__💜💜__
تحل فمها من البهتة موش مصدقة ايلي سمعتو " ص ..ص...صدااااق !؟"
_"صداق ...كلمة ماتفجعش للدرجة هاذي نتصور "
تلبكت وماعرفتش اش تقول "لكن انا ...يعني ..."
"خوذ راحتك وخمم نحبش نسمع رايك تو ...ابراي تو خمسين مليون فلوس ...نخاف تندم من بعد "
شافتو ياقف ويقصد باب الصالة خارج ،وقفتو بصوت مربوث"شنوة مربوحك من الصداق هذا!! "
هز حواحبو "اه ...انا ومربوحي انت مادخلك فيه شي ...انا شنعطيك اسمي عام كامل ..وهذا الشي المهم وايلي يعنيك انت "
"انت تتصور اني نقبل ؟!!...يعني هاذي عبارة صفقة راو...موش ساهلة "
"وي صفقة ...صفقة العمر بالنسبة ليك انت وما...تتعوضش "
رمشت متوترة "كنت تنجم تختار غيري "
"وانا اخترتك انت "
هبطت راسها "في بالي موش هذي الخدمة ايلي انت تلوج في..."
قص على حديثها " خمم وقلي "
مازادش حتى كلمة اخرى من بعد... خرج وخلاها في بلاصتها وهي تسمع في صوت صباطو عمال يمشي و يبعد ،...خذات صاكها من على الطاولة و خرجت من غير ماتستنى مروان... حبست تاكسي و طول رجعت للدار ،لقات خولة مازالت كي روحت اول ماراتها ورات وجها الملخلخ فهمت ايلي هو ماقبلهاش لكن بحكم اسماء كانت موجودة اختارت صاحبتها تسكت لين خرجت باش بدات تبربش فيها
"نادين شبيك؟! ...المقابلة ما مشاتش بلڨدا موش هكا "
تنهدت من اعماقها " قلي خوخيتا ...انت تعرفو خالو ..قصدي خال مروان "
"لا اصلا مروان قلة وين يحكي عليه ...شبيه ؟!"
فركت شعرها "هو ...هو نفس الراجل ايلي شفتو في الرستو "
"متاع الدمغة في جبينو والحرق في الرقبة !؟؟ "
وافقتها باشارة براسها وبدات تحكيلها... كل كلمة قالها و كل حركة عملها ،خولة من الدهشة لقات روحها تاقف وتبدا تمشي وتجي ،نادين كانت قاعدة في بلاصتها موش منجمة تخمم
" خولة يا اما انا هبلت يا باش نهبل .."
خزرتلها على جنب "علاه تقول هكا"
سكتت لحظة ورجعت تمشي وتجي وبعد حبست قدامها " نادين ...علاه ماتوافقش"
وساعت عين صاحبتها " نوافق ؟ خولة هذا عرس ...عرس راو نعيش مع راجل و ...و نحل عيني الصباح عليه ...راجل مايعنيلي شي ولا نعنيلو شي ...مابينو حتى مشاعر ولا معرفة سابقة ؟! "
"هو قال عام ...عام تحملو و اربح فلوسو ،انت تعرف الخدم ها النهارات قلت وصعيب تلقى خدمة تساعدك... خمسين مليون تحلك في الجنة ذراع يا مهبولة ... تشري دار صغرونة في بلاصة قريبة و الا تعمل مشروع صغير ... وهكاكا تضمن على روحك "
أنت تقرأ
🌹دائرة الانتــقــام 🌹(كرونيك باللهجة التونسية : مكتمــلة )
Adventure★الاسم "دائرة الانتقام " ★الكاتبة "نودا " ★"تاريخ اول نشر "2018 " ★النوع "رومنسي، اجتماعي ، اثارة ،انتقام ، عائلي ... ★عدد الفصول " 19 " 🌾☀☀🌾 ★القصة " نادين 🌿 ...السرفورة ايلي خدمتها خلتها سلعة ساهلة في يد كل واحد ...تلقى روحها قدام ص...
