الحلقه الثانيه والعشرون
ساره بدلع : سكرتيره بتاعتك انت
مراد : ازاي يعني
ساره : بصراحه كده انا اللي طلبت المنصب ده
مراد بعدم فهم : ليه
ساره : هتعرف في وقته ..تؤمرني باي حاجه قبل ما اخرج
مراد : شكرا مش عايز
ساره : اه صحيح رقيه عامله ايه
مراد : كويسه بس زعلانه منك
ساره بعفويه : احسن
مراد : افندم
ساره : ها لا ولا حاجه .. هشوفك في الحفله بليل
مراد بستغراب : حفله ايه
ساره : اوبس شكلك متعرفش وانا خربت الدنيا يلا بقي ابقي اسال مدام رقيه بعد ازنك اشوف شغلي
الوقت عدي ومراد خلص شغله ورجع البيت
في بيت مراد ورقيه
مراد : حبيبتي انتي فين
رقيه : انا بجهز ياحبيبي ثواني وجايه
بعد شويه رقيه خرجت لمراد وكان شكلها مبهر بجمالها
مراد : وانا أقول وكاله ناسا عامله قلق ليه اتاري القمر واقف قدامي
رقيه بضحك : ده انت رايق بقي
مراد : بعد ما شوفتك طبعا جدا
رقيه : طب يلا ننزل
بعد شويه راحوا النادي اللي كانوا متفقين عليه رقيه واياد
مراد : انتي جبتينا النادي ليه
رقيه : هتعرف ليه مستعجل
مراد : لما نشوف اخرتها معاكي
تاخده رقيه ويدخلوا القاعه اللي متفقين عليها والكل يكون موجود هناك زي ماهي خططت
الكل بدا يبارك لمراد علشان منصبه الجديد
رقيه بتقدم هديه لمراد يفتحها يلاقي فيها شراب لبيبي صغير يبص لرقيه باستغراب و رقيه تبصله وتضحك مراد قام وهو فرحان وحضن رقيه وفضل يلف بيها
مراد بفرح وحب :ربنا يخليكوا ليا ياحلي حاجه في حياتي
ساره واقفه علي اخرها ومضايقه كده هيبتدي يتعلق بيها زياده
رقيه راحت وقفت مع أصحابها شويه ومع الضيوف في الوقت اللي ساره قربت فيها من مراد
ساره بدلع : مبروك يامراد بجد فرحتلك
مراد : شكرا ياساره وعقبالك
ساره : بس تعرف رقيه علي طول كده مش بتعرف تخطط يعني كان المفروض تحتفلوا سوا لوحدكوا
مراد : معلش انا بتبسط لما اشوف اهلي واصحابي مبسوطين
ساره : اكيد ايوه ...اشوفك بكره في الشركه وغمزتله ومشيت
مراد مستغرب تصرفاتها هي بتعمل كده ليه
خلص اليوم والكل رجع بيته
عدي أسبوع بين خناق رقيه ومراد بسبب غيرتها عليه وبسبب خوفه عليها انها مش بتاخد بالها من نفسها
مراد مضايق من تصرفات ساره وانها بتحاول تقرب منه بحراكتها المستفزه
في بيت رقيه ومراد
مراد : انا هسافر بكره علشان عندي مؤتمر في روما ولازم أكون موجود
رقيه : طب ما تخدني معاك انا نفسي اغير جو اوي
مراد : انتي عارفه ان مينفعش تسافري وانتي تعبانه ان شاء الله لما تقومي بالسلامه هنسافر مع النونو بتاعنا ماشي
رقيه بزعل : طيب هتقعد قد ايه
مراد : هو أسبوع وراجع ان شاء الله
رقيه : ترجع بالسلامه
ويسافر مراد ومعاه ساره لانها السكرتيره بتاعته ولازم تكون معاه
في الفندق
ساره : مراد تعالي ننزل نخرج شويه بليز انا اول مره اجي هنا ومش هقعد في الفندق
مراد : ساره احنا جاين شغل مش جاين نتفسح
ساره : بليز علشان خاطري يامراد انت عارف الأماكن هنا كويس وانا عايزه اتبسط بليز بليز
مراد : طيب ياساره حاضر
نزلت معاه ساره وهي ماسكه في ايده
مراد بستغراب : ساره انتي بتعملي ايه اوعي
ساره : ايه يامراد خايف كده ليه هو حد يعرفك هنا
مراد : حتي لو محدش يعرفني مفيش داعي حد يقول كلمه ملهاش لزمه واحنا معانا زمايلنا من الشغل هنا كمان
ساره باستسلام : طيب
في القاهره عند رقيه
كانت قاعده وفجأه وصلها مسدج علي فونها بصور
يتبع
