خاننا القدر !

البارت الثامن

بقلمي / ضوء القمر 💫

عجيب الليل يلم حسبات مدري منين يجيب التايهات المالي خلك ألهن . . .

شجن : منو هذا الولد
ياسمين : هذا ابن جيرانه ابو عثمان كلش حباب
شجن : ي مبين عليه خوش ولد
ياسمين: اي والله تحطي على الجرح يطيب
شجن : زين اذا اوصيه على شغله يكدر يسويها الي
ياسمين : شنو
شجن : اريد يدور على اهل عمار
ياسمين : بعدج تفكرين بهل سالفه
شجن : لعد شسوي اريد ارتاح تعبت بعدين خوما اضل عاله عليكم طول العمر
ياسمين : اول شي انتي مو عاله بالعكس احنا مكيفين بيج ثاني شي شنو يظمنلج اهل عمار هذا راح يصدكوج
شجن : ما ادري
ياسمين : لعد نصيحه مني الج انسي الموضوع و عيشي هاي حياتج هذا اختبار من الله الج و اكيد اله نهايه
شجن : ونعم بالله

طلعت يقين مشتريه كومه حلويات رجعنا للبيت و هم سوينا عشى و ظلينا نتفرج على فلم و هيج مرت الايام بين شغل و بين دوام البنات و بين أقره الروايه الي اشتريتها يعني روتين متكرر مر شهرين على هل حال و أم علي ما لكت شغل بيوم جنا كاعدين بس اني و ام علي يقين بالمدرسه لان سادس و ياسمين بالكليه ام علي جانت تحسب فلوس و تجر حسرات رحت كعدت يمها

شجن : شبيج خاله
ام علي : والله يا يمه ما ادري شلون راح نمشي هل شهر البنات يريدن مصاريف و اني مدا الكي شغل

كمت رحت طلعت الفلوس العندي و الذهب الي حطته مياسين الي و رحت على خاله أم علي نطيتهن الها

شجن : خاله بيعي هذا الذهب و تصرفي ب فلوسه
أم علي و هيه ترجعلي العلبه : لا بنتي ميصير هذا الذهب مالتج
شجن : خاله انتي كلتي اني بنتج مو و اني اريد اساعدج بعدين اني صار شهرين عايشه وياكم و هم تصرفين عليه لازم اشارك ب مصاريف البيت شويه

حضنتني أم علي و باستني و اني هم بستها كمت احضر الغداء اجت يقين من المدرسه بدلت و اجت تساعدتني كملنا الغداء و بقينا ننتظر ياسمين ب 1:30 اجت بس مبين فرحانه حيل كعدنا نتغده و بعدين رحنا للغرفه ياسمين حاضنه الملزمه و مبتسمه رحت كعدت يمها

شجن : فرحينا وياج
ياسمين : ههههه فرحاااانه شجون احس راح اطير من الفرح والله
يقين : احجيييي
ياسيمن و هي تعدل كعدتها: باعن اكو طالب ويانا بالكليه اني جنت معجبه بيه و بشخصيته و كذا و اليوم اجى اعترفلي بحبه الييي
يقين : كبر عبالي شوف شكو
ياسمين : انجبي انتي شفهمج
شجن : عوفج منها احجيلي شسمه شلون شكله
ياسمين : باعي اول شي اسمه حسين و هو وياي بالكليه بس هو مرحله ثالثه
شجن : حلو؟؟
ياسمين : هسه اشوفج شكله

طلعت الفون و طلعت الفيس مالته و شوفتني صورته صدك حلو بهاي الاثناء دك عليها كنت ركض سديت الباب و رجعت كعد يمها ردت عليه حطيت اذاني على الفون اسمع شيكول

حسين : الووو يا حلو يمدوخنا
ياسمين بخجل : احم شكو متصل
حسين : والله عندي نقص بالاوكسجين كلت اسمع صوتج حتى اعوض النقص
ياسمين بخجل: هههه
حسين : يمه فدوه رحت للضحكه بويه لو يمي هسه
ياسمين : احم حسين اني بعدني ما فكرت بالموضوع لا تتصل لما افكر و ارد عليك
حسين : يعني يرضيج اموت
ياسمين : اسم الله ليش
حسين : يعني تريد لا اشوفج ولا اسمع صوتج و ابقى عايش
ياسمين: ما انته جنت عايش قبل ما تعرفني
حسين : اني انولد بيوم الي شفتج بيه
ياسمين: ديالله روح خاف امي تجي
حسين : اوك حياتي جاوو ممممح

سدت الخط و هي تضحك اني هم ضحكت

شجن : مبين ابو لسان
ياسمين: ييي كلش
شجن: شوفي ياسمين نصيحه مني الج لا تغلطين غلطتي لا توثقين 100% متعرفين القدر شنو ضام الكم يمكن لا سامح الله ما يكون نصيبج اني و عمار جنا متفقين نتزوج و قبل الخطوبه بيومين خاننا القدر و مات
ياسمين : الله يرحمه
شجن : آمين

ضلينا نسولف بعدين كمت اسوي العشى كملنا اني غسلت المواعين و البنات راحن يقرن اني هم طلعت الروايه و بديت أقره بيها كلش حلوه ثاني يوم البنات بالدوام و أم علي دتتريك اندكت الباب طلعت أم علي لكتها أم حاتم دخلتها صبيت جاي الها شربت منه شويه و بعدين التافت على أم علي

ام حاتم : خيه لكيتلج شغل ب بيت ناس اوادم و بيتهم قريب منا
ام علي : صدك منو همه
ام حاتم: بيت ابو جعفر خوش ناس اوادم و ما عدهم احد ولدهم كلهم يطلعون الصبح يرجعون بالليل يعني بس انتي و الحجيه
ام علي : ي الحمدلله رحم الله والديج خيه
أم حاتم : تدللين خيه يالله اترخص
ام علي : الله وياج خيه الله وياج

ام علي حيل فرحت و اني هم فرحت الها خطيه صار شهرين حايره رحت كعدت يمها

شجن : خاله اريد اجي وياج
ام علي : وين تجين
شجن : ل بيت هذول ابو جعفر اساعدج
أم علي: يا يمه انتي ما متعوده على الشغل الهواي تتعبين اني متعوده
شجن : خاله الله عليج هم اساعدج و هم اكضي وكت لان اخاف ابقى وحدي
أم علي: هم صدك مو مال اعوفج وحدج ماشي

بستها و رحت نظفت البيت رجعن البنات من عرفن هم حيل فرحن ثاني يوم البنات طلعن للدوام و اني و ام علي رحنا ل بيت ابو جعفر البيت جان فارغ بس مره جبيره موجوده سلمنا عليها و دلتنا على مكان الاغراض بديت أنظف البيت و أم علي تنظف المطبخ كملت تنظيف الصاله جتي هاي المره أم جعفر ابتسمت

ام جعفر : عاشت ايدج بنيتي
شجن : تسلمين خاله
ام جعفر : اذا ما تصير عليج زحمه صعدي نظفي غرف الولد اليوم كلهم يجون
شجن : صار خاله تؤمرين
ام جعفر : ما يؤمر عليج ظالم بنيتي

صعدت الطابق الثاني كلش جبير البيت و الغرف كلها كبار بديت انظف الغرف بالسره وصلت يم غرفه بابها مقفول تركتها و رحت على آخر غرفه بديت اعزل و ارتب الفراش رحت للمكتب توه دا اريد اشيل الاوراق انفتح الباب جفت تركت كلشي دخل واحد لابس عسكري جمدت ب مكاني هذا نفسه الظابط الي أخذني للمركز ب بغداد شجابه هنا باوع عليه و رفع حاجبه

الظابط : انتي منو و شدسوين هنا
شجن : ااا اني ... اا هاي شسمه جنت انظف
الظابط و هو يترك الجنطه ب صف الباب و يتقدم : منو سمحلج تدخلين غرفتي
شجن : هااا ااا خاله خاله ام جعفر كالت نظفي الغرف

ضل يباوع عليه بعدين راح للكنتور و هو ينزع القميص بسرعه دورت وجهي عزا غير ميستحي

الظابط بدون ما يلتاف: طلعي برا
شجن بسرعه : حاضر

طلعت ركض نزلت جوه هم زين ما تذكرني يربي هذا شجابه هنا بس يالله هو ما تذكرني رحت يم خاله أم علي اساعدها وره شويه سمعت صوته

الظابط : انتي ...

يتتتتبع 😁

يا ترا منو هذا الظابط ؟؟
و شنو راح يصير ويا شجن ؟؟
ياسمين شنو راح يصير بينها و بين حسين ؟؟

البارت الجاي تعرفون بس لا تنسون تصويت و متابعه
👈⭐👉👈👤➕👉💃💃

‏"ربما لم يعد سعيداً، ولكنَّه على أيةِ حال أقوى مِن قبل، أعني أكثر معرفةً بنفسهِ وبالآخرين."