__💜💜__
المرة هاذي الكف والسطعة عطاو مفعولهم ،انهارت اسماء وبدات في هستيريا بكاء و هي تطلب في السماح ومايهزوهاش للشرطة " امان بالله بالله حد مايوصلها للشرطة وانا والله نقلكم البنية فيه ..هي لاباس.... لاباس سلمتها من ايدي لايد فاتن والله "
نفخت هيام " في ايد هاك المسمامة وتقول لاباس ...وحدة حطبة جهنم كيفاه لبنية شتكون بخير معاها الله لا تربحكم الكل ...وين هزيتها ...وين هي تو ..."
"في المكتبة القديمة ...ومعاهم نادين "
كلات كف اخر من عند هيام والمرة هاذي خشم بدا يجري بالدم " انت تو شتجي معانا وتورينا المكتبة وبعد فمة حساب اخر "
دارت هيام لسامية "سامية انت كلم الشرطة وتعطيهم عنوان المكتبة القديمة وتقلهم كل شي ..وخلينا نمشو فيسع ..الله اعلم شنوة صاير معاهم ...نادين لا حول ولا قوة و البنية مازالت صغيرة ...ويحي ...واحد فيكم يكلمو و يقلو ع الحكاية "
"طلبتو الف مرة في مرة مايهزش " تافف رمزي
"اوف منو ...قتلو ونبهتو اذا صارت حاجة للبنات اقسم بالله مانرحم حد وايلي خلق الارض والسماء بما فيهم يحي "
ركبو لكراهب وخذاو الطريق للحومة القديمة ،...ماخذاوش بارشا وقت ..فيسع ما وصلو ..وقفو قدام الباب القديم ،ايلي مسكر ،وقبل مايدزو يحلوه خرجت نادين وفي يدها ريحان ،جراتلها خولة و هيام ايلي دمعتها خانتها وعنقت نادين بقوة " نادين انت لاباس...شنوة صار ...احكيلي "
خولة شدت صاحبتها وجبدتها ليها بكل قوة عنقتها ،رمزي وعاطف وقفو بجنب بعضهم بعاد شوي ،عاطف ايلي قلبو في صدرو نطق بحب نادين ايه ،حب ،المرا ايلي حب يشوفها في فرشو ليوم عشقها ومانجمش ينحيها من بالو،نادين كانت شاردة دمعتها هابطة بسكات وهي تخزرلهم" رمزي عاطف ...يحي لداخل امان ..لداخل ....فاتن كبت الايسونس و في يدها بريكية امان ...عاونوه ...تنجم تشعل الدنيا في اي لحظة "
قبل ماتكمل كلمتها ،جرا عاطف ووراه رمزي ...تعدوها وغابو عليهم لداخل ... ،هيام وخولة بقاو مبهمين موش فاهمين ايلي صار ،سامية ايلي كانت مركزة عينها في ريحان وامها ضامتها لصدرها بكل خوف ،كانت ساكتة لا صوت بكاء ولا حس ولا حركة تمتمت بخوف لعل تفيق امها "ريحان "
بعدتها نادين شوي على صدرها وثبتت في وجها،بنتها ساكنة ،دق قلبها خوف وهي ترا فيها بلا حركة ،صاحت مقهورة " بنتي...بنتي ياربي لا ...لا ..."
خذاتها من عندها هيام "ريحان ...بنوتي ...شبيها ماما ..."
انهارت نادين وطاحت لوطة ،لقفتها خولة و سندتها ،في نفس الوقت دارت كراهب الشرطة و وقفو مقابلينهم ،هيام جرات بالبنية لكرهبتها وخلطت وراها سامية ،اما نادين ثقلت ساقها على الحركة وهي تعاود بلا وعي " بنتي ضاعت من يديا بنتي ماتت يا خولة"
__💜💜__
أنت تقرأ
🌹دائرة الانتــقــام 🌹(كرونيك باللهجة التونسية : مكتمــلة )
Adventure★الاسم "دائرة الانتقام " ★الكاتبة "نودا " ★"تاريخ اول نشر "2018 " ★النوع "رومنسي، اجتماعي ، اثارة ،انتقام ، عائلي ... ★عدد الفصول " 19 " 🌾☀☀🌾 ★القصة " نادين 🌿 ...السرفورة ايلي خدمتها خلتها سلعة ساهلة في يد كل واحد ...تلقى روحها قدام ص...
