إرم قالت لي مش قلت ليك بلال دا انا كان ما جبتتا راسو ما برتاح، اسمعني ي عصام جازف لي رقم البت دي من تلفون دعاء دي سريع،، عصام قال ليها عايزة برقمها شنو والله ي إرم البت دي تأذيها بلال حيعمل فينا عمايل ما شفتي يوم كنت واقف معاها في الجامعه سمعني كلام زي السم المرة دي ما حنسلم من يدو،،، قالت لي ما تخاف انا ما عايزة ااذيها بس جيب لي رقمها، قال ليها طيب برسلو ليك بعد ارجع البيت،،، بعد ما بلال جاء راجع منهم وركب العربيه كان صاري كدا، ما حاولت أسألوا، قال لي بالمناسبه انتي ماشه وين، قلت لي إشتغلت في عيادة ابو مريم، قال لي ايوااا ،، وصلني بيت ناس مريم لما جيت انزل قال لي اول ما تكلمي ابوك اديني خبر، قلت لي طيب ونزلت،، دخلت لقيت البيت وسلمت على امها قعدت وجابت لي العصير حتى مريم جات، سلمت على قالت لي تعالي جو الغرفة،، قلت ليها طبعا مشيت شفت بلال 😂💃،،، قالت لي عشان جايني بدري واها اديتي الموافقه 😂💅، قلت ليها يسسس💃،، قالت لي طبعا رزان لي اللحظة دي ما دخلت واتس ولا فيس ولا اي حاجه 😂😂،،، قلت ليها اصلا من يومها قليله ادب😂،،، بعد المغرب كدا صلينا ومشينا العيادة💃،،، دخلنا لبسنا الابكوتاتت، مريم قالت لي ارح نتصور 😂قلت ليها يلا شوفي هبالتك دي انا ما عايزها 😂،،،، قالت لي إنتي عرفه بحب الطعنه حقت الفحص دي😂، قلت ليها ي قاسيه خلاص اطعني انتي وانا بطلع النتيجه، أثناء ما انا شغاله كدا تلفوني اتصل كان رقم غريب، قلت الو، جاني صوت بت قالت لي تبارك محمد، قلت ليها ايواا، قالت لي صح انتي الأمك بتعمل خبايز وكدا، قلت ليها ايوا، قالت لي عايزة رقم امك عندنا شغل، قلت ليها طيب اديتها رقم امي وقفلت على كدا،،، بقينا شغالين لحدي الساعه ٩،،،أبو مريم َصلني البيت أول ما وصلت البيت لقيت امي وآديلا وشوشهم كلام كلام، قلت لي آديلا ابوي جاء، قالت لي جاء لكن طلع هسي، دخلت غيرت ملابسي وكنت ماشه على المطبخ امي قالت لي تبارك تعالي مشيت ليها جو الغرفه قفلت الباب وقعدت، قالت لي عايزة تجيبي لي سكرجي، أنا إتخلعت قلت ليها قصدك شنو ي امي، قالت لي بصوت عالي كدا انا لما إتخلعت قصدي واضح زي عين الشمس عايزة تجيبي لي سكرجي وبتعاطي خليتي رجال الدنيا ديل كلهم ما لقيتي لي غير دا،،، قلت ليها امي دقيقه افهمك، قالت لي تفهميني شنو الموضوع ما محتاج تفهميني، قلت ليها طيب القال ليك الكلام دا منو، قالت لي يعني الكلام دا صاح ي خسارة ي خسارة 💔،، قعدت ابكي قلت ليها امي خليتني اشرح ليك القصه ما كدا والله هو هسي حاليا ما كدا ولا كان بالقدر البتقولي عليو دا،، قالت لي تبارك انا ما شافعه مف حاجه اسمها هو هسي ما كدا انا قلت اخلي البت على راحتها وتختار براها في النهايه تجيبي لي سكرجي 💔، هسي انا ابوك كلمتو والكلام العايز اقولوا ليك دا ختي حلقه في أضانك الشهر الجاي حتكون خطوبتك من ود عمار فاهمه ولا لا وقامت طلعت من الغرفه، قمت على حيلي وطلعت وماشه غرفتنا، لقيت ابوي في الحوش عاين لي عين ما فهمتها هي زاتها شنو 💔،،، دخلت الغرفه شلت تلفوني قفلتو وجدعتو جو الدولاب، ورقدت في السرير والليل كلو شلتو بكى وآديلا قاعده جنبي وساكته وما عارفه تعمل أو تقول لي شنو،،، مرو يومين أبوي ما إتكلم معاي خالص وما مشيت العيادة،وامي في عيني ما بتعاين لي، يوم العصر كدا مريم جاتني وانا كنت نايمه، سلمت على امي وآديلا دخلتها غرفتنا، قالت لي آديلا ماله المتخلفه دي يومين ما جات العيادة وكمان قافله تلفونها،،آديلا كانت مترددة تحكي بس تاني حكت ليها اي حاجه،،، مريم قالت ليها بلال صاحب أسامه البنعرفوا دا مستحيل،، قالت ليها والله انا زاتي مستغربه الموضوع دا، وتبارك من يوم المشكله دي بس تصلي وترقد تنوم بالطريقه دي ، مريم قامت قعدت جنبي في السرير وبقت تصحى فيني، قمت قلت ليها بسم الله الجابك شنو؟!،، قالت لي قومي غسلي وشك دا وتعالى، قلت ليها اصلا انتي مزعجه كدا 🌚💔،،، سكتت مني مشيت غسلت وشي وجيت، قلت ليها اكيد جاية عشان بقيت ما بمش... قاطعتني قالت لي تبارك يحصل معاك دا كلو وما تقولي لي، عاينت لي آديلا، قالت لي اي آديلا حكت لي، قلت ليها مريم لو حكيت أو لا خلاص الموضوع انتهى، قالت لي بسهوله دي بتقوليها، احكي لي قصه بلال دي من الاول لانو ما قادره أصدق، قلت ليها طيب حكيت ليها قصتي مع بلال من البدايه للنهاية،،، قلت ليها مريم انا واثقه انو ما حيرجع تاني لي الكان بعمل فيو دا متأكدة 💔،،، قالت لي طيب انتي ما حاولتي تتصلي لي بلال وتكلمي بالحصل دا،،،قلت ليها امي كان ختت حاجه في رأسها بتعملا وانا خلاص 😭💔،،،، قالت لي تبارك ما تخلي الموضوع انتهى كدا اتصلي على بلال وكلمي وشوفي حيعمل شنو واعتبري الحصل دا إختبار ليو عشان تشوفي متمسك بيك أو لا، قلت ليها مريم خلاص عليك الله، قالت لي طيب عايزة اقول ليك انو النتيجه بتظهر بكرة حنمش طيب قلت ليها ما نفسي قالت لي حنمش وانا حاجيك بكرة وما على كيفك قعدت معاي لحدي المغرب ورجعت،،،
______________________________________________
“ على لسان لنا"
في يوم كدا ما كان عندي دوام ومشيت ناس امي اقضي معاهم اليوم دا،، أثناء ما قاعده مع امي وابوي وبنتونس كدا تلفوني إتصل قمت منهم ومشيت رديت، جاني صوت راجل قال لي سلام عليكم، قلت لي وعليكم السلام، قال لي معاك هيثم، قلت لي ايوا اهلين هيثم، قال لي تمام الحمدالله كيف انتي، قلت لي كويسه بخير، قال لي والله صراحه عايزة اتكلم معاك في موضوع مهم وضروري اشوفك، قلت لي موضوع شنو، قال لي ما ينفع بالتلفون وإذا ممكن تجي نتلاقي هسي لانو انا مشيت ليك في المستشفى وقالوا ما مداومه الليله،،، سكت مسافه كدا قلت لي طيب ساعه واكون معاك، بعد قفلت قلت دا عايز شنوو بعد ما عرف انو انا مطلقه،،، مشيت لي امي وابوي قلت ليهم طالعه مشوار وجاية لبست وطلعت، وصلت المطعم الاتفقنا عليو، لقيتو قاعد سلمت عليو وقعدت قلت لي احكي شنو الموضوع،، قال لي ما عارف اقول الكلام كيف لكن والله ي لنا انا من ايام الجامعه كنت معجب بيك وهسي انا جايك عديل وعايز اطلب يدك،، طبعا انا بقيت مندهشة، سكت مسافه وقلت لي والبخلي واحد زيك يتزوج واحدة مطلقه شنو انا بكلامي دا ما بقصد أهين نفسي أو كدا لانو عارفه قيمة نفسي والف واحد بتمناني بس عايزة اعرف الفي راسك شنو لانو قبل كدا في واحد كان عايزني بس لما عرف انو انا مطلقه خلاني،،، قال لي انا راسي ما فيو اي حاجه غير انو انا عايزاك وبس وانا ما عاينت في ناحيه انو انتي مطلقه لانو ما بهمني البهمني انو انتي بت ناس ومحترمه وانا عايزاك على سنه الله ورسوله،، عايز اتكلم معاو كدا تلفوني اتصل لقيتو اخوي عاطف رديت عليو، قال لي وين انتي سكت وما عارفه اقول شنو، وعاينت لي هيثم، تقريباً هيثم عرف انو دا واحد من اخواني بدون اي مقدمات شال مني التلفون وقال لي عاطف السلام عليكم،اختك معاي انا، هنا عاطف جنى جنونوا قال لي وإنت منو، قال لي ما ينفع اقول ليك انا منو في التلفون مَمكن اجي بيتكم واقول ليك انا منو وعايز شنو، عاطف قال لي ممكن تتكلم بوضوح، قال لي ممكن بكرة اجي أتقدم لي لنا، لما قال لي كدا انا عيوني بقوا يرمشوا 😂،،، تاني هيثم قام طلع واتكلم مع عاطف مسافه َوجاء،،، قال لي يمكن اكون إتسرعت في إنو اكون قلت لي اخوك انو انا عايزاك في التلفون وما اخدت رايك بس اخوك شكلو عصبي وانا حسمت الموضوع َهديك فرصه تفكري فيها وانا جاهز في اي لحظه.
______________________________________________
اليوم التاني مريم جاتني عشان نمش الجامعه ونشوف النتيجه ما كان عندي نفس لي اي حاجه بس هي جبرتني، مشينا الجامعه وشفنا النتيجه معدلاتنا كانت ظابطه بعد طلعنا مريم قالت لي الا نمش نفطر في مكان، قلت ليها مريم انا ما مصدقه اصل البيت متين، قالت لي ما على كيفك وانا عازماك وافتكر انو مريم مريم تعزم زول دي ما بتحصل كتير في الدهر 😂، مشينا مطعم وقعدنا وانا باكل حته حته ومريم شغاله لي اكلي ومرات تاكلني لدرجه انو في ناس ركزوا معانا لانو هي كلمه اكلي دي كانت بتقولها بصوت عالي فضحتني غايتو 🤦♀️،، كانت بتحاول تضحكني وتتطلعني من المود وانا بتمتاشى معاها عشان ما تزعل، في قعدتنا دي تلفوني اتصل لقيتو أحمد اول ما فتحت الخط قال لي لسه في الجامعه ولا طلعتي، قلت لي طلعنا انا ومريم نفطر في مطعم في شنو، قال لي جيت البيت اشوفك وقالوا مشيتي الجامعه طيب مطعم وين، وريتو اسم المطعم وقفلتا، مريم قالت لي دا منو، قلت ليها أحمد، مسافه كده وأحمد جاء، اول ما قعد قال لي ممكن افهم دا شنو البحصل دا، من قال كداا مريم كانت عايزة تقوم قال ليها خليك قاعده انتي ما غريبه، قلت لي شنو، قال لي خطوبتك من عمار، قلت لي فيها شنو يعني كلكم كنتوا عايزني أوافق وانت اكتر واحد كنت عايزة الحاجه دي تحصل وهدي حصلت، قال لي على فكرة آديلا حكت لي اي حاجه، قلت لي اوووووووف هي يعني آديلا دي لازم تحكي لي اي زول، قال لي اممممم انا اي زول تمام ما حأزعل منك لانو عارف الأنتي فيو حاليا ما هين، سكت منو، قال لي البتسوي فيو دا ما صاح، قلت لي الموضوع ما بيدي امي وابوي خلاص حسموا الموضوع، قال لي ردة فعل امك طبيعيه جدا بس العرفتو انا انو إنتي لي اللحظه دي ما إتكلمت مع ابوك، قلت لي ما حيسمعني، قال لي طيب اوكي ما حيسمعك الحل التاني إنو تكلمي بلال، قلت لي أحمد خلاص بس، قال لي طيب وقام على حيلو وقال لي حتندمي على عنادك دا وفات،،،، مريم قالت لي تبارك، قلت ليها مريم انا ماشه البيت،، قمنا سوا ركبنا الموصلات ومشينا البيت،،، دخلت الغرفه ورقدت نومت صحيت بصوت آديلا، قمت على حيلي قلت ليها في شنو، قالت لي العشاء أذن ما ممكن قومي ومبروك النتيجه وكدا كلمتنا مريومة، قلت لي شكرا قمت إتوضيت وصليت، طلعت الحوش برا لقيت لقيت أبوي راقد قعدت جنبو قلت لي أبوي، قال لي نعم، قلت لي عايزه اتكلم معاك، قام قعد جنبي قال لي بخصوص شنو، قلت لي أبوي عليك الله خليني افهمك الحكايه شنو،،، قال لي الحكايه واضحه وانا ما بضمن بتي في يد ولد زي دي وإنتي يداب فكرتي تجي تتكلمي معاي، انا خلاص أديت ابو عمار كلمه وما بتراجع والعيب إذا جاء ما بجي مني انا بعدين، سكت منو وقمت، فضلت افكر وافكر لحدي الساعه تلاته صباحا قمت وإتوضيت وصليت ركعتين وقعدت أدعي انو ربنا يجمعني بي بلال رغم الحصل والحيحصل دا كلو 💔💛وكلت أمري لي الله َوقريت سورة البقرة كلها ورقدت 💛،،،،،، مرو تلاتة أسابيع وانا ما عندي اي خبر من بلال ولا بلال عندو خبر عني وعمار من يوم ابوي ادهو الموافقه ما إتكلمنا مع بعض خااالص،، قبل الخطوبه بي إسبوع عمار جاني في البيت عشان نمش نختار الدبل، لبست ومشيت معاو كنا ساكتين طول الطريق لحدي ما وصلنا، دخلنا إخترنا الدبل وبعدها مشينا مطعم، كان عمار طول القعده هو البتكلم وانا مرة مرة اتكلم معاو ما عارفه هو ماحاسي انو انا مضايقه ولا دا شنو 💔لو فعلا بحبني زي ما قال كان حس بي الحاجه دي،،، بعد خلصنا غداء رجعنا البيت،،،،،،،،، يوم الخطوبه جات حبوبه وخالاتي وعماتي من الصباح،،وجدو بجي مع ناس عمار ، أنا كنت قاعده مع حبوبه في غرفتنا،،قالت لي ي بتي انتي مالك عامله كدا، قلت ليها مالي ي حبوبه، قالت لي بري الواحدة زي اليوم دا بتكون مفرهدة كدا من الفرحه،،، قعدت اضحك قلت ليها وبرضو بتكون متوترة عشان كدا بتكون هاديه،، قالت لي يمكن،، قريب العصر كدا جوا مريم ورزان،، ما كنت عارفه انو رزان جات حضنتها قلت ليها رزاااااان مشتتاااااااقين ي سجم الرماد 😭💛💛💛💛💛،،،، قالت لي خطوبتك ما تكلميني، قلت ليها هو انا راضيه عشان اكلمك ادخلي ادخلي،،، قعدتهم مع ناس مللك ومشيت جبت ليهم عصير،،، بعد المغرب ناس عمار جو،، بعد ما لبست وجههزت شلت العصير ومشيت ضيفتهم وقعدت جنب عمار......
#نتعلم
لا تتخذ قرار وأنت في شدة غضبك
ولا تقطع وعدا وأنت في شدة فرحك
الغضب يعمي العقل فتريث
والفرح يغرقكك في نشوته فتمهل
فأمسك زمام نفسك 💛
آدهم الشرقاوي 💛🌸
أستودُعت الله صُوتك وعيوُنك ونفسك وعافيتك وحُبنا💛🔐
#نتلاقى💛
