مصائب وجرائم أفادتنا

الحلقه 1

#للكاتبه_ژوژو_الطشهه✍🏻

#مصائب_وجرائم_أفادتنا🔥
#الحلقه_1

#لايك_قبل_ما_تقري_حبيبتي_وتعليق_بعد_ما_تكملي🔗📝

الساعه 9 الصبح عند سحر قاعده في المطبخ زي العاده دارت الفطور لها ولي عمها وعدت للدار لقت عمها قاعد يحضر في التلفزيون ابتسمت بي حب وقدمت وحطت الصفره الي كانت عباره عن حليب وشاهي ونص جبنه
سحر:يلا قدم عمو
عمها مصطفى بي ابتسامة:تسلم يديك بنتي
سحر:ولو عمي ما درت شي
مصطفى:نسيت نقولك ع خبر حلو
سحر:شن هوا
مصطفى:علي بيروح في الأيام الجايه
سحر بي فرحه:الله رايفت عليه
قعدت تهدرز مع عمها ويفطروا❤

(نعرفكم عليا أسمي سحر مواليد 94 يتيمة الأب والأم أمي وباتي ماتوا في حادث سير من قبل 7 سنين وعشت مع عمي مراته ماتت من سنتين عندها الخبيث ماعنديش خوات ولا خوت وحيدة أهلي وعمي عنده ولد واحد أسمه علي مواليد 87 طايش ومتاع بنات بس نحبه ونعتبر فيه كيف خويا كان يحضر في ماجستير برا وتوا شكله كمل يبي يروح طبعا نحنا بسيطين بكل وحالتنا الماديه شبه تعبانه بس عمي ربي يحفظه يخدم خياط في مشغل ومش ناقصني شي طبعا أنا قريت لعند الثانوي ووقفت عندي صديقتي وبنت جيرانه في نفس الوقت ح تعرفنها مع الحلقات❤)

_________
عند رنيم قاعده تهدرز مع حنها"جدتها"
رنيم:يعني صح الي سمعته💔
الحاجه مريم بي وجع:مرات كذب يا بنتي ما تحكميش لعند تسمعي منها
رنيم بي كره:ماما نتوقع منها كل شي وأديرها عادي
مريم:ماتقوليش ع أمك هكي بنيتي مهما كان هذي أمك
رنيم ناضت وقعدت تبكي بي صوت عالي:مش أمي مش أمي في أم تتخلى عن عويلها عادي في أم تنكد ع راجلها عيشته وتخليه يموت من القهر في أم ترضى بنتها تعيش مع أمها وماتشوفهاش سنه كامله عادي في أم ما تسألش ع ولدها الي هج من البلاد من عمايلها ماعش تقولي أمي أرجوك جديده💔😭
عدت تجري وخشت لي الدار
مريم بي حزن:ربي يهديها أمك ما عمري نتوقعها تقعد هكي هذي مش تربيتي💔

(أنا رنيم مواليد ال 96 شلت الهم قبل وقتي من قبل سنه بابا مات من وراه عمايل ماما كانت ديكا مكرهته في روحه وتقوله انت مش راجل انت ما تجيبليش كيف خواتي انتي فقير وووو... ومن الكلام هذا بابا الله يرحمه كانت حالته الماديه ضعيفه بي عكس رجالة خالاتي الي كانوا أغنياء وماما كل شي اسواره أو حاجه يجيبوها رجالة خالاتي تقعد تزن ع بابا وهوا مسكين يحاول يلبي ويدين بس خلاااص كل شي ولاه حدود تعب في جرتها ومرض وااجد ومات عندي خوه واحد اسمه إلياس بعد بابا مات ما قدرش يتحمل ماما طلع هجره غير شرعيه ومن سنه ماعش شفت وجهه طبعا هوا اكبر مني مواليد 90 المهم أنا بعد بابا مر أسبوع ع وفاته لميت كل حاجاتي وجيت سكنت مع جديده(حنينه) وهيا مش مقصره معايا في شي طيوبه واااجد وعايشين أنا وياها بس ما عنديش خوال ماما وحيدة جديده وبابا عنده خوت وخوات بس تبروا مني ومن ماما لأنه قالوا لي ماما انتي وراه كل شي صار مع بابا المهم أنا قاريه لعند صف التاسع شخصيتي ضعيفه من كثر تعذيب ماما ليا زمان ضرب وذل واهانه كأني مش بنتها ماعنديش لا صحبات ولا شي وعايشه شبه لا جسد ولا روح بس الشي الإيجابي في حياتي هوا جديده مريم❤)
___________
نجو لي الساعه 12:00 الصبح عند رنا راقده فوق في سريرها وقعدت تتحرك يمين يسار وكأنه في حد ينوض فيها بالعاني فتحت عيونها لقت راني خوها ماسك خصله من شعرها ويحرك فيها ع وجها😂
رنا ناضت ع حيلها:بارد امتى تبطل العاده هذي
راني:صباح الخير
رنا:صباح النور توأمي😂❤
راني:هيا نوضي أمي قالتلي انوضك ع الفطور
رنا:تمام أنزل توا نلحقك
راني:تم
نزل راني ورنا خشت للحمام دارت جوها ولبست سروال اسود ضابط ومعاه كت لونه ابيض ورفعت شعرها فوق ونزلت لقت باتها وأمها وراني يرجوا فيها ع الفطور
رنا:Good morning family
باتها:كم مره انقولك ماعش تحكي معانا بي دوت الأجانب هذي
رنا ضحكت:صباح الخير ع الجميع
راني:تعالي يالايا هنا
رنا:جيتك هي
جت قعدت يالاه وقعدوا يفطروا
امها:سمعتي عرس وفاء بنت خالتك حددوه الأسبوع الجاي
رنا بي فرحه:لا ما سمعتش يا نعلياا واخيرا خاطري في فرح😍
راني:تحسيها كلطت وفاء صح
رنا بضحكه:اها 7 سنين لاه خاطبها
راني:أوووبا
باتهم:افطروا وبلا تقريم ع الصبح😒
فعدوا يفطروا و في أجواء عائليه سمحه بكللل