حب ماكر

🌷الحلقة الثانية من الجزء الثاني 🌷

بقاو في الكازينو وصلت 6 ديال العشية بداو كجيو شي بنات ككونو لابسين عادين كطلعو لشي بيوت من بعد كهبطو لابسين لباس ديال الراقصات.
فاطمة: نزار أش هذا مال هاد البنات كلبسو هاكا و بلا حشمة و هاد البلاصة راه غي ديال الرجال.
نزار: هادو خدامين هنا، هادو راقصات.
صافي بقاو على بحال هاد الحال كل نهار كجيبها للكازينو كتبقا غي ݣالسة دازت سمانة، ولات فاطمة كجيوها هاد المناظير طبيعيين و كجيوها عاديين يعني مسألة البنات  لي كرقصو حدا الرجال و الألعاب ديال القمر هادشي كاااامل ولا بالنسبة ليها عادي و هادي كانت من الخطة ديال نزار حيت كان خاصها تولف هدشي عاد باش دخل ليه، بالنسبة لسعد كان كشوفها معاه و كتعذب حيت كغير عليها، و بدات حتى هيا تمشي منها الحشمة، و لات قريبة من نزار، و زادت كتبغيه كتر.
دازت واحد 10 أيام، كانت هي و نزار في الكازينو، بدات واحد البنت كتقرب منو كانت راقصة جديدة، هي بدات كتغير مشات عندهم وقالت ليه نزار أجي بغيت ندوي معاك، ج عندها، و بقات الراقصة كتشوف فيهم فاطمة دارت واحد التصرف لي عمرها كانت كظن من راسها غديرو شدات لنزار في يدو و عنقاتو هادشي غي ضد في البنت.
(بقاو معنقين)
نزار: فاطمة مالك يكما دار لك شي واحد شي حاجة؟
طلقات منو.
فاطمة: لا حتى واحد مدارلي شي حاجة، غي هو معرفتش اش وقع ليا مني شفتها قريبة منك مقدرتش نتحكم في راسي،
نزار: كتغيري؟
فاطمة: صراحة بغيت نهدر معاك فشي موضوع.
نزار: أه واخا غي نسالي لخدمة و نمشيو نتعشاو و ندويو .
دازت ساعة نزار عيط على سعد باش يجي يقابل لكازينو. خرج هو فاطمة باش يتعشاو.
نزار: اش كنتي باغا تقولي ليا
فاطمة : الصراحة حشمانة منك و هاد الموضوع معمري كنت نظن غادي نعمر بيه راسي و لا نفكر فيه، و لكن من نهار شفتك كلشي تقلب ليا في حياتي، دابا دازت شهراين و نص على اللقاء الاول ديالنا و من هاداك النهار تبدلو فيا بزااف دالحوايج.
نزار: بحالاش مفهمتش دخلي في الموضوع
فاطمة: الصراحة وليت كنحس بشي حاجة من جيهتك غي طبيعية، قلبي كبقا يضرب مني كتكون حدايا و عيني ككونو عليك غي نتا.
نزار: كتبغيني؟
فاطمة: انا ممتأكداش من المشاعر ديالي حيت أول مرة كنحس بهادشي أول مرة قلبي كنحس بيه كضرب على ود شي واحد.
نزار: هذا هو الحب يعني نتي كتبغيني.
فاطمة: أه كنبغيك، و معرفاش اش ندير
نزار: الصراحة أنا ممستاعدش ندخل فشي علاقة دابا و لكن ممكن تكون شي حاجة مستقبلا،
فاطمة: بحالاش ؟
نزار: دابا أنا باقي عاد كنعرف علك و نخبيش علك تأنا كنحس بشي حاجة من جيهتك و لكن باقي مترسخاتش باقي خاص بزااف د الحوايج يوقعو باش نتأكد من المشاعر ديالي تجاهك.
فاطمة: شوف نزار انا مكنطلبش منك دخل معايا في علاقة أنا غي مبغيتش نخلي هادشي في قلبي أما أنا منوياش شي حاجة من هادشي، و راك كتعرفني انا معنديش مع هادشي.
نزار: الصراحة منلقاش حسن منك و لكن مبيتش نكدب علك و لا على راسي حتى نتأكد من المشاعر ديالي عاد هاديك الساعة نصارحك.
و بهاد الطريقة نزار قدر يطيح فاطمة في الشبكة ديالو من خلال هاد الهدرة لي قال زاد كبر ليها في عينيها.