___💜💜___
تعدات الايام رزينة...نادين مافارقتش السبيطار ،مرة عند بنتها ومرة عند يحي،مافمة شي تبدل ،كيف كل يوم ،نفس الصورة تتعاود ،صبرتها خالتها ايلي ولات تستنى في يحي يقوم ويحل عينو ويشوف مرتو وبنتو ..وريحان ترجعلهم ..وتنورلهم دنيتهم ايلي ولات ظلام ،خولة و سامية ورمزي لا نهار خلوهم،خولة كانت مطلعة على حالات يحي وبنتو وتعرف قداش صعيبة .
نهارتها كانت متكية على الحيط اتبع في بنتها من بعيد ،جاء عاطف ووقف بجنبها ،فاصمة في يدو و في راسو من الحروق ايلي لحقتو " بنتكم قوية...باش تفيق وباش ترجعو عايلة مزيانة ...عايلة صغيرة فرحانة باش تعيش حياتها احسن مايكون..."
هزت عينها تثبت فيه" مرسي علي عملتو مع يحي...كيفاش باش نرجعلك مزيتك "
"نادين ..." نفخ وهو يمس في لحيتو"نادين نعرف ايلي موش وقتو...ولا البلاصة زادا...اما حبيت نقلك كلام في قلبي من مدة مخبيه...لازم تسمعو "
"عاطف يعيشك اذا..."
"لا لازم تسمع...انا ...يعني قبل كنت نراك ...مرا تنجم تشبع غريزة كيف اي وحدة ...نراها ...نتعشى معاها نعدو ليلة ومن غدوة لا تعرفني لا نعرفها...شديت فيك صحيح...وتبعتك..وحطيتك في بالي ...لكن ماكنتش نعرف ايلي باش تتقلب الحكاية عليا ونلقى روحي نحبك...اي يانادين"
"عاطف تتخيل ايلي هذا وقتو باش تعبرلي على مشاعرك بنتي بين حياة وموت وراجلي..."
"تخافش...انا جيت نراك ...وباش نبعد ...باش نسافر ومعادش باش تراني قدامك....حبيتك..يانادين ...مانحبكش تقعد تراني الراجل ...الحيوان."
رجعت تشوف في بنتها وخلاتو يكمل حديثو " ملي حبيتك ...بعدت ...خليتك تعيش حياتك مع راجلك...حتى كي جيتني وقتلي نعاونك وماتحبش يحي يعرف ايلي انت اونسانت...تتفكر ..."
"نتفكر...وخلصتلي اوتيل وعملت المستحيل باش تلقى خالتي وتهزني ليا ...والله ماني ناسية ...الله يرحم والديك...وغير هذا منعت راجلي من الموت ..و رضيت روحك تتحرق..."
"نادين ...والله ماني نادم...والله لو يرجع الوقت نعمل ايلي عملتو...حبيتك ...اما انت موش متاعي ..متاع غيري...مانيش باش نكون اناني كيف فاتن ..الله يرحمها...نتمنى انك تكون بخير...ومتأكد باش ترجعو عايلة ...كي قبل وخير ...اما انت اصبر وكون قوية ليك ولراجلك وبنتك"
خزرتلو بعين مليانة دموع" سامحني عاطف...نعرفش علاش اما سامحني"
قرب منها وعنقها ،ايه يا وقت ،قداه نحبها ها المرا لكن موش متاعي...بعدها عليه بالشوية " ربي يهنيك..."
"وانت ربي يشفيك ويعطيك الخير و انا مستحيل ننسى ايلي عملتو"
تبسم ودار ...تحمل وجاهد روحو باش مايتلفتش وراه عارف اتبع فيه بعينيها ..لكن لازم ينساها و مايضعفش قدامها..يسافر بعيد عليها وين يتوحشها تمنعو الحدود وتفكرو بايلي هي محرمة عليه،يبني حياتو من اول وجديد...خسر مرتو والمرا ايلي يحبها ..اما ربي يعوض خير هكا كان يخمم .
أنت تقرأ
🌹دائرة الانتــقــام 🌹(كرونيك باللهجة التونسية : مكتمــلة )
Phiêu lưu★الاسم "دائرة الانتقام " ★الكاتبة "نودا " ★"تاريخ اول نشر "2018 " ★النوع "رومنسي، اجتماعي ، اثارة ،انتقام ، عائلي ... ★عدد الفصول " 19 " 🌾☀☀🌾 ★القصة " نادين 🌿 ...السرفورة ايلي خدمتها خلتها سلعة ساهلة في يد كل واحد ...تلقى روحها قدام ص...
