اسكربتات

اسكربت⁷

- الفستان دا حلو وهيليق عليكِ.
بلامبالاة= هاتيه وخلاص.
- يابنتي حرام عليكِ نفسك، زعلانة ليه دا إنتِ بتعشقِ الفساتين إيه اللي حصل.
=ياماما أنا أصلا مش هحضر الخطوبة مش ليا نِفس.
-دا مصطفى، مصطفى ابن خالتك اللي ليل نهار بتتكلموا وتهزروا.
= ماما اشتري الفستان وخلاص واللي فيه الخير يقدره ربنا.
"مش قادرة أتخيل إنه خلاص هيخطب ومش قادرة أستحمل ليه يعمل كدا، ليه الكسرة دي"

'فلاش باك'
= مصطفى يلا نروح نعمل شوبنج ونجيب طلبات ماما.
- يلا بينا.
'في الطريق'
-إسراء عايز أقولك حاجة.
=اممم قول.
- أنا هخطب الأسبوع الجاي.
بضحك= بتهزر صح! ههه
- لأ بجد الأسبوع الجاي هخطب.
بضحك= مين بقى تعيسة الحظ دي ههه.
-شهد بنت عمي.
بكسرة= ربنا يتمملكم على خير.
بفرحة- يارب يارب، عارفة! أنا بحبها من زمان والحمدلله خلاص هتبقى ملكي.
= يلا نجيب الطلبات ونمشي الدنيا حر ومش طايقة نفسي.
- ههه يلا.
'باك'
-آلو.
بعصبية خافتة=آلو يا مصطفى عايز حاجة! اؤمر.
-مالك متعصبة كدا.
بتبرير كاذب= أ.. أصل الدنيا حر وأنا خُلقي بيبقى ضيق م إنت عارف.
- طيب تمام، الخطوبة بكرا ها! من فجر ربنا تبقي عندنا هههه إنتِ أخت العريس ولازم تبقى أول الحاضرين.
بارتباك=مممصطفى أنا مش هاجي اعذرني عندي انترفيو ولازم أقابل المانيجر بكرا عشان أتعين وكدا.
- نعم ياختي! هتيجي يعني هتيجي ولو مجتيش انسي إن ليكِ ابن خالة، سلام.(قفل السكة)
ببكاء= لييييييه ليه يعمل فيا كدا، كنت بدعي في كل سجدة أن يبقى من نصيبي ليه يارب، اللهم إني لا أسألك رد القضاء ولكني أسألك اللطف فيه، يارب يبقى دا كله حلم أنا مش قادرة استوعب حاجة أ... أ.... مام.... ماما.
"بعد نصف ساعة"
-افتحي الباب يا إســــراء ويلا عشان نتغدى، يابت افتحي متخوفنيش عليكِ، أكملت ببكاء: إسراء افتحي يابنتي، لاحول ولاقوة إلا بالله، ياخوفي لتكوني عملتي حاجة فنفسك يااارب استرها معانا.
بلهفة-آلو آلو يامصطفى تعالى بسرعة، بسرعة والنبي يامصطفى.
- فيه إيه! جاي حالا.
"بعد وقت قصير"
-افتحي ياخالتي، افتحي إيه اللي حصل.
ببكاء- مصطفى إســــراء مش بترد والباب مقفول من جوا وخايفة لتكون عملت في نفسها حاجة.
بخوف- متخافيش هكسر الباب وهتبقى كويسة، تلقاها نايمة.
-مش بتعرف تنام في النهار ولا بتحب نوم النهار، يلا اكسر الباب بالله عليك يامصطفى.
"بعد كسر الباب"
ببكاء حاد-يامصيبتي يامصيبتي يابنتي، الحقني يامصطفى اتصل بالدكتور بسرعة البت بتنزف بسرعة.
-حح... اضر
بصوت عالي-دكتورة تعالى بسرعة في حالة طارئة في شارع....... بسرعة.
-حاضر يا أستاذ مصطفى، حاضر.
"بعد وقت ليس بكثير"
-طمنينا يادكتورة.
-هي جالها هبوط حاد وفقدت توازنها واغمي عليها وتقريبا اتخبطت في حاجة حادة فنزفت، بس الحمدلله النزيف مش داخلي ومنزفتش كتير.
- تسلمي يادكتورة، اكتبيلنا العلاج اللي هتحتاجه.
- تمام.... العلاج أهو.
-دكتورة هي تتحرك عادي ولا تفضل مكانها.
-لالالا تفضل مكانها متتحركش لمدة أسبوع، الجرح لسة ملمّش وممكن في أي وقت يتفتح وتنزف تاني.
-طيب يادكتورة شكرا تعبناكِ معانا.
-الشكر لله، أي حاجة تاني أنا تحت أمرك.
-اتفضلي حسابك.
- تمام، يلا سلام.
-خالتو اعملي شوربة لإسراء، هي لازم تتغذى كويس.
ببكاء- كنت لسة عاملة الأكل وبنادي عليها بس....
-خالتي خلاص هي الحمدلله هتبقى أحسن، هاتي الأكل وأكليه ليها.
-حاضر يابني.
-هسبقك وأشوفها كدا عاملة ايه.
"في غرفة إســــراء"
-ليه ليه زعلانة الفترة دي، ليه حسك متداقية ليه، أنا خُطبتي كانت بكرا بس..... هأجلها عشانك، لازم تكوني كويسة وبأفضل حال... إسراء أنا كنت ملهوف وخايف عليكِ، عارفة لو كان جرا لك حاجة! كنت هتكسر جامد، فوقي بقى يا إسراء.
بتعب= مصطفى، إنت قاعد هنا ليه، ايه اللي حصل.
بمرح ليخفف عنها-حمدلله على السلامة، محصلش حاجة إنتِ بس جالك هبوط، مش مصدق الصراحة إزاي جالك هبوط ودلوقتي عاملة زي الحصان هههه.
= ههههه الله يسامحك علفكرا.
- طب ليه علفكرا مع الله يسامحك هههه.
= إنت فظيع، أومال فين ماما؟
- ياماما، أصدي ياخالتو تعالي كلّمي بنتك اللي بتدلع دي ههه
-نعم يابني، حاضر جايبة الأكل وجاية أهو.
=ماما.... مال عنيكِ حمرا ليه.
-الشطة... الشطة دخلت فيها.
- خالتو أنا هأجل الخطوبة للأسبوع الجاي، عايزكم كلكم كويسين مش عايز أختي تعبانة ولا فيها شكة دبوس واحدة.
= مصطفى عشان خاطري متأجلش حاجة، خلاص اتحددت وزمان العروسة بتجهز نفسها وهتزعل لو إتأجلت.
-أنا قولت هأجل يعني هأجل، خالتو أنا هبات معاكم الأسبوع دا لحد ما إسراء تتحسن وتبقى كويسة.
-تنور يابني.
-بنوركم والله، هتصل على محمود أخويا يجيبلي لبس أو أنا هروح أجيب وأقولهم على حكاية التأجيل دي.
-طيب يابني اللي يريحك.
- هاجي كمان ساعة، سلام.
- إســــراء مالك الفترة دي كدا.
= ماما هاتي الأكل آكل، جعانة.
- حاضر هجيبه أهو، يلا افتحي بوقك.
=كفاية هههه شبعت والله.
- طيب يابنتي، فضفضي يا إســــراء أنا أمك سرك وضهرك.
بدموع= بحبه، بحبه ومش قادرة أكرهه، خلاص هيخطب وبعد مايخطب يتجوز وأنا أموت، بحبه ومش متخيلة حياتي إلا معاه، أنا اتكسرت أوي ياماما اتكسرت، خلاص هو حدد معاد الخطبة ويخطب بس طالما هو فرحان خلاص، كنت بدعي ربنا إنه يجعله من نصيبي، إما يقول إن أنا أخته بحزن وببقى عايزة أقوله أنا مش أختك، تعبت ياماما قلبي مش مستحمل.
-كنت حاسة إنك بتحبيه، انسيه يا إسراء انسيه وخلاص، ربنا هيرزقك باللي يحبك وتحبيه بس اصبري.
= شكرا ياماما على وجودك جمبي...... هنام شوية حاسة إني دايخة.
-نامي ياجسمي، نامي.
"في الصالة"
-جيت امتي خضتيني ههه.
-لسة جاي، المهم بقى تعالي نقعد أنا وانتي في البلكونة ندردش شوية.
-ثواني هعمل شاي وجاية.
-متنسيش السوداني ههه.
-حاضر.
"في البلكونة"
- مسحت البلكونة! ههههه، دانت فصيل خالص هههه.
-أيوا نضفتها ورتبت الحاجة وجبت ماية وفرطة ومسحتها هههه بيني وبينك بحب أقعد في المكان النضيف بعيد عن الكركبة، وكمان أنا أول مرة أمسح هههه، شوفتك تعبانة وزعلانة على إسراء فقولت أعملها أنا.
- هههههههه ربنا يحفظك يارب.
- تعالي اقعدي على الكرسي، هاتي من ايدك الحاجة دي.
- خد وقشر إنت السوداني بالمرة هههه.
-أنا بس هستحمل أسبوع عشان إسراء ها! أسبوع بقى بالمسيح وبالطبخ أنا بعرف أطبخ كمان ههه.
- يابخت مراتك بيك هتشيل عنها شوية بردو هههه.
- خدي الشاي بسوداني.
-تسلم، محمد وحشني يامصطفى جدا.
- خالتو إنتِ ليه مش ممثلة؟
-ممثلة؟
- أصلك بتعشقي الدراما هههه، ياحبيبتي ياخالتو محمد في الجيش دلوقت وكمان شهر وينزل الأجازة بتاعته.
- كان مالي عليا حياتي وبيجبلي كل حاجة ويسمع كلامي زيك كدا، عارف يامصطفى! إنت ابني مش ابن أختي لأ.
- إنتِ بقى قبل متكوني خالتو إنت صحبتي واللي معاكِ كل أسراري.
- يابكاش، إنت بقيت تخبي عني كل حاجة يامصطفى.
- كل حاجة إزاي؟
- زي إن إنت قررت مع نفسك إنك هتخطب وكمان شهد بنت عمك اللي عمرك ما بصيتلها حتى.
- آاااه ياخالتو لو تعرفي اللي فيها.
- إيه اللي فيها يامصطفى يلا احكي وفضفض زي زمان.
- أنا مش بحب شهد ولا عمري هحبها، عمي قاللي لازم تتجوز بنتي عشان... عشان الفضيحة.
- يامصيبتي فضيحة إيه؟.
- شهد واحد لعب في دماغها واتجوزها عُرفي ومن شهر بالظبط اكتشفت إنها حامل وجوزها قال دا مش ابني وعمل حوار وخلع.
- وبعدين.
- حكت لابوها كل حاجة وابوها كسّر عضمها وضربها جامد وروحت عندهم بالصدفة شوفت المنظر، عمي قاللي كل حاجة وقاللي لو بتخاف على سمعة العيلة اتجوزها فأنا طبعا موافقتش أنا أتجوز واحدة كدا ليه وإيه اللي يجبرني أتجوزها فعيّط وقالي طيب أتجوزها شهر وطلقها تاني.
- دا كله ومقولتليش حاجة خالص.
- آسف جدا.
- طيب لو مش بتحب شهد أومال بتحب مين.
- ها..... مش بحب.
-اممم طيب هو إنت ليه كنت فرحان وإنت بتقول إنك هتخطب وحاسس إنك حققت انجاز كبير؟
- مكنتش عايز حد يحس إني مجبور، كنت عايزهم يحسوا إن دا اختياري وكمان دي حب حياتي والكلام دا كله.
- طب ليه بتقول لإسراء إنها أختك مع إنك مش أخوها.
- ها.. أأأ.... أنا... أنا مش عايز إسراء تحس إني.... إن... أن.
- مرتبك ليه كدا.
- مش مرتبك أنا..... عادي.
- طيب ليه مقولتش على حكاية بنت عمك لإسراء مع إنكم صحاب جامد ومش بتخبوا حاجة على بعض.
- هتتجرح أكتر، كفاية عليها خبر خطوبتي المفاجئ.
- وإنت مش عايزها تتجرح ليه يعني.
- عشان.... عشان بحبها.
- هههههه بتحبها!
- أيوا بحبها، وهطلق شهد وهتجوزها هي، خالتو أنا كنت عايز أول فرحة ليا وأول وآخر زوجة ليا هي إسراء بس للأسف للأسف ياخالتو محدش حاسس بقلبي اللي بيتقطع، أنا كنت قايل لمحمد إني هتجوز إسراء وحاجز إسراء ليا، إسراء دي معني الحياة إسراء النهاردة اللي حصلها دا من إهمالي فيها، إسراء الوردة المفتحة اللي بتحب الحياة إسراء اللي بتمني من ربنا هي وبس، بحبها ياخالتو وبطلب إيدها منك دلوقتي، لو موافقتيش اعتبريني مُت.
- ياااه للدرجادي بتحبها.
- وأكتر كمان، موافقة عليا؟
- طب وبنت عمك هتعمل فيها إيه؟
- أنا هجيب اللي لعب في دماغها وخليهم يتجوزوا جواز شرعي، أنا باعت حارس يراقبه وخلاص عرف مكانه وهيجيبه على بكرا.
- طيب عايزة أفهم حاجة، إنت ليه يتداري حبك لإسراء، ليه مش قايل إنك بتحبها.
- مش عايزها تتعشم فيا زيادة.
- طيب يامصطفى عايزين نعمل خطة هههه.
- حاضر هههه.
"خلص الأسبوع و مصطفى كان بيهتم بإسراء جامد وخلاص إسراء اتحسنت وبقيت تمام، شهد بنت عمه اتجوزت شرعي وجوزها خلاص اعترف بالطفل بعد تهديد من مصطفى طبعا، محمد رجع من الجيش عشان لازم يحضر خطوبة أخته، النهاردة الخطوبة يابشر النهاردة الخطوبة"
= ماما مش عايزة أحضر.
- إسراء قومي البسي الفستان واتشيكي كدا.
=ماما مش هقدر أشوفه وهو بيلبس الدبلة لواحدة تانية، ياماما حسي بيا.
- طيب قومي بس البسي وحطي ميكب خفيف وكمان البسي الجزمة اللي جبتهالك امبارح.
=حاضر، حسبي الله.
"لبست الفستان وكانت زي سيندريلا وزي القمر"
- إنت قمر ليه كدا.
= ها.. مصطفى إنت في وعيك.
- إنت ملكي خلاص.
= فين خطيبتك.
- قدام عينيا.
بخجل= أنا بحلم صح؟
- دا أنا اللي بحلم، مش مصدق إنك خلاص هتبقي ملكي.
= محمد هو مصطفى بيقول إيه، هو مش في وعيه ولا إيه.
- هههه لأ في وعيه.
- تعالي يا آسرة القلوب.
= أنا مش فاهمة حاجة.
- مش مهم تفهمي، عيشي اللحظة وبس.
= طب أي!
- كنتِ حلم وخلاص اتحقق، بحبك
بخجل= وأنا كمان بحبك.

"تمسك بقلبي فإنه يُحبك" ♥️

#إســــراء_بـدوي"وَرد"
رأيكم