المغرورة و القروي

إقتباس 2

زيد:"يا يحيى الناس بتوع القاهرة دول تحسهم شايفين نفسهم أعقل ناس وإللى من البلاد التانية مجانين أو مش مركزين بيشوفونا تايهين وعقلنا مش راكز .. فى حين إننا بنبقى جايين من بلدنا على بلد غريبة فاكرين إن البلد دى هى نفس طباع بلدنا فبنتعامل بعفوية مع كل الناس عشان مانحسش إننا بعيد عن بلدنا بس بنستغرب لما بنلاقيهم مختلفين .. مش دى الناس إللى إحنا مش متوقعين نقابلهم، بنقعد فترة بنحاول نخلى عشمنا ناحية أى شخص غريب يموت عشان يبقى تعاملنا مختلف أو نتعامل معاهم بنفس طريقتهم، ولو جينا إتعاملنا فى مرة بعفوية يقولك إنت مجنون؟ .. وحتى لو وصلنا لمرحلة الجدية وإننا نبقى زيهم للأسف الطبع بيغلب التطبع .. أهالى القاهرة دول تحسهم مش بيطيقوا حد غريب عنهم إلا من رحم ربي ... عندك مثال أهوه إنت من كفر الشيخ وأنا من المحلة الكبرى ... أنا فى البداية كنت زيك كده فاكر أهل القاهرة زى أهل المحلة .. بس لا الوضع إختلف، الناس دى مختلفة .. مش لاقى فيهم نفس الأمان إللى بشوفه فى أهل بلدى .. أنا وإنت وأى حد تانى من بلد تانية غير القاهرة عبارة عن حاجة واحدة بالنسبة لأغلب أهالى القاهرة .. مجرد فلاحين على الرغم من إنى من مدينة جميلة جدا متاح فيها كل حاجة كافيهات ومطاعم ومحلات وشركات وحاجات تانية كتير وكبيرة بس لا .. أنا فلاح زيي زى أى حد بره القاهرة .. الناس دى ماشية بمسمى واحد .. إللى بره القاهرة يبقى فلاح .. ثم فين العيب فى الفلاحين؟ يا سلام؟؟ هو إن الواحد يكون فلاح يبقى خلاص كده بقا عيب إنه يمشى فى الشارع يعنى ولا إيه؟؟ ومن إمتى الفلاحن بقوا عيب على البلد؟؟؟ دول الناس الأصيلة وولاد الأصول كمان، الناس دى تفكيرها غريب ... *إتنهد تنهيدة بسيطة وكمل* ... *عشان كده بقولك ماتتعاملش معاها بعفوية زيادة عن اللزوم البنت إللى عايشه العيشة دى أكيد شايفاك أقل منها، ده غير إن مظهرك بالنسبالها مش مقبول .. مظهرها هى شخصيا مش مريح .. رافعة مناخيرها فى السماء."

يحيى بهدوء وتبرير:"بس هى طيبة."

زيد بقهقهة:"والله إنت إللى طيب يا يحيى .. أنا مش بقولك إبعد عنها ولا حاجة .. أنا بقولك خد بالك كويس من نفسك . حرص ولا تخون يا يحيي."

..................

بدأ العد التنازلى لنزول النوفيلا القمر دى