سكريبت 💙
-علي مش هيجي
-يعني ايه مش هيجي...ده النهاردة كتب الكتاب والفرح
اتسندت علي ماما وعيوني دمعت وانا بتمني أكون فاهمة غلط... علي بيحبني ومش هيسيبني في يوم زي ده مستحيل
قرب بابا من أبو علي وقاله :
-جرا ايه يا عيد ابنك فين أنطق... ازاي مش هيجي.. دي تبقي فضيحة المأذون هيمشي... بنتي مش لعبة في ايديكم يا عيد
عيد:والله يا تامر معرفش ازاي ده حصل ولا حصل ليه... احنا فجأة لقينا علي اختفي وساب رسالة بيعتذر فيها من زينب وساب دبلتها.
مقدرتش اتحمل وقعدت أبكي وأصرخ... أبويا حضني جامد لحد ما اغمي عليا...
.....
فتحت عيني ولقيت اهلي وأهل علي جمبي.
-علي سابني... سابني يا بابا... ليه عمل فيا كده.... أنا اتفضحت خلاص
بصلي عم عيد:
-لا يا زينب بنتي مش هسمح لحد يجيب سيرتك... فرحك هيكون النهاردة بس علي ابني سليم.
-لا مستحيل ... ازاي وعلي
بابا مسك أيدي وقال :
-علي هرب واختفي يا زينب.. سليم قبل يتجوزك ده بدل ما نتفضح أكتر يا بنتي ترضيلي الفضيحة.
دموعي نزلت وقولت :
-اللي تشوفه يا بابا
....
بعد ساعة كنا كتبنا الكتاب... ماما زغرطت وقعدت علي الكوشة جمب سليم... صحيح هو أخو خطيبي بس عمري ما كلمته ولا اتعاملت معاه.. كنت بخاف منه لأنه علي عكس عادي إنسان كئيب ومبيضحكش ابدا.. دايما عصبي وكشري وعايش لوحده.. مختلف تماما عن علي ... عيوني دمعت تاني لما افتكرت علي... علي اللي حبيته من كل قلبي يعمل فيا ده... يهرب في يوم فرحنا.... بسببه اضطريت اتجوز أخوه... عمري ما هسامحه... ماما جات وحاولت تخليني أنا وسليم نرقص بس رفضنا.
بعد تلات ساعات كان الفرح خلص ورحنا علي شقة سليم .
-اتفضلي ادخلي.
قالهالي وهو مكشر.
قلت بصوت واطي:
-هو البعيد مبيعرفش يضحك... معندهوش أسنان يعني!
-بتقولي حاجة
-لا يا أخويا بقولك يزيد فضلك
دخلت البيت وقبل ما اخد نفسي لقيته قرب مني ومسك أيدي.
اتنفضت وأنا بقول:
-خضتني يا اسمك ايه.
مضحكش خوفت وقولت :
-مالك يا اخويا قرفان مني كده كأني فار مبلول
-اسمعيني كويس يا بتاعة انتي
-بتاعة؟!!
-متقاطعنيش
-حاضر
-اولا جوازنا مؤقت... أنا بس بصلح غلط الزفت علي... كلها كام شهر ونتطلق بهدوء... ثانيا جوازنا صوري انتي هنا هتقعدي معززة مكرمة بس اعتبريني مش موجود ملكيش أي حقوق غير المصاريف
قلت بصوت واطي :
-يعني انا هموت وابقي مراتك! اتنيل -ثالثا متبرطميش كتير وانتي معايا مبحبش الأسلوب ده... رابعا البيت يبقي دايما نضيف أنا هجيب واحدة تساعدك.... خامسا عايز الأكل يكون ليه مواعيد ثابتة... سادسا مبحبش الأغاني متشغليهاش وأنا موجود سابعا عايز هدومي تكون مرتبة دايما... ثامنا مش عايزك تحتكي بأي حد هنا مش ناقص صداع... تاسعا لو خرجتي من البيت متتأخريش عن الساعة تسعة وكله بإذني.. عاشرا وأخيرا حياتي ملكيش دعوة بيها أخرج مع مين أو اكلم مين.
-مش عايز شيكوبون لأمك
-بتقولي ايه.
-بقولك أمرك يا بيه أي أوامر أخري
-لا أوضتك هناك لو عوزتي حاجة انصحك متصحنيش... تصبحي علي خير
-وأنت من أهله.
-صحيح قبل ما أنام جعانة ولا حاجة اجيبلك أكل
-لا يا أخويا هو اللي يتجوزك هيجيله نفس ازاي يأكل.
مردش وسابني ودخل اوضته.
-يا ساتر يارب عليه مدت بوز ولا الولية اللي جوزها اتجوز عليها مرتين. رحت اوضتي واخدت شنطتي عشان أغير هدومي.. وأنا بحاول اقلع الفستان لمحت حاجة بتطير في الأوضة.
-ايه دي فراشة؟! لا ده صرصار... صرصار.. عينيا وسعت وأنا بصرخ وبقول :
-الحقوووووني
جريت علي أوضة سليم وأنا بصرخ :
-صرصار بيطير.... صرصار بيطير.... يا سليم الحقني....
وقفت مكاني لما لقيته من غير تيشيرت غمضت عيني وأنا بقول :
-ايه يا عم أنت عيب كده فيه واحدة معاك في البيت
-قصدك فيه بقرة عايشة معايا مبتخبطش قبل ما تدخل
-طيب ممكن تلبس.
سمعته بينفخ بضيق وبعد دقيقة بالضبط قالي :
-خير عايزة ايه
بصيتله بكسوف وقولت :
-فيه صرصار بيطير في اوضتي
-انتي عاملة المهرجان ده كله عشان صرصار!
-أيوة متعرفش الصرصار ده ممكن يعمل ايه وخاصة لو بيطير..
بصلي بقرف.. فرحت قلتله بسرعة بترجي :
-لو سمحت ابوس ايديك أنا عندي فوبيا منهم ساعدني...
طلع من غير ما يتكلم وراح اوضتي... رحت وراه وانا خايفة... قعد يدور علي الصرصار وقالي :
-فين أم الصرصار اللي بيطير ده
-يا أخويا مالك بأمه دور عليه هو الأول
-أنت هتسهبلي يا بت انتي... مفيش صراصير هنا... اتنيلي نامي وخلي ليلتك تعدي علي خير بدل ما ارميكي من البلكونة... وطلع برة الاوضة -ماله ده عصبي كده علطول... أنا اعرف أن الستات نكدية أول مرة أشوف راجل بومة كده....
غيرت الفستان ولبست بيجامة ورحت أنام حطيت راسي علي المخدة وقلت :
أخيرا
غمضت عيني.. ولسه هروح في النوم حسيت حاجة علي وشي... بفتح عيني لقيت الصرصار علي وشي....
-يالهووووي
جريت علي أوضة سليم وأنا بصرخ ونطيت علي السرير فقام مفزوع وصرخ :
-فيه ايه يا بومة انتي
-صرصار كان علي وشي يا سليم.
-يا ربي علي القرف اللي أنا فيه... روحي يا ست علي أوضتك متخلنيش ارتكب جريمة النهاردة بصيتله بتوتر وقلت :
-جريمة اغتصاب!
-لا قتل يا عسل.... يالا يا بت علي اوضتك.... مسكت ايده وقلت :
-ابوس ايديك يا سليم خليني أنام جمبك النهاردة أنا بترعب من الصراصير!
-أنا مش عايز أنام جمبك
بصتله وأنا هعيط وقلت :
-معلش ابوس ايديك استحملني النهاردة وبكرة نشوف موضوع الصرصار
-اووف بقا
قام وراح جاب مخدات من الدولاب ورماها عليا وقال :
-حطي دوول بينا
-ايه شغل النرم ده
-بتقولي حاجة
-لا يا أخويا بقول أمرك
أخدت المخدات وحطيتهم بينا ونمنا...
.......
تاني يوم.
صحي سليم تاني يوم لقي زينب نايمة علي صدره وحاطه ايديها حوليه
-اللي جاب دي هنا؟! صحيح أنا اتجوزتها امبارح.
نفخ وهو متضايق وحاول يبعدها وقال :
-انتي يختي قومي فزي خلاص الصبح صبح
-يا ماما سيبيني أنام
-ماما
اتعصب وزقني علي الأرض
-آه يا راسي
قولتها ولقيت نفسي واقعة علي الأرض وسمعت سليم بيقول:
-قومي يا حلوة نامي في أوضتك.
. ...
بعد ساعة كنا قاعدين أنا وهو علي سفرة الفطار وبنفطر بسكات.... بصتله بغيظ وافتكرت لما رماني علي الأرض الصبح
-ليه بتبصيلي كده.
-تعالي ارميك من فوق السرير زي الفار المبلول واكسر عضمك وبعدين اسأل السؤال ده
مقدرش يتحكم في نفسه وضحك... كانت أول مرة أشوفه يضحك.
-ايه ده انت عندك أسنان وبتعرف تضحك زينا.. اومال ليه البوز اللي ضاربه ده
ضحك ومردش عليا.. ومن يومها معاملته معايا اتحسنت... وبقينا أصحاب... اكتشفت أن سليم مش وحش وكئيب زي ما حابب يوصلنا هو بس ملقيش اللي يفهمه.... استمرينا كأصحاب لمدة شهرين بس مؤخرا حسيت نظراته ليا اتغيرت حتي نظراتي ليه اتغيرت... وقلبي رجع دق من جديد....
في يوم كنا قاعدين مع بعض بنسمع التلفزيون لما قال فجأة.:
-زينب أنا عايزة اعترفلك بحاجة
قلبي دق وبصتله وقلت بكسوف :
-اعترف
-أنا ب...
وقبل ما يكمل الكلمة اللي استنتها من فترة جرس الباب رن... راح يفتح الباب واللي كان علي الباب آخر إنسان توقعته يجي :
-علي
علي رجع.... أخو جوزي وخطيبي القديم اللي سابني يوم فرحي
يتبع
#زواج_مزيف
#سولييه_نصار
