حرف شارد (ديوان شعر) قصائد

حرف الجر

 قال حرف الجر، والحال فى جمله
الواو حرف العطف، متبوعٌ به الكلمه
والكسر طال الكل، فى الجار والمجرور
حال الوطن منصوب، والنصب من قومه
والشعب كان مرفوع، زاد السواد ظُلمه

والعطف كان ناقص،
والشعب مش معطوف
ساكن بيوته الخوف
والهم ساكن داره
واللعب ع المكشوف
والكل يشبه حاله
والتاء ضمير للفاعل
والفعل من مفعول
والفعل كان ماضي
والكل كان مشغول

والفعل فى الماضي
مبني كما الأوطان
مبني على المجهول

والنصب كان موجود
من فتره فى  الحاله
أما الخبر فى كان
والدنيا محتاله

رفع الخبر للناس
والضمه شغاله
والجر جوا الحجز
والشعب كان عاله

كل اللى ثاروا خلاص
راحوا هناك حفله
تنوين معاه بالجر
والكُره والغفلة
والتهمه كانت نصب
وخديعة الأوطان
سفكوا دماء الشعب
والدم  فاض غليان

ياسافك الدم وبتدعي الثوره
صوت النساء مكروه
صوت النساء عوره
صوت الصراخ محظور
برا السجون عوره
صوت الأمومه اتهان
قالوا عليه عوره
والآم لو تصرخ
على الشهيد عوره

ابنك مماتش شهيد
دا مات من الخمره
شارب فى دمه حشيش
شامم كمان بدره

عرفتوا مين كان يهتف
ومين اللى قال ثوره
يا دوله كلك خير
والاصل حكامك
حبستوا فينا الطير
راح الأسير خانك

ازاى تقولوا أسير
وانا اسمى سجانك
سكتت حروف الجر
من فعل حرف النون
كل اللى كان فى الحجز
ساكن وصمته سكون
كل اللى رفع الصوت
ترحيله  كان مكفول