رويدة قعدت معاي اتونسنا ونسة لكن أصلو م جببت ليها سيرة جميل لغاية قريب المغرب حنسناهم للشاي أبو كلو كلو طلعو بقيت بضاير في العدة واغسل شوية ومعي حسام بساعدني عمي جا كنت بغسل في صحن قال لي الأكل كان رهيب ما شاء الله والدجاج تحفة🤣والتحلية رهيبة ما شاء الله حسام همس لي براحة قال لي زي ستو فصلني فصلني😆 الصحن وقع مني لكن م اتكسر عمي قال لي عشان شكرناك يعني قلت ليهو اي بخجل ضحك وطلع وانا بقيت متوترة اي شي امسكو يقرب يقع حسام يضحك ساي في النهاية طردتو خلصت العدة ورتبت اي شي لقيت المغرب اذن رجعت غرفتي جميل ضرب لي كالعادة زعلان عشان م برد علي الاتصالات ولا الرسائل قلت ليهو كنت مشغولة عازمة رويدة المهم كان زعلان شديد قال لي تغني لي قلت ليهو أغني ليك شنو صوتي م حلو قال لي م بعرف بس تغني صنيت مسافة بعدين اتذكرت غنية انت غلطان ي قمرنا فعلا بديت أغني ليهو كنت خجلانة وبنيص ساي🤣 اما جميل كان مستمتع يضحك ساي بعد خلصت قال لي صوتك زي اسمي قلت ليهو كيف قال لي جميل يعني زيك برضو فصلني فصلني😆 قلت ليهو اامممم شي متوقع مني يعني ها؟قال لي متوقع يلا عشان اسامحك احكي لي عملتي شنو الليلة وكيف كان يومك وكدا قلت ليهو جدا قعدت في السرير حكيت ليهو من صحيت إلا موقف حسام م حكيتو ليهو قال لي افهم مرتي طباخة يعني صح (ف ص ل ني😆وانا قلبي رهيف)سكت ساي اتونس معاي كتير وقفل اتذكرت كيس حسام شلتو مشيت الحوش لقيت عمي راقد نط رقدت جمبو واتونست معاهو قلت ليهو النتيجة بتاعت تالت قربت عايزة احضرها عن ناس خالتو عشان حضرت معاكم بتاعت تامن ممكن؟عمو سكت كدا قال لي خلاص م مشكلة قلت ليهو انت أحلى عم ياخي قال لي انتي اكتر زول مجنون🤣 قعدنا نضحك العشاء اذن عمو مشا الجامع وانا مشيت صليت ورقدت نمت من الارهاق..
الأيام البعدها م كان في شي جديد غير النضافة والونسة مع رويدة كل كلامها عن راجلها كرهتني زاتو 🙄 ولا اتونس مع جميل "جميل خريج بتاع اسنان"
يوم كدا كان يوم سبت زاعو موعد النتيجة ح يكون يوم التلاتاء قالو طوالي اتصلت علي خالتي نجود قلت ليها بجيكم الاحد بليل قالت لي حبابك كلمت عمي قال لي من عيوني بخلي حسام بوديك قلت ليهو ظابط قعدت تاني ارتب حاجاتي وفرحانة شديد كلمت جميل اني احتمال م افتح تلفوني ماشة ناس خالتي قال لي لا بتصل عليك بعد العصر كل يوم خلي مفتوح قلت ليهو طيب بحاول ان شاء الله وضربت لي رويدة قلت ليها النتيجة قالت لي عليك الله عروس أسوي شنو بالنتيجة قلت ليها سمححح بكرة ببقى ليك ورديي..
يوم الاحد بعد المغرب فعلا حسام وداني لمن وصلنا عايزة انزل قاال لي ح تتطولي؟ قلت ليهو اي اظن قال لي لا بشتاق ليك عاينت ليهو كدا😳 قال لي قصدي احم ااا بنشتاق ليك أنا وأبوي يعني ااااا امي برضو ابتسمت ليهو قلت ليهو انا كمان بشتاق ليكم قال لي خلاص م تتطولي قلت ليهو من عيوني انت م ح تنزل؟قال لي لا الوقت اتاخر والبيت م فيهو راجل أحسن امشي قلت ليهو طيب اجيب ليك موية اي شي عايز حاجة؟قال لي انتي عاينت ليهو كدا تاني😳 قال لي انتي امشي م عايز شي والله قلت ليهو طيب إنتبه علي الطريق قال لي حاضر بقيت منتظراهو يمشي وهو واقف بعاين لي وانا واقفة منتظراهو قلت ليهو ها نمت ولا شنو؟قال لي لا دقي الباب كدي أطمن انك دخلتي عاينت ليهو كدا😳قلت في سري حسام دا مالو بقى رومانسي فجأة اجي دقيت الباب فتحت لي أمل سلمت علي حسام عزمتو رفض طبعا دخلت معاها بعد اشرت ليهو بي يدي وهو دور فات...دخلت سلمت علي خالتي لقيتهم مسوين شاي وكيك شربنا واتونسنا زين صلينا العشاء وكل زول علي سريرو دخلت الواتساب رسسلت لي حسام اشوفو وصل ولا لا ورسلت لي جميل برد علي كلامو وقفلت التلفون ورقدت نمت ...يوم الاتنين خالتي نجود قالت لي حينا دا ناسو كتار ولو سمعو بي نتيجتك بتكبو يجونا كلهم عشان كدا اقوم نجيب حلاوة وحاجات للضيافة قلت ليها واثقين من نتيجتي قالت لي شديد زي امك شاطرة انتي ما شاء الله كدي امشي واجيك فعلا لبست مشت جابت فنكوش وحلاوة وحاجات وجات كنت متوترة شديد قلت افتح تلفوني عشان م اركز فتحتو واتصلت علي عمي أول سلمت عليهو وكدا طمني شديد من النتيجة وقال لي انتي قدرها وانا واثق وكلام تحفيزي حلو...خلصت منو كدا ضرب لي جميل فجأة اتونس معاي شوية قال عندو شغل "شغال في عيادة خاصة" قفلت منو ضربت ليدام دخلت الحمام الف مرة وبليل م نمت..
يوم التلاتاء صحيت ومقلقة نضفت البيت دا وضايرت وامشي واجدي اشد الملايات وتوتر الف بنات خالتو نجود وخالتي نورا م داومو عشان النتيجة بتاعتي وخالي ال في الجزيرة برضو جا عشان م لاقاني المرة الفاتت جا هو واولادو ومرتو حقيقي لطيفيين لطافة وخالي بتاع نكت وونسة🤣💙💙 الساعة 1 المؤتتمر بدا وانا خلاص سايحة بعد شوية ترن ترن رسالة وصلت في تلفوني مديت التلفون لي أمل قلت ليها شوفي دي كم فتحت التلفون وفجأة صرت وبعد شوية بقت تكورك قالت 85 خالاتي ومرة خالي ديل في نفس الزمن فكو زغروتة بصوت عالي جابت ناس الحلة كلهم زغاريد وبكا وصفيق وانا ابكي بس ويزغردو وناس الحلة طوالي اتكبو في بيتنا وبارد وحلاوة شلت تلفوني كلمت عمي عمي دا بكا ويكبر ويهلل قال لي بعد شوية بخلي خالتك سمية تكلمك من قبيل تسألني منك قلت ليهو سمح قفل مني ضرب لي جميل ويتغزل ويبارك😂💙وضرب لي حسام بارك برضو لي ضربت لي رويدة قالت لي أنا مرة متزوجة جبت78 اوييوييييي دي لي وايويويويويويويويويييي دي ليكك😂 قلت ليها انا متزوجة نظام بتغيظيني 😒 قالت لي شوفي انا وحبيبي طالعين بمناسبة نجاحي باي وقفلت الخط🚶🏼♀️🚶🏼♀️
