اسكربتات

اسكربت²⁰

- متأخرة ليه ياهانم!
بخجل= آسفة يامستر، كان عندي درس بعيد.
- طب متتأخريش تاني، يلا ادخلي.
"قعدت وأنا هموت من الغيظ والاحراج، أنا إســــراء طالبة في تالتة ثانوي علمي، مشهورة بخدودي الحمرا والكسوف اللانهائي من أبسط الأفعال، عندي صحايب كتير بس أنا لوحدي، المستر دخل يشرح، آه نسيت أقولكم إني بكره دفعتي عمى وبما فيهم المدرسين"
- قولي يا إســــراء اللي قولته كدا.
= احم، أنا جيت متأخر يامستر.
- طب ياريت تلتزمي بمواعيدك.
= حاضر يامستر.
"مكنش ربع ساعة اللي اتأخرتها يعني، معلّقلي حبل المشنئة ياختي"
_ اسكتي ليطردنا هههه.
= هي جت على الطرد؟ ماهو لسة مهزأني، ماهو لو كان متجوز كنت روحت شكيت لمراته أومال هو سينجل معرفش ليه ههه.
- يلا إنتوا الاتنين على برا.
= ياخراب بيتك يا إســــراء، احم أنا.... أسفة يامستر.
- قولت اطلعوا برا.
"اتطردنا وأنا فضلت أعيط برا وصحبتي تهديني، طب أنا الدرس دا مين اللي هيشرحه تاني، أنا زهقت وتعبت، مش هو بقى طردني وشايف نفسه عليا مش هجيله تاني وهاخد عند مستر صبحي ع الأقل متجوز ولو زعلني هشكي لمراته هههه أما دا فهشكي لأمه مثلا! خلصت صياح وروحت البيت"
- مالك كدا شكلك معيطة.
= المستر طردني عشان جيت متاخر، أنا شاكة إنه بيستعندني.
- حواراتك مبتخلصش ليه ياحاجة إســــراء.
= حاجة متخصكيش، واحدة وبتكلم أمها ايه اللي مدخلِك إنتِ!
- أنا هسيب البيت وامشي عشان ترتاحوا.
= ستوب، باقي الدمعتين بتوع آخر الكلام عشان المشهد يكمل.
- هههه يلا يابت، روحي كُلي وبعدين هاتي أعمل سحلب.
= أعظم أم دي ولا ايه ههه، هييييه هنشرب سحلب.
- هههه كل يوم تعملي كدا ع أساس إنك مبتشربيش سحلب!.
"كلت وشربت السحلب الجمدان من إيد أعظم أم فيكِ يامصر هههه، خلّصت دخلت مسكت الفون وفتحت فيس لقيت المستر منزل بوستات ضحك وكمان منزل بوست عن الخطوبة ههه أخيرا هيخطب وهيلاقي واحدة تلمّه! خلصت صياح ع الواتس ونمت"
- يلا قومي الدرس هيفوتك.
= قولتلك ياماما مش هروح عنده تاني.
-قومي عشان متزعليش مني.
= حاضر اهئ اهئ.
"لبست زي الكلبة وأنا دلوقتي في طريقي للسنتر، مش هعبره خالص ولا هرفع إيدي عشان أجاوب، بس كدا."
- اتكلمنا المرة اللي فاتت عن الأنسجة البسيطة ونسيج اللحاء، مين يقولي كدا نسيج اللحاء اتجاهه من فين؟
- من الأوراق لأعلى وأسفل.
- طب مين يقولي أمثلة عن الأنسجة البسيطة!
-........
"بصلي بنظرة استحقار روحت معيطة، أنا عارفة كل الأسألة دي بس أنا مش عايزة أرفع إيدي ولا أجاوب معاه"
_اهدي يا إســــراء، بتعيطي ليه دلوقتي يعني!
= مفيش، باقي أد ايه ونمشي.
- تلت ساعة.
= ماشي، هستحمل تلت ساعة.
"شافني وأنا بعيط ومعملش أي ردة فعل غير إنه ضحك وراح مكمل شرح، هو أنا مولودة فوق راسه يعني ولا ايه؟.... خلصنا وأنا طالعة وقفني ومشَّى كله، اتخضيت إما نادى اسمي واتكسفت، لازم أتكسف يعني دلوقتي؟"
بخجل واضح= حضرتك عايز ايه.
- ها.... هو إنتِ كنتِ بتعيطي ليه، هو كل ما أبصلك تعيطي؟
= احم، حضرتك اللي بتفضل تزعقلي وتبصلي بقرف والمرة اللي فاتت طردتني وهزأتني قدام اللي يسوى واللي ميسواش، هعمل ايه يعني غير إني أعيط!!.
- هههههه، إنتِ فصيلة بجد، خلاص حقك عليا، خدي الشوكولاتة والبيبسي دول بقى، متكسفنيش.
"عيَّطت تاني هههه"
- يافتاح ياعليم يارزاق ياكريم، طب أنا عملت حاجة دلوقتي عشان تعيطي؟
= حضرتك اللي بتحرجني ودا مش عياط دا أنا بس محرجة حبتين.
- طب خدي الشوكولاتة والبيبسي ولا أرجع في كلامي!
= لأ خلاص مترجعش ههه.
"خدتهم وطرت من قدامه، اتكسفت جدا منه، ولا أعرفه حنين ولا شرير ولا ايه بالظبط، روحت قولت لماما إن المستر صالحني واداني دول سكتت وقالتلي أدخل أفطر وأنضف البيت"
= إنت يلا هات القلم بتاعي.
- مش هديهولك عافية.
= ماية دافية أمشيهالك حافية.
- اللي يشوفك دلوقتي ميشوفكيش وإنتِ طماطم.
= هات القلم، يامامااااااا خلي ابنك يديني القلم بتاعي.
- هدّتوني، أنا هسيبلكم البيت وأمشي عشان ترتاحوا.
= كاااات، اتبقى دمعة، المفروض تتعلمي يامامتي من أخطاءك.
-لأ إلا أبو وردة لأ.... عااااا.
"ورجعت إلى غرفتي بعدما اتضربت بأبو وردة، ذاكرت شوية ونمت... حلمت بحلم جميل جدا وكان فيه المستر  واستغربت من وجوده في الحلم طبعًا ميعطتش زي ما إنتوا مفتكرين هههه بالعكس أنا كنت شجاعة وروحت كلمته وسألته هو بيقعد يبصلي ليه في الدرس راح قاللي..."
- قومي صلي الفجر يا إســــراء.
بخضة= ايه هو كان حلم صح! الحمدلله، جاية أهو ياماما.
"صليت وقرأت أذكار الصباح واستغفرت ربنا وعملت الفطار مع ماما وخلصت تنضيف البيت ولبست دريس عظمة مع طرحته الرقيقة ومشيت على الدروس"
- هو إنتِ ليه متأخرة دايما كدا.
= ايه يابنتي فيه ايه مالك، ايه الغريب ما أنا بتأخر على طول هههه.
- دا إنتِ فظيعة بجد.
= طب خلصي ياختي نروح درس مستر محمود عشان شكله كدا بدأ.
-....
= مفيش أماكن فاضية أحيه يارنا.
- الهوانم اللي واقفة تفضل واقفة دا عقابكم على التأخير.
بخفوت= ياخراب بيتك يا إســــراء، طب أجيب دواسة أقعد عليها مثلا يعني ولا ايه، حسبي الله فيكم كلكم.
"وطبعا كالعادة عيطت في آخر الحصة هههه وخرجت في الصالة الواسعة اللي في السنتر وعيطت جامد"
- ايه مالك بتعيطي يا إســــراء.
بدموع= ها... مش بعيطت يامستر أحمد، احم... عن إذنك.
- استني هنا... إما أكلمك تُقفي  تكلميني مش تمشي.
بدموع= يامستر العيال بتتفرج علينا... احم.. هقول لحضرتك ايه بس؟.
- اتكلمي.
بعياط هيستيري= مستر محمود وقّفني ساعة ونص في الحصة من غير ما أقعد ولا ثانية والسبب إن اتأخرت 5دقايق، بقى الكل يبص عليا ويضحك وأنا صابرة ومش بتكلم لحد ماخلاص مقدرتش أستحمل فطلعت أعيط برا إما رجلي خلاص ورمت.
-تمم، يلا روّحي دلوقتي وبكرا في معادنا وكمان إياكِ تأخري دقيقة واحدة وأنا بقى مش هطردك من الحصة لأ هطردك من الدرس كله... يلا سلام إنتِ وأنا هشوف الموضوع دا.
"مشيت وحاسة إني فرحانة إني اتكلمت معاه"
- يلا ياكلبة.
= بلوك هههه.
" دي واحدة بردو كانت متأخرة زيي ووقفت واتهزأت بسببي هههه، مفيش حيل أتكلم معاها ولو اتكلمت هتزعل وحوار كدا يوجع البطن ••••• بعد دقيقة لقيت مستر أحمد رد على الاستيت بتاعي وقاللي ادخلي ذاكري وتعالي بدري بكرا عايزك في موضوع، اسبهلِّيت مكاني وقعدت قلقانة وخايفة من الموضوع المهم دا، نمت من كتر التعب خلاص مش قادرة •••• صحيت لقيت الفون بيرن فتحته عادي من غير ما أبص مين اللي بيرن، زي كل يوم"
بنوم= اأألووو، مسافة السكة يارنا، دقيقتين وهبقى عندك.
- يلا قومي وتعالي بدري ها.
"قفلت السكة في وشه، ياخرابي دا طلع مستر أحمد، يامصيبتي يانا، أنا عمري ماكلمت أي حد إلا عائلتي الكريمة والبت رنا ولو روحتله دلوقتي هيزعق وهيتعصب عليا استر يارب استر•• قومت غسلت وشي ولبست على طول وروحت للسنتر"
= يامستر أحمد، حضرتك فين.
- تعالي أنا في قاعة ٢.
"روحت وأنا خايفة ومكسوفة جدًا فدخلت قاعة ٢ ولقيت الصدمة"
- ممكن تتجوزيني!
= عااا، اهئ اهئ.
"اتخضيت من المنظر ولقيت كل صحابي جوا والسكيرتيرة وكله والمكان كان متزين ببلالين حمرة وخاتم هيلوم وحاجات جميلة.. قلبي دق جامد وعيطت وكنت فرحانة بس مكنتش عارفة أرد أقول ايه"
- يلا يا إســــراء انطقيها بقى.
= أنا.... أنا موافقة.
"كلوا زغرط من هنا ونسيوا إنهم في سنتر خالص هههه وصحابي حضنوني ودا كله وأنا مش مستوعبة حاجة"
- هاجي النهاردة أشرب الشاي مع بابا ها.
= تنور يامستر في أي وقت، أنا لازم أمشي بقى عشان أعصابي باظت ههه.
" مشيت وروحت قولت للبيت كله، أمي بحستها السادسة كانت حاسة إن مستر أحمد بيحبني، أخويا صبح عليا بالقفا زي أي يوم عادي، أختي فرحانة عشان نلبس فساتين وأنا مشاعري متلخبطة ومش عارفة ليه، مروحتش أي درس النهاردة وقعدت في أوضتي أربط الأحداث ببعضيها واتضح إنه بيحبني طب وأنا هل بحبه ولا أنا لسة في مراهقة معرفش حاجة•••• فضلت ع الحال دا لحد المغرب، قومت لبست وأنا فرحانة وهطير من الفرحة منكرش بردو إنه عسول ودمه خفيف ومز كمان، الباب خبّط وماما فتحت وهم دخلوا وقعدوا في أوضة الركنة وأنا اتورت وخدودي حمرة جدًا وحاسة إنها بتطلع نار، دخلت بالجاتوه والبيبسي وقعدت قصاده!! "
_ما شاء الله عسولة يا إســــراء.
= ربنا يبارك فيكِ ياطنط.
" قعدوا يتكلموا وأحمد عمال يبص عليا وأنا خدودي تحمر بزيادة، حددوا الفرح بعد الامتحانات بتاعتي وكمان اتفقوا ع كل حاجة وأنا قاعدة دماغي عمالة تعمل إيرور هههه"
- سلام يا إســــراء.
= سلام يا مستر.
- هههه مستر ايه بقى، قوليلي يا أحمد عادي.
بخجل= حاضر.
"مشيوا وأنا امتحاناتي بعد أسبوع وكنا بنروح عنده حصص زيادة كل يوم وفترة الامتحانات جت والحمدلله طلعت ٢ على المدرسة وجت الأجازة بتاعت ٣ ثانوي وكتبنا الكتاب بس وبعد شهر الفرح••• جه الفرح وكنت زي القمر وخلاص بقت حياتي عبارة عن أحمد وبس ••••"
- بحبك.
= وأنا كمان.

"تمسك بقلبي فإنه يُــحبك" ♥️
بقلم/ إســــراء بدوي''وَرد"