اسكربتات

اسكربت⁹ بارت²

|البارت التاني

"صعد عمر لأعلى وعندما صعد وجد إســــراء تتحدث مع شخص فغضب وقال"

- آبا؟ حضرتك بتعمل إيه هنا!.
- ك ك كنت جاي أتطمن عليك يابني واتطمن على إســــراء بس إنت كنت تحت... صباحية مباركة يا عريس.
- الله يبارك فيك يابابا.
- أستأذن أنا بقى عشان عمك بينادي عليا.
= سلام يابابا.
- هو أبويا ماله قلقان كدا وكمان إنتِ، هو في إيه؟.
= ها..... مفيش حاجة.
- طيب يلا ننزل نفطر معاهم.
= تمام يلا بينا.
" خلصوا أكل وعمر طلع فوق لكن إســــراء خرجت في الجنينة"

*في الجنينة"*
= بابا طيب أنا عايزة أساعده.
- مش هيرضى.

*فلاش باك*
أول ما عمر نزل تحت إسراء نادت على أبو عمر لموضوع مهم.
= بابا أنا عيزاك في موضوع كدا.
- موضوع؟ هو عمر زعلك ولا ايه؟ حصل مشاكل ما بينكم؟.
= لأ يابابا محصلش حاجة بس أنا وعمر امبارح اتكلمنا وكدا وعرفت إنه متخرج من كلية هندسة.
- أه يابنتي متخرج من هندسة بس الظروف مسامحتش إنه يشتغل مهندس، لازم قدر مال كبير عشان يفتح شركة وكدا.
= يااه هو إزاي كدا، يعني هو مهندس لكن عشان مش معاه فلوس كافية مشتغلش وكمان رضي إنه يشتغل هنا عشان يصرف على نفسه وكمان ميحمّلش عليك مصاريفه أو حتى يشيّلك هم.
- النصيب يابنتي إنه ميشتغلش مهندس، لو كان معاه فلوس كان اشتغل بدل مابيشتغل سواق ليكم.

قطع حديثهم دخول عمر المفاجئ.
*باك*
= طيب ليه مش هيرضى؟.
- عمر عنده كبرياء وكمان مش بيرضى ياخد من حد فلوس كدا، بيحب يجيب فلوس من عرقه مش ياخد فلوس بالساهل.
= عارف يابابا؟ أنا احترمت عمر جدا لما اتكلمنا امبارح وكلامك دلوقتي عنه خلاني أحترمه أكتر وأكتر، بس لازم أساعده ويشتغل شغل يليق بيه.
- ليه عايزة تساعديه؟
= ها... أصل.. يعني... عادي بحب أساعد الناس.
- لأ مش عوايدك يا إســــراء، إنتِ بتتكبري علينا وبتعتبرينا خدامين، إيه اللي حصل خلاكِ تحبينا كدا؟.
= عمر..... عمر اللي خلاني أحبكم بكلامه عنكم وكلامه عنه وكمان إنتوا مش شغالين ولا خدامين إنتوا ناس تُحترم، بابا أنا كنت عامية ومش شايفة الناس الطيبة والجدعة اللي زيكم، كانت وجهة نظري في الناس غلط لحد ماجه عمر امبارح ووجهة نظري اتغيرت وحتى أنا اتغيرت 180 درجة بسبب عمر، حبيت البساطة بسببه حبيت الناس البسيطة الغلبانة بسببه وعرفت إنهم مش مختارين حالهم دا ودا شيء مكتوب ليهم وهم راضيين، بابا ياريت تعتبرني زي بنتك أنا بجد حبيتكم.
- أخيرا فوقتي يابنتي، أنا بحبك وبعتبرك بنتي بس إنتِ كنتِ شيء ودلوقتي شيء تاني أحسن وأفضل، بس كلامك عن الناس والحياة البسيطة خلاني فرحان وكمان عننا، بنتي عايز أسألك سؤال.
= اتفضل يابابا.
- إنتِ حبيتي عمر؟.
" قلبي دق جامد، وشي ضرب ألوان واتكسفت أبص في وشه."
=.... لأ... يعني.. هو... أصل.
- خلاص وصلني الإجابة، كفاية بس لامعة عينكِ إما جبت سيرته، ولا كسوفك وخدودك اللي احمرت.
= بابا عمر محترم جدا وكمان أنا أعجبت بيه بس لسة موصلتش درجة الحب اللي هي بردو محتاجة وقت بس الواضح هحتاج وقت قليل جدا عقبال ماحبه.
- ربنا يسعدكم يارب.
= يارب يابابا، هطلع دلوقتي أريح وأبقى أكلمك تاني في موضوع الهندسة دا ههه.
-دماغك ناشفة زي أبوكِ هههه.
"طلعت ولقيت عمر بيقرأ كتاب ومنسجم، دخلت أعمله قهوة بلبن عشان بتبقى جميلة جدا مع القراءة والهدوء يبقى آخر جمدان"
=اتفضل ياعمر، عملت لينا قهوة.
- شامم الريحة من قبل ماتعمليها هه.
=عمر... إنت بكاش أوي وكمان....
- وكمان إيه.
وشي احمر وبصيت في الأرض= دمك خفيف.
- ومالك مكسوفة وإنتِ بتتكلمي كدا، قولتلك الصبح إن أعصابي مخربطة هههه.
= بس إيه رأيك في القهوة!
- بصراحة يعني مش...
= وحشة؟
- دي قمر جدا والله وكمان كفاية الوش بتاعها ولا ريحتها جنان وأصلا طالما إنتِ عملاها يبقى حلوة.
=عمر...إنت مش بتتكسف وإنت بتقول الكلام دا... أصدي يعني إما تمدح فيها أو تبقى بكاش معايا... كلامك بيخليني أتكسف.
- أعيش واكسفك ياقلبي ههه.
إسراء في نفسها= ياقلبي! هو بيحبني دا ولا إيه، مش كفاية قلبي اللي على أخره دا ولا كمان خدودي اللي تقمّر عيش، ياخواتي دا ضحكته حلوة أوي، كل شيء فيه حلو، هو إيه اللي بقوله دا أنا كمان، بس الواد شهامة ورجولة ومز وعسل، أنا هقوم أحسن هههه.
- سرحانة في إيه.
= معاك أهو، كمل قراءة وأنا هنام شوية كدا، اوعى تخضني زي الصبح ههه.
- ها......
= هو ايه اللي ها ههههه، على الله تصحيني زي الصبح كدا.
- ضحكتك حلوة.
"خلّوا خطاف القلوب دا يسكت عشان هاكله حرفيا من كتر حلاوته"
= إما تخلص قراءة هتقولي كنت بتقرأ إيه ها!
- اشطا، يلا نامي.
"نمت وقومت لقيته خلص قراءة وكمان بيسقي الورد اللي في البلكونة"
=واه، الجو في البلكونة جميل جدا.
- إنتِ الأجمل، صحّ النوم.
= قول بقى الرواية أو الكتاب اللي كنت بتقراه كان بيحكي عن إيه.
بص في عيوني وقال- كانت بتحكي عن اتنين بيحبوا بعض بس بيكابروا لحد ما كانوا هيخسروا بعض فعلا بسبب الكبرياء دا لكن بطل الرواية بادر ولمّح بكلام كدا يمكن البعيدة تحس ههه فحست وكانت عايزة تقوله لكن خجلها منعها البطل يسكت! أبدا ههه راح قالها أنا بحبك راحت تقوله أنا بحبك وعاشوا أجمل أيامهم بسبب إن البطلة اتخلت عن كبريائها، وبس ياستي.
= اممم، إنت بتسقي الورد!
- أه، بحب الورد زي مابحب سوسن هههه.
= يقطع سوسن وشكل سوسن واليوم اللي عرفت فيه سوسن وإلهي سوسن دي تتشل.
- دي حبيبتي حرام عليكِ.
= طيب حبيبتك حبيبتك، ملكش كلام معايا تاني.
"الغيرة طفحت عليا ودا دليل إني حبيته لكن هو بيحب زفتة سوسن ياخوفي ليعرف إني حبيته"