بعد السلام وكدا عمي قال ليهو في بيت في المكان الفلاني وبتاع واحدة اسمها نجود بتعرفها.؟
امممم نجود نجود نجود الهادي؟
اي هي بتعرفها؟
كيف ياخ نجود زولة كويسة ومسكينة في حالها باعو بيتهم وقالو راحلين علي جبرات لكن م عارف وين بالظبط
....طيب لو عندك رقمها...ايوة عندي رقم اتواصلت بيهو معاها زمان هسي برسلو ليك...عمي شكرو وقفل منو
رسل ليهو الرقم طوالي اتصل عليهو
الجرس الأول..التاني.. التالت
الووو مين معايا؟؟.ايوة ي نجود سلام عليكم معاك ياسين... ياسين راجل ندى اختي؟"ام دعاء" ...ايوة ياهو...خير ي ياسين عايز مننا شنو بعد شلت البنية واختفيت لا حس لا خبر عايز شنو مننا...يا نجود وصفي لي بيتكم سريع كدي "وصفت ليهو" قال ليها جاي عليكم ووقفل باين خالتي طيبة شديد🤍
المهم مشينا الوصف كان في جبرة بعيد شوية مسافة كدا وصلنا عمي شاف صيدلة مشى منها تالت شارع البيت الناصية أسود جمبو شجر حسب كلام عمتي.
دق الباب طوالي فتحو ليهو كانو منتظرننا انا واقفة جوة العربية جات مرة لابسة توب بتشبهني شبه عرفتها خالتي نجود لا اراديا دموعي جرو نزلت طوالي وقفت بعاين ليها تعاين لي عمي واقف معانا قال ليها دي دعاء ي نجود بت ندى غايتو خالتو دي الا عمي هزاها حتى استوعببت وتبكي وتجعر باعلى صوت ومسكتني تسلم علي في راسي وفي يدييني وتضمني وتبكي وتزح تعاين لي وتاني تضمني بصوتها العالي في مرة تاني جات جاريية من جوة معاها بتين قدر بعض كدا واحدة من البتين قالت ليها امي ديل منو مالك بتبكي قالت ليهو بت خالتك ي امل بت خالتك ي امنيه تعالو سلمو عليها البتين علي شديد بس كانو مستغربين المرة التالتة كانت بتبكي برضو قالت لي دي خالتك التانية نورا مسكت خالتي نورة بكيت ونبكي خالتو نجود اساسا م وقفت بكاء الجو بكا حزين وكلو بكا ويوصفو في أمي امينه قالت ليها جماعة صلو علي النبي واتفضلو كدي دخلتنا من الباب انا وعلمي قعدونا ضيفونا خالاتي شامين عمي شديد وهو محرج منهم
قلت ليهم يا خالتو نجود عارفة انكم زعلانين من عمي عشان شالني واختفى بس هو كان بنفذ كلام أبوي عشان كان بحبو والله وكان خايف تشيلوني منو لو عرفتو مكاني يا خالتو عمي دا عيشني اميرة أحسن من ناس بيتهم زاتو وم قصر مني عشان كدا م دايراكم تزعلو منو عشاني عليكم الله خالتي نجود قالت لي ي بتي قطع قلوبنا لا حس لا خبر والله قلبنا السودان قلب م عرفنا ليك طريق قلنا إلا ماتت ودسى منا انا يشهد الله يومي بنوم مهمومة وبصحى مهمومة ي بتي قلت ليها صح ي عمتي هو غلط والله بس. الفات مات خلاص واهو انا قدامك وماكلة وشاربة ومتعلمة واي شي ودي حاجة نشكرها عليهو قالت لي مشكور عمي قال ليها غلطت ي نجود لكن كنت خايف وم تشكروني علي واجبي تجاه بتي دا المفروض وهدي البت كبرت وقالت إلا تجيكم خالتي نورا قالت لي حبابك والله نورتي كانو امك الرجعت فرحتينا ي بتي بي شوفتك قلت ليها ووانا برضو فرحانة شديد عشان معاكم انو اهل امي واخواتها وبتشبهوني شديد والله فرحانة فرح حاسة روحي لقيت حته من امي أخيرا عمي اتونس معانا كدا وناداني علي جنب قال لي انتي ي بتي دايرة تقعدي معاهم جادة؟قلت ليهو ايوة ي عمي جادة قال لي لكن انتي م بتعرفيهم قلت ليهو عشان كدا دايرة اقعد عشان اعرفهم ي عمي ديل خالاتي ويعني اخوات امي يعني مستحيل يعملو لي حاجة انت براك شايف حنيتهم علي قدر شنو ف م تخاف قال لي ربنا يستر عليك ان شاء الله امسكي دي اداني قروش لو احتجت شي
مشى لي خالتي وقال ليها دعاء مصرة تقعد معاكم كم يوم خالتي قالت ليهو لو م كانت مصرة نحنا بنقعدها م صدقنا لقيناها قال ليها والله بت بتكم بعد دا لكن بجي راجع اسوقها وودعنا وفات.
م كنت خايفة ابدا بالعكس قعدت ارغي كتير واتكلم وأحكي وخالتي نجود وبناتها التؤام"قارين it" وخالتي نورا م متجوزة وشغالة في معمل صحي يحكو لي عن امي وأبوي وعرسهم مرة نضحك مرة نبكي عدينا اليوم كلو ونسة وحكي
وانا متلصقة مع خالتي لصيق السواد 😂النوم دا نومتو معاهم
خالتي نجود راجلها في الولايات شغال وخيلاني الاتنين واحد في السعودية التاني متزوج ساكن في الجزيرة
الحياة مع ناس خالتي سمحة نصحى الصباح نشرب الشاي في الحوش سوا نقعد خالتي نورا تمشي الشغل وناس امنيه يطلعو الجامعة انا وخالتي نجود ننضف وبعدين نجيب الخدار ونعمل الأكل ومرات انا اتدففن أسوي ليهم تحلية واالجيران بجو بعد الفطور بشربو الشاي ويتونسو وموضوع حلو حلو حلو🤍 تلفوني م بفتحو اساسا مجدوع وين م بعرف
قعدت اسبوع حسيت روحي اتولدت من جديد قلت ليهم برجع لي عمي وبقعد اسبوعين وتاني بجي للنتيجة بتاعت الشهادة احضرها عندهم آخر يوم لي معاهم عملو لي لقيمات وشاي مغرب وونسة لي بعد العشاء قامو بنوم وانا فتحت تلفوني اخيرا لقيت كترة اتصالات من عمي وحسام وجميل وحتى رويدة زاتها رجعت لي عمي قلت ليهو بكرة بعد الصلاة تعال لي "طبعا عاتبني عشان م كنت بضرب ليهم ولا بسأل منهم"
تاني يوم الجمعة من الصباح عملنا ملاح الويكة والقراصة والشطة وقعدنا اكلنا اكل اتونست مع ناس أمل ظريفين شديد وخالتي نورا بتحاكي الناس محاكاة غايتو موتننا ضحك😂🤍
عمي بعد الصلاة جاني سلم عليهم قالو ليهو إلا تقعد للغدا لكن م قدر عندو شغل ساقني ورجعنا البيت لاقيت في الباب خالتي سمية سلمت عليها سلام خالتي سمية دي فيها وقار باين علي وشها تحبب كدا طوالي
عاينت لقيت عمي يبتسم ليها ساي م اشتغلت بالموضوع دخلت جوة فتشت خالتي سهير م لقيتها مشيت غرفتي عمي قال لي خالتك سهير مشت ناس اهلها وحسام مافي انا طالع مشوار صغير وبجي خلي بالك واقفلي الباب بوصي عليك سمية برضو قلت ليهو حاضر ومشى قفلت كويس وقعدت في غرفتي واول شي اتصلت علي جميل
