"هنطلع النهاردة ماشي، وحشاني جدًا"
"ياسين، قولتلك مينفعش اطلع معاك من غير محرم، وقولتلك بلاش تزيد ألفة وترفع كلفة وتفضل تعترفلي كدا، إحنا مش متزوجين عشان تقولي كدا ..!"
"بس أنا هتجوزك، وبطلي تعقيد بقى !"
"لما تتزوجني يبقى قول كدا !"
......
أنا "حياء"، مختمرة والحمد لله، كلية علوم، كنت مخطوبة لواحد هو اسمه"ياسين"، الشخص ده في البداية حاول يكلمني كتير تحت مسمى ''اتعرف عليكِ عشان هتقدملك"
في البداية فتحت الأكونت بتاعي على الفيس لقيت واحد باعتلي كمية مسدجات وكاتب فيها :
"كنتِ جميلة النهاردة بفستانك الأزرق ده، وخمارك الأبيض"
مكنتش عارفة مين ده وهو شافني فين وعارفني منين !
كان كل يوم ألاقيه باعتلي كلام زي ده، عملتله بلوك، لقيت أكونت تاني باسمه باعتلي وبيقولي ''بتعملي بلوك لي !، ممكن اتكلم معاكِ شوية !"
كان كل مرة يبعتلي من الكلام ده وأنا مبردش عليه ومش عارفة اعمل أي !
لقيتي بيقولي ''عايز اقولك حاجة مهمة جدًا عن أخوكي، ممكن تردي !"
مكنتش عارفة اعمل أي !
ارد عليه ولا بلاش !
في الآخر رديت عليه وقولتله :
-نعم في أي !
=أخيرًا رديتي عليا !
-أخويا ماله !
=لا مفيش حاجة خطيرة، كنت بس عايز اتعرف عليكِ عشان هتقدملك !
"مكنتش مرتحاله وكنت مستغربة جدًا من كلامه ده .. يوم بعد يوم بدأنا نتكلم ونتعرف وحبيته واعترفنا لبعض و ..
-هو انت مش هتتقدملي !
=طبعا هتقدملك، بس لما اجهز نفسي وهجيلك.
-بقالك كتير بتقول الكلام ده، هتيجي أمتي يعني !
=حاضر يا حياء، مش كل مرة تقولي الكلام ده وتضايقيني.
-......
"فضلنا نتكلم كتير لحد ما بقينا بنتقابل لدرجة إنه بقى بيمسك ايدي ويقرب مني ..وكنت بفضل أزن عليه عشان يتقدملي لدرجة إنه كان بيقفل بالأيام عشان زني ده، لحد ما جه اليوم اللي اتقدملي فيه، وفعلًا اتخطبنا وبقيت خطيبته رسمي ..بقى بيحصل بينا تجاوزات كتير، وكان بيجبرني اعمل حاجات مش حباها، وكنا بنتكلم بالساعات في كلام مينفعش يتقال، لغاية ما اتخنقت من اللي بعمله، حسيت إني بعمل حاجات غلط، الحاجات دي مترضيش ربنا ... وكنت في يوم خارجة معاه لوحدنا وقابلت واحدة صحبتي اسمها "ياسمين"، كانت صحبتي من أيام الجامعة، وكل اللي في الجامعة عارفين إنها ملتزمة جدًا ولحد دلوقتي لسه ملتزمة، أول ما قابلتها مصدقتش نفسي، بقالنا سنين مشوفناش بعض .."
-السلام عليكم، إزيك يا حياء !
=وعليكم السلام، أخبارك يا ياسمين، عاش من شافك.
-الحمد لله بخير، أخبارك انتِ أي !
=تمام الحمد لله !
شاورتلها على خطيبي وقولتلها :
-ده ياسين ..خطيبي
لقيتها استغربت كدا، وقالت:
-هو مفيش حد معاكوا أخوكي مثلا أو والدك !
