللي كنتي كاتغني فالشرفة؟ .. على مابالي مكاين حد من غيرك ايوا وجدي راسك ليوما بغاك مولاي الامير
عود الريحان: اا لا لا ماشي انا
الوصيفة:وشكون من غيرك كاين هنا
فديك اللحظة خرجات واحد الجرية من دار الوضوء كاتقاد حوايجها
شيرات ليها عود الريحان :هي هي اللي كانت تغني
مشات الوصيفة واللي معاها دارو بالجارية ماعرفات باش تبلات
الوصيفة:ليوما مولاي الامير بغاك فجناحو عروسة
تبسمات الجارية غاطير بالفرحة ..اما عود الريحان تنهدات وجلسات مرتاحة واخيرا تهنات من هاد الموصيبة .. بقات ساهية شحال حتى جات وقفزات الوصيفة اللولة اللي جابتها لجناح الحريم :اش كاديري هنا ؟يلاه تحركي قدامي لحقي خواتاتك للكشينة
تبعاتها عود الريحان ودخلات لقاتهم كاملين مصافين  فوق طبلة طويلة من الخشب كل وحد وشنو كدير هاللي تعجن هاللي تقطع هاللي تقرص حتى دخلات معاهم

وبقات فديك الخضرة اللي قدامها تبرق  حتى تفكرات هدرت مرت خوها قوت القلوب وهاهي وحلات ماعرفات تهز موس ولا تنقي الخضرة .. بدات دور فعينها وكل وحدة شنو دير وهي بوحدها اللي شادة يديها حتى وقف عليها واحد سمر لابس البيض قصير وصلع
قطعي الخضرة ولا دوري الحريرة ولا دوزي العجين
عود الريحان: انا العجيينة
اييه العجينة..
عود الريحان:لا لا الحريرة حسن
خرجات بين البنات ومشات  دور الحريرة وماعرفات منين دوز ليها
حتى جاعندها الطباخ وبدا يهرنن عليها: واش بيتي ندور بيك الحريرة
الله بغات تجي تهدر حتى جات عبدة من العبيد
هنية:سيدي المعطي سيدي المعطي انا نتكلف بيها غير سير كمل شغالك....