ابتسمي لعل الحرب تخجل

بارت 7

وفرحي ليا الامير
عود الريحان:شكرا اسلطانتي مايكون غير اللي بغيتي
هزات عود الريحان قفوفها وتحركات دقات الباب جوج دقات وتحل وهاهي خرجات ،،، لقات الوصيفة كاتسناها حدا الباب
الوصيفة:امضرا شنو قالت ليك
عود الريحان:والو عزيت عليها وعطاتني خاتم من بين يديها
الوصيفة:هااا..... وعمرها دارتهاا ومكديرها غير لادرتي ليها شي حاجة تفرحها
غود الريحان:وعلاه مالي ماقديتكش راني فرحتها
الوصيفة :زيدي قدامي يلا رجعو لجناح الحريم نوريك بلاصتك
ايوا رجعو و تمات داخلة شافت البنات مستفات وحدة تنسيك فلاخرة ولكن تاوحدة فزينها ماتوصل جالسين متبعين عود الريحان داخلة
وراتها الوصيفة فين تجلس وجلسات مرزنة
تفكرات عود الريحان كااع داكشي اللي طراا بغات تمشي لدار باها ندماات علاش خرجاات نسات راسهااا هادي ماشي هي عود الريحان اللي كانت فدار باها بقات دور من جيهة لجيهة عاد وعات براسها باللي هي اول مرة تجمع وسط النساا شافت فيهم جالسيين ويشوفو فيهاا شافت دوك العينين عامرين شر وباينا فيهم محاملينها تخنقات وماعرفات فين تمشي ولا تولي ماحسات براسها حتى هزات جلايلها تجر فيهم وتزطم و ترفع راسها وماعرفات منين دازت وفدروب القصر دجلات بقات غاديا حتى خرجات فساحة كبييرة خاوية مافيها حد بانت ليها قبة صغيرة مترعة بيبانها فالبيض مغطينها خوامي كباار فالحمر
جرات لتماك ولقات داكشي اللي بغات سيوفة ولبسة اللي كايلبسوها الرجال باش يتدربو
ايوا هزات اللبسة ولبساتها وشدات سيف من السيوفة الكبار وخرجات للساحة  تقاتل وتبرد على قلبها ناار شاعلة كاتحرقها لداخل ماعارفاش ديالاش ولكن باين اللي جاي مكايبشرش بالخير
كانت كضرب وتقاتل بعينيها مغمضين من ديما وهي هاكا كاترتااح فيها هادشي اللي علمها باها واللي مقدرش يتعلمو  حتى خوها
بقات مضاربا مع راسها عينيها مغمضين كاضرب بكل حرفة تقول عليها فرساان  
كان فالشرفة كايطل شاف فساحة القتال وجات عينو عليها وهي كتقاتل وتخوي نار قلبها
ستغرب وقال : شكون تكون هادي اللي تجرا وتدرب وسط ساحة الامير ...
رجعات للقصر وماعرفات تقدم ولا توخر حتى بانت ليها الوصيفة دايزا كاتجري وموراها شلا عبيد غير شافتها جراتها من دراعها وبدات تغوت وتهنهن:فين مشيتي يالموصيبة وشهاد اللبس زيدي قدامي خليتك ساعة ورجعت لقيت الدنيا مقلوبة موراك
عود الريحان:علاه اش درت
الوصيفة:ايوا حريم مولاي الامير فيه شلا نسا وكل وحدة ونوبتها مني يطلبها الامير ليوما طلب جارية وكانو بغاو يختارو وحدة جات فيها النوبة ايوا دارت الدورة وجازهرك فلالة السلطانة الكبيرة رحمة قالت بغاتهم يدخلوك بلاصتها ايوا البنت ناضت تغوت وتجدب والحريم حتى هو ماراضي بهادشي قالك جات وعزازت على السلطانة الى مشى تاناض الحريم صعيب يفكوه ياربي نهارك اللول وشنو طرافيه
عود الريحان:بغيت نبدل ونمشي عند الشريفة
الوصيفة:خصنا نجهزوك لليلة ليلتك
عود الريحان:ضروري خصني نشوفها
الوصيفة:واخا يلاه زيدي تبدلي هاد الحالة ومن بعد نديك ليها
بدات عود الريحان كاتحفظ دروب القصر وبيبانو ايوا بدلات وتجهزات وعند الشريفة مشات
دخلات مع بيت الشريفة تسناتها حتى كملات صلاتها وعليها سلمات
عود الريحان:الله يتقبل
قالت الشريفة امين وعلى كلامها تبسمات
عود الريحان:جيتك الالة طالبا شوارك وحكمتك نتي اللي تعرفي حلها ماهو غيرك
الشريفة:انشاءالله انا نحاول ابنتي وعلى الله نعولو
عود الريحان:ااه الالة انا من ديما زيني حارمني من شلا حوايج ونهار تمردت وخرجت جبتها فراسي وهانا معاكم وحتى من هنا ماسلم من لعنة زيني عييت وعييت مانخزن ونخبي على قلبي من ديما همي كولو فزيني وزيني كولو فهمي عمري فرحت بيه هو لعنة لعنة عمري نتفك منها كرهتو
ااشريفة:عسى ان تكرهوا شيء وهو خير لكم
ماتنسايش ابنتي ..