ترف وشيخ الجنوب

البارت الحادي عشر

يكسره خاطري وياحيره ادموعي
يا أول وجع ترتاحلة ضلوعي
🦋

#عمران

بديت اشتاق الها بشكل مو طبيعي كل يوميه افوت لغرفتها اتأكد متغطيه زين لو درجه الحرارة زينه مثل الطفله تنام مرتبه ونظيفه بشكل كلش يرضي الواحد وهادئه ولبسها عريض وطويل بس رغم كل هذا حلوة كلش حلوة مرات ابقى واكف اتفرج بمعاني وجهة البريئه شون كدرت ائذيها لهل درجه... اي نحرك قلبي بأعز شي بالدنيا بس رغم هذا مجان المفروض ائذيها احس بوجع وتأنيب ضمير مو طبيعي ما شفت منها شينه ما احجي وياها ابد من اخر مره جانت بغرفتي ما ضغطت عليها اكثر رجعت من وكت من الشغل احس نفسي مالي خلك الولد طلعو يتعشون اني صداع ميفارق راسي امي راحت يم خالتي صار فتره مشتاقه الها كلتهم تغير جو وهم ترتاح شويه فتت البيت هادئ معقولة البنات نايمات بس لكيتهن كاعادات بالحديقه الوره فتت سلمت عليهم رغد ماكو مشيت اريد اخذ مي بارد وشي يهدي وجع راسي واصعد للغرفه قبل لا افوت شفت رغد و ترف واكفات رجعت شويه ليوره فكالت

رغد:خلصتي صلاة

ترف:اي الحمد لله وانتي شبيج احس اكو شي اكدر اساعدج يعني تعرفين ماعندي شي انظف لو شي

رغد:خايفه احجي

ترف:كولي يا الله شصاير تره وكفتي قلبي

رغد:احلفي ما تحجين

ترف:هاي شنو مواثقه بيه لا تحجين

رغد:لا والله لا ولج انتي فهمتي غلط انا اريد اكلج شي بس ما اريد احجي ما متأكده منه بعد بس كولي يا الله وان شاء الله يصير هل شي

ترف:يا الله ان شاء الله اذا بيه خير من نصيبج انتي تستاهلين اصلا بس الخير

رغد:يمكن اني حامل

ترف:شنو يا الله يا ربي فرجك شنو حامل فهميني

رغد :اني تعرفين عادتي كل فتره تتأخر ما اهتم الها مرات كل شهرين او هيج شي بسبب الأدويه وهل سوالف بس ترف هاي صار 3 اشهر يعني مرت احس بشي يعني احس اكو شي بداخلي بس شاكه يعني ما اعرف شكول الج ما اريد احد يعرف لان كل مره نفس الشي ويطلع حمل كاذب واني الي ينكسر قلبي رغم والله العظيم ماكو ميحسسوني بهل شي بس اني تحز بقلبي هل سنوات كلها وما كدرت احقق شي لجاسم ولا يرضى يطلكني ولا ياخذ علي حرمه بس اريدج تدعيلي اني حروح باجر افحص وان شاء الله خير بس خايفه اتأمل ما كدرت ما احجي مخنوكه واحس فدشي بقلبي راح ينفجر

ترف:لج رغد صار 3 اشهر شاكه وهامله نفسج انتي مخبله باجر ضروري ترحين شون ما ادعي الج روحي وان شاء الله من نصيبج تسمحين الي