ابتسمي لعل الحرب تخجل

14

لقاتهوم كالسات مجمعات ويغنيو .... كلسات حدا وحدا من الجاريات كاتعزف ومقابلين معاها جاريات اوخرين اغنيو وشي كالس والباقي نايض كايرقص
تكات على مخيدة وسقلات ...بقات كاتمايل مع الغنى حتى سهات وبدات تفكر فباها وخوها .. غادي اكونو دابا تسطاو عليها واش جرى ليها واش هي ميتة ولا حية
خاسها دير كيف تخرج من هنا ولكن جيهة وحداوخرا كاتقولها بقاي ..عقلها كايقولها هربي وقلبها كايجرها تبقا
كاتفكر الامير المعتصم بالله وبوساتو وهدرتو الحنينة وقلبها كايضرب كيفاش توصف هاد الاحساس وهي اللي عمرها قربات لراجل ولا حتى شافتو ودابا ولات دير معاه الحرام .... هادشي اللي قالت عود الريحان حيت هي مافاهماش هادشي دلحريم وعلاش خاصها تبقا مع راجل بلا عقد قران بدات تفكر وتفكر حتى نغزاتها وحدة من دوك البنات وفيقاتها من سهوتها
الجارية: فاش كاتفكري
عود الريحان: اا؟؟ اه لا غير داتني عيني وصاف
الجارية: نوضي نوضي تشطحي
جراتها الجارية ماخلاتش لها فين تجاوب ... وبدات تشطح معاها وتغني حتى بدات عود الريحان تاهي تمايل مع اللحن وتحرك فدياتها بدات تضحك وتشطح حتى هي حتى عيات وكلسات ...
الجارية:هههههه كاتعرفي تشطحي يالمسخوطة ونتي مخبية علينا هادشي كامل
عود الريحان: هههه لا لا مامولفاليش نشطح بصح ديما كنت ندندن انا ومرت خويا مع شي عبدات فدار حتى لنصاصات الليل ههههه
الجارية: باينا عليك بنت الهمة والشان ،، اش جاب بنت بحالك لهنا ،، حيت اللي هنا كايجي غير اللي كسبوها من الحرب ولا بنت هاد لبلاد زينة ولكن اهلها ماعندهوم جاه اما بنات الاصل والشان راهوم فقصورهوم ماشي جاريات عند السلطان ونتي بنتلي منهوم
عود الريحان: صراحة انا ماعرفتش براصي كيف حتى جيت لهنا ،، كنت حدا الواد وفقت لقيت راسي هنا
الجارية: هي نتي بنت المدينة
عود الريحان: ااه انا بنت المدينة ولكن عمري شفتها ولاعتبت دار با حتى لداك النهار زغب عليا راسي ودرتها وياريت مادرتهاش ندمت وربي جازاني بهادشي اللي انا وصلت ليه محبوسة هنا وماقادرا رجع لعند اهلي وحبابي
الجارية: انا ورد الياسمين اش سماك الله
عود الريحان: تبارك الله سميتك زوينة بحالك انا عود الريحان
ورد الياسمين: هههه مانكونش بحالك تبارك الله زينك عمري شتو فشي بلاد ايوا قوليلي قصتك مافهمتش مزيان واش جابوك بزز منك ولاشنو
عود الريحان: لا لا انا با تاجر وعمرو خلاني نعتب باب الدار مولفة ديما نطلع لسطاح ونشوف الناس غادا جايا وديما كنت نحلم نمشي للواد ونلعب كيفي كيف كاع البنات ولكن با وخويا عمرهم خلاوني بسباب زيني هاد الزين اللي اي بنت تتمناه انا كايجيني كيف شي لعنة تسلطات عليا هاد الزين مافادني فوالو غير حبسني بين ربعة الحيطان كنت كانفس على روحي  بسيف كان ديما خويا فوقتما جا يدربني مرة مرة وحتى با مقال والو حتى وليت انا والسيف واحد مكانتفارقوش فوقتما فرحت ولا حزنت ولا غضبت نمشي نهز السيف ونشوف فيه .. كنت كانشوف فيه روحي كان بالنسبة ليا مراية كاتبين روحي الزوينة والمحاربة بلاصت مايوريني وجهي وزيني
ولكن واحد النهار واللي كان با غايجي فيه من الترحال
قلت لخويا يهدر معاه باش ادورني فلموسم كيما سمعت من عند شي عبيد وافق بزز وفاش جا با تعصب وثار وحرمني من سيف وصدمني بللي غايجي بات راجلي اشوفني هههه عمري عرفت بللي انا مزوجة ماخداش حتى رايي واش انا بغيت نتزوج وبمن غانتزوج ماكنتش عارفا واش انا اللي بنتو حبيبت قلبو رخيصة عندو بحال هاكا داكشي علاش قلت نهرب ونشوف الدنيا وقبل مايطلع الصباح نرجع لدار وديك ساع اللي ليها ليها
خرجت وتلفت على الدار واذا بيا نشوف جماعة من الرجالة حدا الواد وهربت طحت وتمرمدت وتسرقت  وغيبت حتى مابقيتش عاقلا على والو ايوا فيقوني فلقصر ورجعوني هدية لمولاي المير هذا ماكان كايقولي عقل بقاي وحققي حلمك خاصني نوصل لسيف ونحارب على قبل ناسي وبلادي هادشي اللي بغيت وكايقولي عقل هربي من هنا ورجعي لباك واهلك ايوا هذا ماكان
ورد الياسمين: قصتك قصة اختي الله اكون فعوانك ولكن ماهضرتيش ليا على مك
عود الريحان: مي ماعرفتش صراحة امكن ماتت وامكن هربات مهم تاحد معارف فين غبرات من نهار ولداتني تاحد مساق خبارها ماخلاو فين قلبو ولكن مالقاوش عليها تا خبار
ورد الياسمين: سمحيلي ماقصدتش نفكرك فيها
عود الريحان بتاسمات: لا عادي ماشي شي حاجة اللي نحزن عليها بالاصل عمري عرفتها ولا شفتها ماعندي حتى احساس ليها ،،،ايوا ونتي اش قصتك تا جيتي لهنا ومن ايمتا
ورد الياسمين: انا جيت هادي سبع شهور با فلاح كنا عايشين باش قسم الله انا وياه ومي وخويا الصغير
خويا كان كايعاون با فلارض اللي عندنا وكايبيعوه فسوق
وانا ومي مقابلين شغل الدار ،،كانو ديما الخطاب اجو لدار بسباب زيني ههه واحد نهار خويا جا كايجري وعلى فمو قتلوه قتلوه ،،كلستو وهديتو باش افهمني ،،خرجات مي من الكوزينة مخلوعة حتى عاود لينا خويا باللي جنود السلطان جاو كايطلبو الضريبة وداك النهار تسرق لينا المحصول اللي حصدو با وخويا ومابقا عدنا مانبيعو مشا با لعند القايد شكا عليه ولكن شكون داها فيك قال ليه ماعندو مايدير خاصنا نخلصو الضريبة ولاياخدو لارض با ماحملش راسو وناض كايتغاوت معاه وخويا كلس كايهدن ولكن با والو ايوا ضرب القايد وشدوه جنود السلطان داوه حبسوه حتى امرهم القايد اعدموه باش اتعلم اتطاول على سيادو هههه خداو لارض وانا ومي وخويا داونا لعند القايد خدا مي وخويا عبيد وانا حيت زوينة وعذرا باعني لجنود لقصر باش ادييوني لمدينة السلطان نولي جارية عند المير وهذا ماكان من داك النهار عمري سمعت على مي وخويا واش واكلين وشاربين واش باقي حيين ولا ميتين ،،كرهت السلطان وهاد لبلاد اللي تاكل الضعيف وتستقوى على المسكين
ولكن صبرت ودرت بلاصتي باش تاحد مياكلني وحلفا حتى يجي نهار ونولي شان فهاد لقصر ونعدم داك القايد ونرجع حق با ونجيب خويا ومي نعيشو مزيان وفامان
عود الريحان: بقيتي فيا والله ولكن عزيتي عليا كانتمنى ترجعي حقك وتشوفي خوك وميمتك ياربي امين
ورد الياسمين: اميين
عود الريحان: هي نتي عينك ماشي فلمير ،،ماشي بحالهم شي ياكل فشي
ورد الياسمين: لا لا انا بحالهم حيت كل وحدة هنا وعندها قصة امكن بحالي ولا كفس مني ،،كل وحدة باغيا توصل للسلطة والحكم من عند مولاي المير وتولي الجارية الللولة والمفضلة حيت الى وليتيها غاتكون عندك السلطة الكافية تحكمي فالجاريات وغاتولي معززة مكرمة بحالك بحال باقي الاميرات فهاد القصر والى حبلتي وهزيتي دم السلالة فكرشك غايولي شانك من شانو وولدك غايولي امير وسميتو غاتهزك كتر وتولي سلطانة الى هز الحكام على هاد البلاد فهمتي واخا مايمكن حيت وحدها مرات السلطان هي اللي ولدها كايهز لحكام ولكن كولشي ممكن  ... هادشي لاش كولهوم باغيين مولاي المير امكن كل واحد ولاش ولا كيفاش ولكن كاتبقا حاجة وحدة عند كلشي باغيها وهي كاينا غير عند مولاي المير (السلطة) هادي هي والى بغيتي توصليها خاسكي تحاربي  اعود الريحان  حيت الى وصلتيها كلشي تقدري ديريه ونتي دابا مصدر تهديد لينا كاملين حيت كل ماعند الجارية هو زينها باش تنتاصر وتشد قلب لمير ومعانا حنا عقلها ولسانها وكيد النسا ما منو هروب حضي راسك تقدر تكون صاحبتك وغدا عدوتك وكيفي وكيفك هادشي علينا كاملين ...راه واخا تشوفيهم ضاحكات راه كولشي شي محامل شي راه ماشي حنا اللي بغينا هكاك ولكن حاجة بغيتيها لا محتجاها وبغاها واحد اخر تاهو اش غاديرو غادي تقاتلو عليها واهكا غادي توليو اعداء وتاحد مغايحمل لاخر
هكا دابا حنا فهمتي .. ودابا نتي اللي غاتختاري واش غاتبغي السلطة تحققي داكشي اللي بغيتي ولا تهربي وترجعي لعند باك
عود الريحان: بصحح.. هادشي كبيير وكبير علينا كاملين، حنا باقي صغارات على هادشي ولكن ماعند الفم مايكول حيت هادشي كبير عليه بزاف وعالي على العين بزاف حيت ماعند الميت مايدير قدام غسالو واخا هكاك غادي ناخد طريقو ونوصل لداكشي اللي بغيت وكوني على يقين الى وصلت لداكشي غادي نعاونك اورد الياسمين مغانساكش ..شكرا بزاف حيت فتحتيلي قلبك ونبهتيني على امور كنت غافلة عليهم ،،، اا كايودن انا نمشي نصلي تعالي الى بغيتي انا باقي موضية انمشي لبس لحافي ونصلي
ورد الياسمين: واخا هي اللولة انمشي نتوضى ولحق عليك
———————————————————
فبلاصة وخرا.... دار التاجر

قوت القلوب: راه جمعنا كولشي مابقا والو حتى من بيت عود الريحان خويناه
صلاح الدين: صافي ابنتي غير سيري انا وسيف الدين شويا ولحقو عليكم بلخيل
قوت القلوب: واخا اخالي خليتكم
سيف الدين: الله اعاون
صلاح الدين: امدراا والووو
سيف الدين: والو اباا .. ليوم فصباح كنت فلقصر وشفت المعتصم بالله لقيتو ساق لخبار الحمدالله قالي اجيو لقصر ونتفاهمو اما حكامو عليك بطلو حيت كاتبقى راجل عمتو ومعزتك كبيرة عندو ..عرفتي بسباب السيف راك عرفتي سلالتنا نتا الوحيد اللي قدرتي دربو
صلاح الدين: اييه عرفت ولكن عود الريحان اولدي انا همي غير هي ندمت بزااف مني هزيت صوتي عليها ندمت بزااف مني ماخلتها تشوف غير الحيوط ندمت مني خلتها هنا بحال شي بهيمة معارفة الديب من القنية خايف عليها
سيف الدين: ماتخافش ابا راك مقريها مزيان ومعلمها سيف سلالتنا .. واخا مراا ولكن راها هزات سلالتو وتعلمات اللي انا ماقدرت نتعلمو هزات دمك اباا ماتخافش عليها
صلاح الدين: انشاء الله
سيف الدين: باا اشنو نقولو ليهم
صلاح الدين: تسطيتي ماغانقولو والو غانهزو رحالنا وغانمشيو من هاد لبلاد راه حتى من قوت القلوب وقبلات شنو باقي .. مني مابقات عود الريحان مابقى  مايدار فهاد البلاد .. غانخليو ليهم برية مكتوب فيها عود الريحان ماتت وصلاح الدين ذهب بجثتها تاركا لكم هذه البلاد وسلطنتكم ..فكفوا عن التباهي بها واحذروا فالحرب آتية بدل ان تتحاربوا بينكم فلتوحدوا قواكم فالأعداء القادمون اقوى وانثى برضيع فيها .
سيف الدين: باا واش هاذي الرؤيا ديالك من امتى ونتى كاتشوفها
صلاح الدين: خصنا نغادرو هاد البلاد حيت غاتجيها حرب كبيرة كانشوف دم كتيرة وصوت دري صغير كايبكي ومرا كاتغوت والحرب والخيولا والسيوفا مخربقة ولكن المقصود باين حيت علامهم طاح يعني خسرو الحرب
سيف الدين: ولكن ابااا واش ماخصناش نحذروهوم
صلاح الدين: مكاين لاش البرية واضحة غايفهمها المعتصم بالله ،، يالله زيد مابقالنا شغل فهاد لبلاد
وواقيلا عود اريحان غاتغبر كيفما غبرات مها ..ارر ارررر
............صوت صهيل الحصان....بداو غاديين لاحقين على القافلة اللي سبقاتهم وفيها جامعين رحالهم لبلاد بعيدة ..تاركين موراهم اصلهم وحتى ذكرياتهم.. وكايتمناو تكون بداية جديدة بلا قيود كيما كانت قبل شداهم ...